是咁的，照顧過我嘅護士死咗: 一百七十四、我唔睬你呀！

「金仔，你朋友咁擔心你，我諗你唔使送我喇。」

唔好呀大佬。

「佢係成日驚我被人蝦啫，無乜野架。依家知你唔係呃我，佢都安心架喇。你安心架喇，係咪呀零食妹？」

十八子唔係好情願咁點點頭。

「咁我送林林返去先喇。」





「唔准！」

我開始有啲唔耐煩：「又點呀？」

「唔准呀唔准呀！」

「畀個理由我吖。」

十八子一時語塞：「呃⋯⋯我⋯⋯唔⋯⋯」





「無合理理由啦嘛？林林，行得。」

我想轉身嗰陣，拐杖滑咗一下，林林即刻扶住我：「小心呀你。」

十八子見到我地兩個嘅互動，當堂谷到個嘴仔脹卜卜咁，用力一腳挫落地：「哼！我唔睬你呀！討厭鬼！」

佢怒氣沖沖咁轉身走，咚一聲撞到牆，就揞住額頭踢咗牆角幾野先繼續走。

我尷尬咁望向林林，佢無奈咁歪歪頭。