凶港: （11）

我好累。。。。 我絕對唔會放低女神BB...
我地經過咗果舊「金蛋」，進入咗生物資訊中心。

Tony仔最後一個入到嚟，急忙閂門，仲用旁邊嘅梳化頂住咗度門。

阿龍亦露出筋疲力盡嘅表情，華姐就氣喘不停... 女神BB終於醒番。 「阿駿...究竟發生乜野事...Mrs Wong呢？」佢問。佢仍然很虛弱。

我唔忍心去講... 阿鋒露出痛苦嘅表情，喊住咁娓娓道來：「啱啱撞咗車之後...嗚嗚...Mrs Wong卡咗喺部車度...嗚嗚。。。。。
...佢死咗...」 「嗚呀！點解...點解會咁...架？」女神BB喊咗出嚟。





偌大嘅大堂，團繞住女神BB嘅喊聲，華姐都不禁流咗一兩滴淚... 砰呀！

大樓嘅玻璃碎裂，原來係抵受唔到大量喪屍嘅壓力而碎! 「跑呀！向上走！」我大吼。

一行人紛紛向樓梯跑去！

救命...我好累...我想停低... 我地不停咁跑到去七樓，打開咗大門，入去人面，原來係長長嘅走廊，沿途係一間又一間嘅實驗室。

我地急急腳衝入咗其中一間實驗室，避開喪屍嘅追擊。





喪屍衝入七樓範圍... 我地屏息靜氣...唔發出任何聲響... -------------- 等咗好耐，喪屍都應該漸漸離開七樓... 實驗室嘅百葉窗透出少少光芒，睇嚟已經到中午。

我地喺物資入面攞咗食物出嚟食。

阿龍同華姐分享幾條包裝腸，阿鋒就飲緊水，而Tony仔就食緊魷魚絲，我攞住一排朱古力，諗住同女神BB一齊分。

行到實驗室入面嘅文件室，我搵到女神BB，見到佢手上攞住一份文件睇緊.。 我行過去，遞包朱古力比女神BB：「你肚唔肚餓...食d野先啦...」 女神BB呆望住眼前嘅文件，對住我講：「阿駿...你睇下...」 我伸頭一望，文件嘅標題寫住： 「凶港計劃」

凶港計劃？係乜野嚟？





我掀開文件，睇到個主要負責研究人員嘅名單，一直向下睇： 「朱紫瑩，關海晴，梁日雲，程思朗...Dr.Glen...」我讀出d人名。 「Dr.Glen！？」女神BB驚訝。 「乜事？你識佢?」我好奇。 「佢...佢係...佢係我爸爸...」女神BB惶恐地答我。

WTF！？ 「乜話？佢係你呀爸？」我不敢相信。 「...係呀...佢已經成個月無番嚟屋企...」女神BB繼續解釋。

唔怪得女神BB讀Bio啦，肯定係Dr.Glen想佢繼承衣鉢。 「點解佢會出現喺份名冊度..？」我問。 「爸爸佢有一排特別忙，之前我問佢做緊咩project，但佢都唔答我做乜..仲好凝重同我講要我唔好搞佢d文件........」女神BB則繼續訴說。 「等我繼續睇下...」我迅速掀去下一頁。

下一頁係見到一堆深澀難懂嘅英文，我完全唔識讀。 「你識唔識依d英文...」我問女神BB。 「我...我試下睇下...」女神BB面有難色。

佢邊睇邊讀，突然女神臉上露出錯愕嘅表情，然後四肢無力，癱倒地上。

我即刻坐低地下，摸住佢個頭問：「點呀？佢講乜？」 女神BB衝入我懷中，口震震咁講：「佢地...佢地要殲滅我地...」 乜撚野話？ 「下？你講乜野？」我呆咗一呆。

女神BB開始顫抖，繼續講：「份計劃...話打算用...一種...生化病毒...感染我地...令我地變成喪屍...繼而...」 「繼而清洗香港？」我心涼左半截。 「係......」佢弱弱地回答。

我心寒咗一寒，點解佢地要咁做？





女神BB繼續一面顫抖，一面解說：「...依種病毒...利用咗改造基因強化...唔會停止擴散...只要人死咗，就會...變成喪屍...」 Shit！咁即係我地都有依種病毒？ 「唔好...唔好咁...唔好咁...」我喃喃自語，極想發脾氣！ 「我地...我地應該點...」女神BB摟緊我。 「我地要向北走，離開香港...」突然我覺得好灰。

女神BB亦低聲回應：「嗯...」 跟住我將凶港計劃嘅文件收埋咗... 我唔想俾其他人知道... ------------- 我地一行人開會，商討下一步嘅行動。
我同女神BB坐喺一側，唔敢面對我地睇到嘅野。 「我地宜家喺科學園入面，我地要搵路去大埔海濱公園...」Tony仔係地圖指手畫腳。 「點解要去公園個度？」華姐問。 「係咪因為個度有單車！？」阿龍猜測。 「係，我地可以用單車踩去粉嶺，粉嶺有軍隊，我地到咗個度就可以安全...」Tony仔回答。 「咁我地點突圍至得架？」阿鋒問。

Tony仔沉默，因為佢無計畫過應該點行呢步...... 究竟我地可以點？我地可以點？

女神BB突然間拍拍我手臂，
「阿駿...你...聽下...」佢顫抖。 「乜事?」我細聲問。

嘭嘭！嘭嘭！嘭嘭！

實驗室內嘅實驗品室有人拍門！





我地個個都聽到，緊張嘅氣氛濃厚彌漫住成間實驗室。

我攞起Mrs Wong俾我嘅金屬鼓棍，慢慢打開門...