是咁的，照顧過我嘅護士死咗: 二百零九、生日禮物

我一路覺得媽媽又唔畀我揀藝術，但生日又送畫畫用具畀我係假慈悲，所以一路都無為佢送嘅禮物而真心覺得高興。

而我亦喺升中四嗰年，放棄咗畫畫。

「仔呀，幾個月同你換一次畫具顏料呢，媽媽就做唔到架喇，但一年送一樣畀你都仲可以嘅，生日快樂。」

由十六歲到依家廿六歲，十次生日快樂，木顏色、掃描筆、粉彩、蠟筆、畫筆、水彩、直尺、調色盤、油性marker、水性marker。

講緊嘅都唔係咩大牌子，只係以前小學用過嗰啲學校團購嘅公廁貨。





但偏偏我今晚想畫畫送畀我鍾意嘅女仔嘅時候，我需要嘅用具一應俱全。

由於全部工具都未用過，顏料亦無開封過，試咗色之後，發現全部都仲用到。

我輕輕掃過自己十年嚟嘅生日禮物，一直無用過嘅繪畫工具，唔知點解，我笑起上嚟。

過咗十年，我先至為收到依啲生日禮物而開心。

「多謝⋯⋯」





過咗十年，先識得多謝媽媽。