凶港: （5）
音樂室... 音樂室！
係喎，音樂室有電話喎！ ----------- 「Good morning Mrs Wong...」
「sit down please.」 我第一日番中學，上嘅第一堂，就係音樂堂。而學校唯一嘅音樂老師，就係面前和藹可親嘅Mrs Wong。 「各位同學，宜家我會俾張紙你地，寫下你地自己嘅目標係乜，跟住就會搵人出嚟簡報下。」Mrs Wong笑住咁講。
始終初嚟報到，仲要喺咁多位同學簡報，大家難免有d緊張。
鈴鈴鈴，鈴鈴鈴，鈴鈴鈴。。 電話響得好大聲... 如果靜起上嚟，分分鐘大聲到成間學校都聽到... 本來極其緊張嘅我心入面都「哇」咗一聲。
Mrs Wong行去音樂室嘅角落，攞起咗話筒嚟聽...... 而我地亦繼續寫嘅手頭上嘅目標... --------- 「係喎！音樂室！」我終於醒起。
阿龍恍然大悟：「Tony仔你真係醒喎，咁都俾你諗到！」 Tony仔繼續講佢既計畫：「我地只要搵人，跑去音樂室打電話，或者會有一線生機...」 阿鋒插嘴問：「但係電話唔係斷晒網咩？仲有得打？」 Tony仔擺出一副自信嘅樣：「學校用嘅係有線電話，如果有機會仲可以用到嚟打電話...」 「得唔得架？」阿龍狐疑。 「信我......」睇得出Tony仔都係覺得呢個計畫只係五五波。
砰! — 砰！ 「哇！」我彈咗一下。 「係咪槍聲嚟？」阿鋒急問。
走廊嘅喪屍都俾出面嘅巨響引走。 「趁宜家，我地衝過去音樂室啦！」Tony仔急促咁講。
我悄悄定神：「好，我同你一齊去！」 「我陪埋你地，多個人多個照應！」阿龍拍拍胸膛。 「唔好啦龍，好危險架...」華姐擔憂。 「唔使擔心，我應承你，實番嚟嘅，而且阿鋒喺度，唔使咁驚。」阿龍安慰佢道。 「好啦...唔好咁搏呀...」華姐唔捨得鬆手。
女神BB突然拉住我，弱弱咁講：「阿駿，你...你都要小心d...」 我個心係咁跳，但係我知我應該認真d，唔好再拘泥兒女私情。 「我，我會番嚟架...」 「唔...唔...」 「阿鋒，同我睇實女神BB。」我囑咐阿鋒。 「得啦，你要小心呀，傻下傻下！」阿鋒拍晒心口咁講。 ------- 「準備好未？」tony仔吞咽一下口水。 「準備好晒啦！」我鼓起勇氣。 「搞掂！」阿龍擺出格鬥姿勢。 「咁出去架啦...」Tony仔慢慢將手放係門柄。
我地三人打開房門，走廊空無一人。
成個校園好安靜，靜得恐怖。
我地躡手躡腳，沿住走廊去到後樓梯，上到去位於四樓嘅音樂室。
咔嚓。
門無聲無息咁打開咗，空無一人，部鋼琴打開咗。睇嚟Mrs Wong喺lunch前嘅最後一堂都教緊書... 「電話呢Tony仔？」阿龍細細聲問。 「喺鋼琴隔離呀...」Tony仔答。
我看守住門口。同時不斷留意佢地既情況。 「搵到啦！」阿龍興奮地道。 「睇下用唔用到...」Tony仔湊上前。 「無呀，唔work呀！」阿龍嘗試撥號，奈何只係一堆雜訊。 「等我嚟整整...」 音樂室入面好安靜，只係得佢地修理嘅聲... 「搞掂啦！」搞左一排，Tony仔如釋重負咁講。 「哇你整咁鬼耐，人都死啦...」我真係擔心班喪屍隨時返黎。 「要駁番入內線好麻煩架...」Tony仔解釋 。 「都唔知你講乜...神神化化咁...」 「咁宜家打俾邊個好？」阿龍問。 「打俾差佬啦！」Tony仔。
我插嘴：「差佬？應該死清光啦...」 「係喎，出面咁嘅時勢，仲邊會有人聽電...」阿龍咕噥。
鈴鈴鈴，鈴鈴鈴，鈴鈴鈴!
WTF !？點解有人會打電話嚟？
唔通出面仲有人？
好大聲呀！好嘈呀！停呀喂！我地既心頓時涼了半截。 「點會咁架Tony仔？」阿龍失措。 「我點知呀？」Tony仔都亂左陣腳，唔知發生咩事。 「快d cut線啦！」我焦急。 「。。。下 !!?」平時冷靜既阿龍都失左方寸。 「班喪屍聽到呀！」我大叫。 --------- 說時遲，那時快。
門口右側走廊已經出現幾隻喪屍嘅身影！ 「快d cut線！快呀！」我驚呼。
然而，Tony仔不但唔cut線，仲要攞起咗嚟聽。「喂，你係邊個？」佢大喊。
白痴仔!! Tony仔突然面色一沉。
阿龍急問：「邊鬼個嚟架？累死我地啦！」 「Mrs Wong...」佢面色迷茫。 「乜話？Mrs Wong仲未死？」我錯愕。門口個幾只喪屍不斷尋覓我地既蹤影。 「佢叫我地上509室，佢宜家喺個度...」Tony仔望住我。
我焦急：「宜家點樣走呀？出面d喪屍嚟緊啦！俾佢累死啦！」 阿龍突然講咗句：「你地走，我去引走佢地...」 我竭力阻止佢：「你係咪痴咗線呀？你一個人點引？你會死架！你死咗咁華姐點呀？」 「我係班長，我唔做邊個去做！幫我同阿華講，我係衰人，應承佢嘅野做唔到！」阿龍咬牙切齒。
砰！
阿龍推門而出！ 「走呀！走呀！」佢大嗌，一直向喪屍嘅方向跑 。
我扶起呆住咗嘅Tony仔：「起身啦！唔好再呆啦！」 我地兩人奪門而出，向左側走廊，後樓梯個邊搏命跑，係視線之中，阿龍嘅身影越跑越遠，消失喺黑暗之中... 我從走廊向下望，一樓至三樓已經堆滿咗喪屍...
303室嘅門口打開咗...... 「NOOOOOOOO!!!」我崩潰咁大嗌！
大群喪屍涌入303室... 華姐...！
阿鋒...！！
女神BB...！！！ Tony仔打咗我一下：「走啦，唔好再望啦！」佢不忍想像落去。
我地兩個繼續跑上5樓... 女神BB... 天呀，點解？點解要咁殘忍！？ ---------- 我地跑上咗5樓，到咗509，黎到化學室嘅門前，猛力打開門。 「阿駿，Tony，你地無事就好啦...」Mrs Wong果然喺度，佢望落去好憔悴。
我一拳打咗落去Mrs Wong度。
我未試過咁憤怒，一向尊師重道既我都估唔到自己竟然會咁做。 「屌！一日最衰都係你，累死我地啦！」我咆哮。 「你痴咗線呀？」Tony仔急忙拉開我。 「你個死人電話咁大聲！引晒班喪屍嚟！我地班friend死晒啦！你開心啦！」一諗起身處險境既阿龍，華姐，阿鋒，女神BB..... 我歇斯底里咁亂嗌，亂揮拳。 「咳咳...駿同學，你嘈都無意思，冷靜，坐低等陣，咳咳...」睇嚟Mrs Wong食我嘅一拳都幾傷 。 「冷靜？坐低等？頂你個...」我正想再揮多一拳。
咔嚓... 門打開咗... 究竟係邊個？ 「阿駿！」