是咁的，照顧過我嘅護士死咗: 一百一十一、改名

「我嘅工作係照顧零至六個月嘅小朋友，即係佢地一離開醫院就會送體嚟我地依度。」

十八子話佢地一班姑娘就係班孤兒嘅親人，個個都係媽咪同家姐，而且會見證每個bb好多第一次。

「由邊個終於識轉身呀，鬥食得多奶呀，邊個打針唔會喊最叻叻豬呀，都會成為我地一班姑娘茶餘飯後嘅話題。」

入世未深嘅十八子仲會幫每個無名孤兒改名。

笑得最甜嘅係可樂。





屙尿透明嘅七喜。

氹三分鐘就收聲嘅杯麵。

成日整啲雪雪聲嘅拉麵。

屙粒粒屎嘅珍珠。

成日嘔奶嘅沙律。





塊面脹卜卜嘅魚蛋。

啲屎好臭嘅酸菜。

比人話醜死鬼就喊嘅面皮超薄嘅蝦餃⋯⋯

當時嘅十八子一直唔明，點解其他姑娘唔會幫佢地改名。

而就算佢改好哂啲名，其他姑娘都唔會用名嚟叫啲bb。





「返咗幾日，我就知咩事。」