是咁的，照顧過我嘅護士死咗: 九十九、怪獸阿嬸

我去到兒科部，十八子喺嬰兒室入面拎住塊板記低啲bb仔嘅狀態。

雖然佢包哂頭又戴哂口罩，不過佢嘅身材同行路姿勢我見得太多，好易認到佢。

我同啲家長一齊企喺外面，通常依個階段嚟睇bb嘅人都係老一輩，即係公公婆婆同爺爺嫲嫲為主。

「你睇下佢，眼仔碌碌咁。」

「哎呀哎呀，打喊露喇。」





「禾抿的孫子，那個那個。」

「喊喇佢喊喇，個姑娘仲唔去睇下咩事？」

室外嘅夫婦都注視緊自己個孫，而我就注視緊房十八子。

佢幫一個bb探完熱，察覺到有另一個喺度喊緊，就走過去輕拍佢心口。

「係咪肚餓要食奶呀？定濕咗片呀？唏，個姑娘識唔識架？抱起我孫仔睇下啦！」





我伸手指喺嘴邊：「阿嬸你細聲啲啦，醫院嚟架。」

「關你個死𡃁仔咩事呀？」睇嚟我又得罪人。