凶港: (10)

「去大埔嘅途中，要經過科學園...」 科學園？咪即係爆發喪屍危機嘅第一個地方？

咁個度肯定聚集咗好多喪屍... 我地咁嘅油量，無可能突圍... 「咁我地應該點？宜家已經好快到馬場啦，好快去到科學園...」阿龍問。

我望一望車出面，已經喺彭福公園近火炭火車站個度嘅公路，路上零星停咗幾架車。 「弊，仲有無路呢？」我苦思。

仲有少少距離就到科學園... 「唔使緊張，你地睇下，出面都無...哇！！」阿鋒假作鎮定。

我望出車，只睇到密密麻麻，喺公路上嘅黑點... 原來係公路上聚集咗極多，極多嘅喪屍。





佢地正向馬場依邊進發。 「哇！」女神BB大驚，緊緊抱住我隻手。 「咁多位有無計仔？」Mrs Wong都急住問。 「我地由馬場果邊小路去大埔！」阿龍提議。 「馬場小路？」Mrs.Wong猜道。

係喎，馬場後面仲有車路，無啦，搏一搏啦！ 「Mrs Wong喺前面嘅路口急轉！」阿龍大嗌。

Mrs Wong全速向路口開車！

因為入單車徑嘅路就係喺馬場嘅另一側，雖然個邊可能都唔安全，但總比衝過大路嘅喪屍群更安全。

我地部車一下轉彎，轉咗入海邊嘅路，喪屍亦開始轉入小路追擊我地。 「哇，好險！」華姐鬆一口氣。





車急速咁行駛。

部車撞向單車徑上嘅柱! -------------------------------------------------- 我再望出車，單車徑上一個人都無，只有散落一地嘅血，同一d殘肢... 每次一輾過野，我都會不自然咁諗到輾過嘅係手，腳，頭... 差少少就到科學園嘅小路。 「Mrs Wong，要快啦，一定要快d穿過去！」Tony仔心急。

Mrs Wong望一望Tony仔，點頭。
「好，我盡快！」Mrs.Wong扭動呔盤。

車速越嚟越快。
路邊有零星幾隻喪屍。





我地會好安全到大埔...
砰！
噢...... 登...登...登...登...
緊急聲響起... 車撞上咗路邊嘅石壆，
車頭駕駛座撞到變咗形...！ 登...登...登...登
車頭不斷冒煙... 後座嘅人多數受咗小傷。 「哎呀...」Mrs.Wong哀號。 「阿華有無事...？」阿龍強忍傷勢。 「無事...我無事...」華姐手腕被玻璃割傷。 「Tony仔有無事！？」阿鋒摸住自己右手嘅痛處問。

坐喺車頭副駕位嘅Tony仔摸摸頭上嘅傷口：「無事，受咗少少皮外傷...」Tony仔如釋重負。

突如其來嘅一撞，令我極度慌張。

阿鋒受咗傷，Tony仔亦受咗傷... 女神BB就不省人事！ 「班喪屍嚟緊啦，落車走啦！」我大叫。

眾人紛紛落車，阿龍同華姐就各自攞起一袋物資，我地要向大埔方向奔跑。





而我就揹起女神BB，準備落車... 咦，Mrs Wong呢？ 「駿..駿同學...」Mrs.Wong氣若游絲。 「Mrs Wong，你做緊乜呀？落車啦！」我大喊。 「唔...唔得啦，我隻腳...我隻腳斷咗...」Mrs.Wong阻止我。

我望向Mrs Wong隻腳，嚴重變形... 「咁我...應該點做？」我開始眼泛淚光。 「走啦...咳咳...」佢好辛苦咁喘氣。 「阿駿，快d行啦！無時間啦！」阿龍大叫。 「咁多位...過嚟幫手救Mrs Wong啦！」我大喊同伴。

Mrs Wong捉住我隻手，微弱咁講咗一句：「快d...快d...走呀......」 阿鋒強忍自己嘅右手嘅痛楚，急忙過嚟幫手。 「阿鋒同學...帶駿...同學...走呀...」Mrs Wong對住佢講。

阿鋒都望到Mrs Wong變形嘅小腿，含淚咁拖住我。 「走啦...嗚...走啦阿駿...」佢不忍直視。

Mrs Wong隻手鬆開咗，而我就揹住女神BB，同阿鋒向小路逃去... 登，登，登，登... 車嘅緊急音響仲響緊。。。 車頭嘅燈仲閃爍緊。。。 喪屍漸漸向Mrs Wong部車行去... 「呀！！！！！！」
咔嚓...啪啦... 伴隨住四肢被撕裂，內臟被掏出嘅聲音，Mrs Wong嘅慘叫聲劃破長空，然後漸漸消失。。。 點解？點解會咁樣？

我流住眼淚，一直奔跑，跑到接近離開科學園嘅隧道... 「走，番轉頭呀！」突然一直帶頭嘅Tony仔突然番轉頭大嗌。

我再望，佢身後嘅隧道原來滿佈喪屍，喪屍正擁緊出嚟！ 「咁我地仲有乜野路可以行呀？」阿鋒慌張咁問





我...我都唔知點算好.... 我會唔會死...？ 「...去...去教學大樓...」一把微弱嘅聲音喺我耳邊傳嚟。

原來女神BB慢慢恢復番知覺! 「咁多位，入教學大樓呀！」我隨即大嗌。

衝，衝，衝！

我地起勢咁繼續跑，向其中嘅一座大樓進發... 女神BB仲未回過神，未可以落地，而我嘅身體就漸漸疲累！

前面就係，前面就係啦！

頂住呀阿駿，唔好停呀！