是咁的，照顧過我嘅護士死咗: 一百七十六、相擁原因
巴士駛到，由於我拎住拐杖，變咗林林要幫行動不便嘅我上車。
真係奇怪嘅組合，我嘅原意係照顧林林，但某啲位又要人照顧返轉頭。
情況就好似自己係盲人但要幫阿婆過馬路咁，愈幫愈忙。
好彩林林完全無嫌我煩，可能因為佢平時照顧嘅病人仲麻煩過我。
林林話哂都係人類唔係無感情嘅機械，點都有情緒，所以面對病人同家屬嘅無理取鬧，往往都會忍唔住喺背後反白眼，不過佢對病人大部分時間都好有耐性，好溫柔。
巴士開動。
我同林林坐喺下層，除咗因為我拎住拐杖外，我平時搭巴士都會揀坐下層。
貪下層好似穩陣啲，就算架車搖都無咁易撞到。
我地又返咗去無乜野講嘅尷尬沉默階段。
「啊，係喇，點解你會同個大陸阿叔摟埋一齊嘅？」