是咁的，照顧過我嘅護士死咗: 二十四、十八子
同大家介紹返我嘅青梅竹馬，佢叫十八子，因為佢姓李，十加八就變木，連埋子就變李。
依個女人好迷日本野，哈日族一名，對有「子」字嘅名情有獨鍾，比如吉川春代子、大卷次子、次所舞次子、盅穿牆子、北川景子依啲，所以先改做十八子。
佢鍾意食零食，以前中小學成日捧住包野食周圍走，所以我就叫佢零食妹。
小一同班到中六，直到出嚟做野，真係孽緣，不過我地唔同大學，最主要係佢成日嚟搵我。
原因不明，可能覺得我依個脆骨症病人好有趣卦？嗱，一定唔係鍾意我，唔使諗多。
十八子啲男朋友好似八十年代嘅香港電影咁，百花齊放，一套落畫緊接另一套，唔會睇得上我依啲A0毒撚。
不過不得一提佢中學嗰時幾好丁。