是咁的，照顧過我嘅護士死咗: 一百七十五、又自作多情

我同林林去等巴士，路程上面都有種難以言喻嘅尷尬。

我其實想開口，但又唔知應該講乜，與其講多錯多不如出少句聲。

「⋯⋯你朋友都幾可愛吖。」

估唔到，係林林撩我講野先。

聽講如果一男一女傾到無野傾，個女仔肯開新話題，至少可以確定佢唔係太討厭你。





「可愛？我完全唔覺喎。」

「佢擔心你嗰個心急樣，你見到都完全無感覺咩？」

「無喎。你唔使諗多喇，佢好多男朋友，唔會鍾意我架。」

林林微微搖頭：「唔關依啲野事。」

「咁關咩事？」





我唔知林林諗緊乜，但佢好似回想返某啲收埋咗喺內心角落嘅記憶。

「有人擔心自己，已經係幸福嘅事。」

啊！我同林林講過擔心佢！佢唔通有咩暗示？唔係卦，唔通最可以感動佢嘅說話，我誤打誤撞講咗出口？

「你講我？」

「吓？」





ok我又自作多情咗。