是咁的，照顧過我嘅護士死咗: 二十三、薯片

至於佢少嚟探我，我向來無乜介意。

一來媽媽做野都忙，二來因為依個病，由細到大出入醫院嘅次數多到數唔哂，啲程序等等都做慣做熟。

我琴晚因為昏迷先入咗嚟急症病房，但我依啲年青力壯嘅毒撚通常一至兩日左右就出院。

「喂！薯片！知你又入院我即刻嚟睇你呀，係咪好有你心呀？」一個身材偏瘦嘅短髮女護士走咗過嚟我身邊。

好少女仔carry到短髮，通常carry得起嘅都係靚女。





但可能我睇咗十幾年慣哂，對佢個樣已經無感覺。佢好似細波短髮版嘅星名美津紀。

「點呀零食妹⋯⋯」

佢二話不說就塞咗粒朱古力入我口。

「係咪好甜呢？」

「甜得滯⋯⋯」





「啱架喇！比你送啲苦到抽筋嘅藥架嘛。」