是咁的，照顧過我嘅護士死咗: 一百零一、影衰緊香港人
雖然我唔知我出世未有乜關係，但可能的確係無關係，一個人扯火嗰陣通常都唔知自己講緊乜。
我同佢好難理性溝通，但阿嬸愈嚟愈激動，一路用手指指我，一路逼近：「你生過仔未呀死跛仔。依家啲後生仔點可以咁無大無細架？我當年幾辛苦湊大對仔女你知唔知呀？換片依啲換得多就知咩事架啦，個姑娘咁都唔識分，我係咪要出聲呀？」
我好驚佢郁手，事關我已經又拐杖又有龜頭套喺頸，佢都可以鬧得咁凶狠，一定係打人鬧人都唔留手嗰堆虎媽嚟。
「生港的撚真師爺蠻。」後面嘅大陸大媽同佢老公細細聲講，但我同阿嬸都聽到。
阿嬸即刻轉身，怒氣沖沖：「你話乜撚野蠻呀下？」
嗰兩個大陸人睇嚟都係斯文人，即刻撤退。
阿嬸哼咗聲，面上滿意嘅笑容宣告中港大戰嘅勝利者係港嬸。
但我覺得依個笑容其實影衰緊香港人。