是咁的，照顧過我嘅護士死咗: 二十二、媽媽

「好彩當年無新移民爭床位，唔係你可能死鬼咗喇。」

媽媽好憎新移民，但佢地搶資源依啲並唔係憎恨嘅主因，而只不過係因為佢同大媽喺地鐵度理論，叫佢咪比個仔周地屙尿。

咁你知啦，依個年代啲大媽唔講得笑架嘛，當年做過紅衛兵架嘛，咪打起上嚟。

我媽媽食過下夜粥，完全掌握咗硬食嘅真髓。

但佢條氣唔順，就同個大媽大打出手，仲比人放咗上youtube。





自此我媽媽就好憎新移民，加上我大個仔，佢又知醫院極多普通話人士，所以直情唔嚟探病咁滯。

我都唔想佢嚟，事關佢一嚟醫院就變蝗蟲獵人，衰在佢乜野睇唔過眼嘅野都要出聲，所以成日發生衝突，最後又搞到騷擾到病人。

「依度香港呀！你估大陸呀？」

雖然每次媽媽發聲都係單打獨鬥，事關依個年代，已經連幫下口嘅人都無，但佢仍然堅持住。

「咁排隊係咪原則問題先？唔想排隊搭火箭丫笨？」





「咁唔好吐痰係咪原則問題先？整污糟條街佢係咪奶返乾淨佢先？」

「咁唔好食野係咪原則問題先？喺地鐵打邊爐丫笨。」

「咁唔好嘈到人係咪原則問題先？插喇叭播丫笨！」

我媽媽真係好勁，女強人嘅部分好似麥太，巴辣嘅部分又好似葉德嫻。

做人太有原則，通常都好辛苦。





好在媽媽夠堅強，永遠無喺我面前呻過苦。

佢啲骨頭好硬淨，同我完全想反，幾廿歲人都唔使飲安怡奶粉。