凶港: (6)

「阿駿！」有個人呼喊我個名。

咦，把聲咁熟嘅...？ 「阿鋒！」Tony仔興奮地叫入嚟果個人既名。

下？阿鋒？我又驚又喜。

喪屍唔係入咗去303咩？佢地唔係應該...？ 我冷靜落嚟，睇清楚，果然係阿鋒！咁女神BB同華姐呢？ 「阿..駿..」 「阿駿，Tony仔!?」 係女神BB同華姐把聲！

噢噢噢！！佢地未死！！ 我即刻衝去女神BB身邊，摟住佢：「你..嗚..你無事...嗚嗚...就好啦..」我唔想又失去佢。





女神BB都回咗句：「唔...使..擔心...」 我忍唔住流眼淚。

阿鋒坐咗喺地下，望住我偷笑。

Mrs Wong摸摸自己塊臉嘅瘀腫：「阿駿同學，咳咳，都叫你冷靜少少架啦..」 「你點...嗚..嗚..通知佢地..走架？」我強忍淚水，問Mrs.Wong。 「你地走咗無耐，我都覺得唔對路，所以咪同佢地走咗去307地理室，點知地理室都有電話，Mrs Wong打咗俾我地...而班喪屍就咁啱開始一窩蜂擁上嚟...」華姐出聲。 「我一直，咳咳，想知道學校有無生還者..咳咳，所以打電話睇下有無人聽...」Mrs Wong續解釋。 「原來係...咁...嗚..無事就...好...」我開始為自己既衝動感到內疚。 「阿龍呢？」華姐左顧右盼。 「...下？」Tony仔唔敢回答。 「阿龍呀！」華姐怒視我同Tony仔。 「佢...佢...」我都唔知點回應。 「佢點呀？」華姐眼眶泛紅... 「佢幫我地..引走咗班喪屍，等我地...有時間走...」我弱弱地回答。

我硬硬地食咗一拳。

好痛。 「你個廢柴，點解你唔阻止佢呀！？」華姐扯起我衣領質問我。 「佢話...佢係班長，要..負責任！」我自己都覺得自己好唔負責任。 「你個仆...嗚..呀！！阿龍！！」華姐哭成淚人，癱軟在地。





我唔敢再講阿龍交代嘅野，但根本阻止唔到華姐嘅喊聲。

華姐嘅哭喊聲迴盪成個509室。 「唔好再喊啦華姐...」阿鋒開口。 「阿龍佢咁好人，實吉人天相嘅...」佢拍拍華姐肩膀。

Tony仔加入：「阿龍可能搵到路，走咗呢...」 Mrs Wong亦發聲：「華同學唔好再喊啦。。咳，阿龍同學會番嚟嘅...咳，我地應該諗下點落番去地下，留係5樓始終唔係辦法...」 我突然驚醒：「Mrs Wong，點解你唔用個電話搵救兵？」 「學校電話宜家得番內線，打唔到出去...」原來電話早就失靈，Mrs Wong都苦無對策。 「我諗到一個可以安全落地下嘅方法！」Tony仔大喊。

乜話？Tony仔你講乜？

女神BB問：「下...？點...？乜方法...？」 阿鋒都問：「宜家一至四樓都係喪屍，點走呀？」 而華姐就慢慢平復緊心情，將注意力放係Tony仔度。





我都好疑惑：「係乜方法...！？」 「老師，我地學校究竟有乜地方有電話？」Tony仔問Mrs.Wong。 「所有樓層嘅特別室都有...」Mrs.Wong回答。 「係咪部部都好似音樂室個部咁響？」 「係...嗚..係呀...每部都有...揚聲系統..嗚..」華姐代答。睇嚟佢已經接受咗事實，平復緊心情。 「咁就得，我地只要用電話打俾位處下層嘅特別室，將班喪屍引落去，到二樓嘅時候就打番上嚟高層，喪屍自然被引番上嚟...」Tony仔計議。 「睇你唔出原來你咁聰明...」阿鋒用欽佩既眼神望住Tony仔。

Mrs Wong依舊冷靜回答：「好，我地跟Tony仔嘅方法嚟做。」 阿鋒突然喺房內翻箱倒櫃搵野 。 「你做緊乜呀？」我問。 「搵緊盒火柴囉...」佢回答。 「用嚟做乜？」Tony仔問。 「唔好理啦，幫手搵下。」阿鋒繼續摸黑翻箱倒櫃。 「屌，依度咪有囉，咁大盒都睇唔到...」Tony仔走向講臺，穩到一盒火柴。 「眼大睇過龍，Sor囉...」 華姐強忍傷痛，變番女強人：「咁我地行動...啦...」 Tony仔附和：「係，最好快d。」 女神BB睇落幾驚，似乎佢仲未接受到現實，始終佢只係個天真嘅女仔，對面前震撼嘅現實接受唔到係無可厚非。 「咁我地開始！」Mrs Wong示意我地要準備好。

嘟嘟-嘟嘟-嘟嘟。。。電話接通咗。

我地清楚聽到三樓嘅地理室響起好大嘅鈴聲，喪屍開始聯群結隊，衝向三樓。

我地一行人開始從左側後樓梯落去。

手機無電。我估依家應該係夜晚嘅11，12點，街上同對面大廈都停晒電，無咩燈光既街道真係好暗... 劃— 火點著咗，平時上堂嫌佢易折斷，依家反而大派用場。 「幾醒喎...」我低聲讚賞阿鋒。 「好似你咁蠢，死得啦...」雖然未脫險，阿鋒仍然忍唔住反諷我。我噗哧一笑。

我地落到四樓，返入音樂室。

室內嘅野無變動，睇嚟無喪屍入過嚟，我慢慢閂門，喺門上嘅小窗度睇水。





Mrs Wong指示Tony仔去打電話，而佢就搵咗四、五支金屬鼓棍，分發每人一支做護身符。

我地屏息等待喪屍向一、二樓進發。

呀...呀...吼呀...卡卡卡...嗚嗚嗚
...嗷嗚... 鈴鈴鈴，鈴鈴鈴，鈴鈴鈴

喪屍嘅嘶吼聲好凌厲而嘈雜，令鈴聲都變得細聲。
------- 我地順利落到地理室。

依家喪屍都集中喺一、二樓。

Tony仔攞起電話，向五樓嘅電話撥打。 「弊，大鑊，計錯數...」Tony仔突然懊惱地喊。 「乜事？」我比佢嚇到心都黎一黎。 「我地啱啱一直只係盲目衝落嚟，無將5樓部電話變番待機，宜家打係打唔通，一定要有人上去吸番好部電話，變番待機先打得通。」Tony仔解釋。 「我去！」我講：「我自己去！」我諗起生死未卜既阿龍。 「阿駿唔好住，再諗方法啦...」Tony仔搔破腦袋。 「唔係，我對唔住Mrs Wong，佢想幫我地但係我就打佢...」我內疚。 「駿同學你...唔好咁做...」Mrs.Wong勸阻我。 「對唔住Mrs Wong，啱啱我失控咗，等我將功補過...」我道。 「...等我去，我係大人，有責任保護你地....」Mrs.Wong企出黎。 「唔得，我過唔到自己，我已經睇住阿龍犧牲，我唔想再見到有人離開...！」我望住企係一邊既華姐。 「阿駿...」女神BB都呆咗。 「唔好，你仲後生，我都幾十歲，有乜所謂...？」Mrs Wong依然想我留低。 「唔好阻我啦，Mrs Wong！」我衝向門口。 「唔好呀...！」女神BB挽留我。 「喂，唔好！」阿鋒大喊。 「傻仔...」華姐內心五味雜陳。





我推開地理室嘅門，頭也不回地跑上5樓...