是咁的，照顧過我嘅護士死咗: 六十八、討厭鬼

「但最後一日，你唔影相？」

「無咩好影丫，影相係同重要嘅人影先有意義架嘛。」

「話哂同佢地三年喇喎，有啲同班咗六年㖭喎。」

十八子遞薯片俾我，我就拎嚟食。

我地兩個好似倉鼠咁食到japjap聲。





「一齊幾耐多年唔係重點囉。有無一齊經歷過咩事，有無傾計交心先係。如果有深入交流的話，可能幾個月嘅朋友仲重要過六年嘅同學。我同佢地向來無乜兩句嘅，影相有乜意思？」

十八子吮自己手指啲胡椒調味粉，吮完食指吮拇指。

「你咪hi落嚟呀。」我警告佢。

十八子停低伸向我嘅右手，無癮咁「唓」我一聲。

「咁既然佢地唔重要，點解你好似有啲唔開心咁嘅？」我好奇一問。





佢聽完就扁起嘴，用下巴指一指眼前嘅小花園。

時間大概係一月幾二月左右，過咗新年無耐，冬天尾春天頭咁。

不過小花園種嘅都係三四月先開嘅花，所以眼前所見嘅小花園有啲荒涼。

枝葉之間雖然有啲花冧，但我搵咗好耐都唔見有邊朵開咗。

「我叫你咪hi落嚟。」喺我望緊花園嗰陣，十八子隻右手又鬼鬼鼠鼠咁向我件校服移動。聲東擊西計劃失敗。





「唓，討厭鬼。」