是咁的，照顧過我嘅護士死咗: 二百零二、林林wtsapp

第二日，我起身之後，即刻拎咗部手機開wtsapp。

見到林林嘅wtsapp頭像係隻被人揑緊面珠登嘅柴犬，我終於可以確定自己琴晚唔係發夢。

但我無同林林講野，所以係聊天名單唔會見到佢個名。

我要特登㩒右上角個新增對話制，再喺自己通訊錄搵林林。

入面只會顯示，今天，同空白一片。





我唔知㩒咗入嚟幾多次，都唔敢打一句早晨。

依啲不必要嘅早晨晚安食咗飯未嘅噓寒問暖，如果我係以男朋友身分問，咁林林先會覺得窩心。

但我又唔係，邊有資格同佢閒話家常丫？

我同佢無任何關係，太多嘅關心就會過界。

尤其係琴晚氣氛咁好，我更加唔想破壞依啲僅餘嘅開心回憶。





我決定真係有事先搵林林。

好，返工。