是咁的，照顧過我嘅護士死咗: 九十二、追到咪老公

德仔聽完真心笑咗出嚟。

「哈哈！由佢啦，你當我普通人咁傾計吹水一齊食飯已經好好架喇！」

德仔望望隻錶，再遞比我睇：「嗱我頂多陪多你三分鐘架咋，你係追我姐妹好講喇。」

「我係好奇佢點解無男朋友咋，點追佢喎，我依啲咁嘅人⋯」

「佢係大把人追架，不過從來都唔見佢接受。典型工作狂性格，就算拍到都唔會長久。」





時間一秒一秒咁過去。

「試下囉，追唔到就狗公啫，追到咪老公囉。」

「你都話佢唔會接受架啦。」

「唔試過點知喎。」

我搖搖頭：「唔喇，不了不了。」





「哈！都話你鍾意林林架啦！」

我即刻伸手指喺嘴前噓佢：「咪咁大聲呀！」再望望四周圍，確保林林唔喺附近。

德仔意味深長咁微笑，有種姣婆味，比女人更女人。

「嗱，咪話我唔教精你喇，林林最憎人淨係見到佢個樣就狗衝。所以喺你地未有深入交流之前千祈唔好表白呀，知無？」

德仔拉高少少尾音，企起身點一點我鼻尖，就好風騷咁拎埋個餐盆走咗去。