是咁的，照顧過我嘅護士死咗: 九十三、等藥
同德仔食完飯之後，我就繼續等藥之旅。
我依啲公屋仔無去過私立醫院唔知，但喺公立醫院等藥仲耐過排珍珠奶茶。
個情況好得意，細個嗰陣香港仲未有咁多人，所以等候時間都算係合理。
但近依五六年閒閒地都排粒幾兩粒鐘先拎到藥，人愈嚟愈多，等嘅時間愈嚟愈長。
有次以為媽媽中咗食肉菌去到醫院，分流之後好快有得睇醫生，確定無事之後，反而係等拎藥仲耐。
雖然話政府近來幾整咗條快隊，如果只配一隻藥可以快啲，派藥分流之後令整體嘅拎藥速度快咗，但始終都係人多，等嘅時間都仲係需要一個到個半鐘。
我見個勢仲有排等，所以決定喺廣華入面周圍行下。