是咁的，照顧過我嘅護士死咗: 二百零三、發光嘅齒輪
其實我返到公司，同事見我周身傷都唔會叫我做啲乜。
我返工嘅主要功能係等上司知道我未死，下個月仲係要出糧畀我。
仲有填假紙⋯⋯麻煩。
我將啲醫生紙同假紙遞去人事部，個阿姐好似樹懶咁搞咗一輪上一手嘅文件先收我啲野。
結果返工嘅八粒鐘連埋食飯嗰個鐘，其實都唔知自己做過乜。
「有錢收架嘛。」阿連食飯嗰陣，眼尾都唔望我，好努力咁想夾起啲瀨粉。
生猛嘅瀨粉被夾起又旋即有生命咁逃離筷子嘅枷鎖。
「我知⋯⋯但硬係覺得⋯⋯唔充實咁。」
當十八子、林林同德仔都為工作而努力嘅時候，反觀我自己就行屍走肉做冗員。
大家都係社會上嘅齒輪，但感覺佢地曉發光，而我依粒易爛齒輪就烏卒卒咁。