是咁的，照顧過我嘅護士死咗: 二百零四、揀科

「又做乜諗野唔食飯呀？食飽咪充實囉。」

大學嘅時候聽過一個心理學講座，係馬斯洛嘅需求層次理論。

一個人當滿足咗生存需要之後，就會一層一層咁想追求更高層次嘅自我實現。

無論我食幾多野，都仍然覺得內心好空虛。

「你唔食下話，唔食我食。」阿連攞埋我個半碟豆腐火腩飯扒入口。





「我諗你唔明。」

「我同你老母都唔明啦，你中四揀科嗰年咪講過依樣野囉。如果當年你揀AV，你依家有得做政府咩？」

「係VA⋯⋯」

其實無論我揀乜科，都唔會影響我做唔到廢紙切碎員。

「求其啦。總之夢想唔可以當飯食架，當年你自己同意架嘛，依家又挑起邊條筋？」





當年我升中四要揀科，媽媽極力反對我跟興趣揀VA，仲突登拉埋阿連嚟說服我。