是咁的，照顧過我嘅護士死咗: 一百八十六、以為你地咩關係

亦因為林林做護士，佢都好清楚香港人嘅嘴臉亦唔會比大陸人高尚幾多。

「大陸人係唔識，而且會大大聲鬧你發洩。香港人係唔識扮專家，陰啲陰啲咁串你潤你，啲說話仲難聽，其實被人大大聲鬧我反而無咁火滾。」

我就未做過服務業，真係唔多清楚。

「咁你又點睇好聲好氣同佢地講，都被人鬧返轉頭？」大把新聞都係講依啲。

「隻狗咬你你又咬返佢轉頭咩？同埋阿叔無鬧我吖，佢都係摟住我啫。」





一講到摟住佢，我心入面又唔多好受。

好彩依家知道佢地兩個唔係因為有浪漫關係先摟埋一齊，我先安心咗啲。

「我見到嗰陣，仲以為你兩個咩關係㖭。」

「病人家屬同護士關係囉。」

我大大力咁鬆咗口氣，動作之大引起林林一笑。





「嘿嘿，你咁誇張架。」