凶港: (7)

呀...呼...呀..... 平時跑上五樓，三十秒都唔使。

宜家，我竟然覺得有一世咁長。

樓梯好黑，連梯級都望唔到。 「嗷呀！」一隻喪屍喺梯間彈出。

原來有漏網之魚，佢一手撲向我！ 「哇呀！救命！」 我起勢用手上嘅鼓棍打隻喪屍嘅身體，希望打到佢痛而縮手。

而佢無停止攻擊我嘅跡象。





救命！搵人救我！ 「嗷呀，嗷...」 碰!!!! 突然有人用重物硬生生咁打咗落隻喪屍度，隻喪屍個頭爆開，停止咗活動，而我就被濺到成身都係血... 邊個？係阿鋒? 「呼，好險呀，起身啦！」救命恩人同我講。

佢係邊個？把聲咁熟既? 「你唔認得我？」救命恩人笑說。

我仍然驚魂未定，加上天色昏暗，我睇唔清楚佢個樣。 「屌，我係軒神呀。」救命恩人笑道。

軒神？邊個軒神呀？

唔。。。。。 噢噢噢！ ------------ 升中派位放榜日。





我好緊張嘅坐在喺位，而老師就開始派個張決定我一生嘅派位結果。

我小學個陣好內向，除咗阿鋒之外班上好多同學都唔熟，好似邊緣人咁，即使有小組活動合作過嘅人，我都唔記得晒佢地叫乜名。

拍！

我身後嘅同學拍咗我膊頭一下。 「唔使咁緊張，開心d...」佢一臉輕鬆。 「下...你點知？」我詫異。 「睇你個樣咁緊張，一定驚派得差啦...」佢一副"我無所不知"既樣。 「你...係邊個？」我印象中好似無見過佢。 「下？你連我都唔識？」佢吃驚。 「...」我對佢既自戀感到無語。 「我叫阿軒，叫我軒神都得，軒神係我花名，因為我係班上嘅男神。」佢自我介紹。 「哦...軒神...我...我叫阿駿...」我回應。

屌，咁自大嘅。我心想。





結果我派到嚟宜家依間中學，而軒神亦如是，但係咁多年無同班，我都漸漸唔記得咗佢.....


----------- 「你係軒神！？」我猛然醒起。 「係呀，呼...差d死呀你！」佢欣慰地道。 「我...跟我上5樓啦，快！」有佢係度至少多個夥伴。 「好！」 我地摸黑行上5樓。 「點解你會無啦啦出現..？」我好奇問。 「我啱啱一直留喺課室度，點知突然出面聽到有人大嗌，出走廊望原來係你同三個男仔係度推住度閘...後尾仲見到一大班個樣勁似喪屍嘅野入咗嚟，所以咪避喺課室...」佢解釋。 「咁你點解會無啦啦落嚟？」 「我突然聽到電話鈴聲響，仲要勁大聲，我咪落嚟睇下係咪有人生還...」 「但係你，啱啱點知要打爆佢地個頭？」 「我有睇喪屍片咪試下囉，點知見效！」佢自豪。 「我地繼續上去啦！」世界末日都改變唔到佢既自戀。 ----------- 化學室嘅門仲喺打開咗。

我急忙衝入去，將電話吸番原位。 「你做乜鬼呀？」佢疑惑。 「我地用緊依個方法落地下搵路走...」我將Tony仔嘅方法解釋咗一次俾佢聽，佢明白。 「咁宜家應該點？」佢續問。

鈴鈴鈴，鈴鈴鈴，鈴鈴鈴。。。 電話響咗，睇嚟Mrs Wong打緊上嚟5樓，鈴聲震耳欲聾。 「哇真係好大聲！」軒聲急忙用手塞住對耳。 「快d走，班喪屍嚟啦！」我大喊。

我地跑出化學室，向左側後樓梯急速跑去。

嗷呀..！嗷呀！呀呀⋯⋯ 喪屍開始向5樓進發... 「噫...！」我驚恐。 「乜事呀阿駿？」佢大呼小叫。 「你睇下..」我指住前方。

原來左側樓梯有幾隻喪屍上緊嚟，亦似乎留意到我地。 「郁手啦！」軒神細細聲講。 「郁手？」我猶豫。 「打勁佢地呀！」佢大喊。





軒神一馬當先，抄起地下一條鐵通，向喪屍進攻。 「幫手啦！」佢分身不暇。 「哦...哦...」自災變以嚟，我都未見過主動去攻擊喪屍嘅人。

於是我用手上嘅金屬鼓棍，向喪屍頭部攻擊！

嗷呀..！嗷呀..！ 殺呀！

依一刻，我享受緊打落去嘅快感。

噗通，噗通... 話咁快個幾隻喪屍，就俾我地兩個打死咗。

Yes！你地仆街食肉怪獸，抵死啦！

快感之後，我突然呆左。

喪屍身上著住嘅，係我地學校嘅校服... 我打死咗同學？一旦有機會有解藥救番佢地，咁我咪即係殺咗人？





我掙扎緊...望住身上嘅屍血，我覺得自己好污糟，係一個不折不扣既殺人犯。 「醒...」
「醒呀...」
「醒呀...！」 軒神大大聲叫我，我定過神來。 「我...我殺咗人...」我呢喃。 「佢地已經死咗，唔再係人啦！走啦！」佢拉扯我校服。 「...」 ------------ 我地向地下跑去。

到達地下操場，向上一望，三樓以上樓層都堆滿咗喪屍，有d更被迫到跌咗落街，跌到斷手斷腳，但依然活動緊。

阿鋒一行人都已經落到樓下，我地聚集埋一齊。

女神BB見到我，過嚟緊抱住我。 「點解...你成身血..嘅？你受咗傷...？」女神BB擔憂地望住我身上既血。 「唔係，唔使擔心，我殺咗其中一隻姐...」我默然回答。

女神BB面上露出不安嘅表情。

我摸住女神BB個頭，話：「我...啱啱撞到軒神，佢無死到...」 「係咪小學果個阿軒？」阿鋒插嘴。 「係呀...」軒神出聲回應。 「我地要快，走啦！班喪屍好快會落番嚟！」Mrs.Wong提醒。 「我地應該點做？直接行出去？」華姐開口。 「唔好，我地去canteen先！」Tony仔衝口而出。 「點解？」眾人異口同聲。