是咁的，照顧過我嘅護士死咗: 一百零二、冷靜

當阿嬸擰返向我嘅時候，我指一指育嬰室入面。

啱啱喊緊嗰個bb已經收咗聲，十八子好溫柔咁摸下佢個額頭仔，佢周圍望，手腳郁郁下咁。

阿嬸知道自己輸咗，即刻谷到成肚氣。

「哼，依家新一代真係好無禮貌。」阿嬸死都要𢲡返渣沙，話我跛仔嘅係佢，話我無禮貌嘅又係佢。

好難理解佢啲邏輯。





好在阿嬸都仲算肯認輸，蔑咗我一野之後就撤退。

本身已經心情唔好，仲要比個阿嬸鬧，條氣甦加唔順。如果我唔係有脆骨症，一早打咗佢鑊金。

但正正因為我永遠都係弱者，我知有起武力衝突上嚟輸嗰個實係我，所以自小已經好識控制情緒。

對於抑壓怒火，我向來都係大師級。

冷靜冷靜⋯⋯





冷靜。

我深呼吸，唔再望住阿嬸撤退嘅走廊，睇返啲bb仔。

依個時候，十八子啱啱幫一個做完檢查，抬起頭，見到我。

口罩上嘅雙眼彎成腰果狀，佢舉起手，向我揮一揮。

見到佢微笑揮手嘅樣，我嘅怒火亦自然咁褪去。