是咁的，照顧過我嘅護士死咗: 六十七、我與十八子

「喺度呀你？」

中學last day對學生嚟講已經係正式嘅畢業日。

放學之後，同學喺學校門口道大閘前影咗一幅揮手道別嘅相，而我係影相嗰個。

嗰張相入面，全班缺咗兩個人。

一個係作為攝影師嘅我，另一個係一早唔見人嘅十八子。





最後一次放學之後，我自己走返入學校。

唔知點解，我覺得十八子喺小花園度。

無估錯，佢一個人食住薯片喺木凳上望住自己打理咗好多年嘅花園。

咔喇咔喇，聽聲都知佢食得好兇狠。

其實佢開始認真讀書做乖學生之後，已經無被人罰去淋水同剪草，但佢話同啲花花草草有咗感情，所以一路自願照顧佢地。





「依度先係我可以安心嘅地方。」

十八子轉頭，望向我，髮絲喺佢耳旁瀉落。

我留意到佢嘅表情有啲失落。