凶港: （4）

「仆街...」我都唔知應該用乜嚟表達。 「仆街啦！果個咪阿龍同華姐？」阿鋒大驚。 「後面個班人......」Tony仔都呆左... 無錯，個一大班人，正正係我地睇電影入面個種：喪屍! 「快d落去幫佢地啦！仲睇？」我大吼，一支箭咁跑落大門口。 ------- 「閂門，閂門呀！」阿龍跑入校門，邊閂門邊大嗌，佢地幾人已經入咗校園範圍入面，我完全呆晒，而大群喪屍諗住衝入嚟。 「屌你，阿駿阿鋒仲唔嚟幫手頂住度門！」阿龍咆哮。

我二話不說，跑上前幫手頂住度鐵閘：「華姐，帶埋女神BB上我地班房度避，我地喺度頂住！」阿鋒同Tony仔都過咗嚟幫手。 「阿駿，究竟依d係乜嚟架？打極都唔跌低嘅？」阿龍氣喘吁吁。 「屌，你出少句聲頂住先啦！」我畢竟手無縛雞之力，就黎頂唔順。

阿鋒邊頂邊講：「哇，好多呀，無力啦！」 校工姨姨啱啱去完洗手間番嚟，見到咁嘅情況都吃咗一驚：「佢地係乜野人呀？做乜要頂住道鐵閘呀同學仔？」 喺鐵閘間，我隱約見到幾個熟悉嘅面孔，係我地班嘅同學，但係佢地全部都變晒做無意識既喪屍... 喪屍群越嚟越多，我地四條友嘅力氣就越嚟越少......... 弊，遲早頂唔住！ 「唔夠力啦！」Tony仔終於按捺不住，放左手。 「你條仆街IT怪雞！」阿龍大怒。 「阿駿，呼...下一步...點...呼，做呀？」阿鋒都逐漸無力。 「我地一放手，就跑上303室，要快！」我孤注一擲。

死就死啦！

我地一放手...
喪屍一擁而入!!!!! 「跑啦屌！」我大喊。




「快呀Tony仔！」華姐一邊望住後面一邊跑。
「阿鋒跟住嚟啦！」阿龍。
「哇頂！」 喪屍大量涌入，我地四人衝入樓梯，向三樓逃去。

校工姨姨仲履行緊佢職責，諗住趕走班人：「喂，你地班人搞乜...喂....你地做乜？喂？呀～！好痛呀！呀！！！」 姨姨把聲漸漸消失，而大部分喪屍就因為佢嘅叫聲而吸引咗過去，幫我地拖延咗少少時間... 但係仲有兩隻喪屍尾隨。 「我唔打番你一拳我唔叫阿龍！」阿龍已經厭倦咗逃跑，佢一腳向其中一隻喪屍踢，踢咗佢落樓梯，而第二隻喪屍窮追不捨，捉住咗阿龍隻腳... 「阿龍記得小心唔好俾佢咬！走先！」Tony仔大嗌，同阿鋒繼續拔足狂奔上3樓。

我用阿龍把遮一下打落隻喪屍度：「死啦怪物！」 喪屍甩咗手，阿龍即刻補多腳，另一隻又跌咗落樓梯。 「快d起身啦阿龍！」我心急。
「得啦仲使你講！？」阿龍即刻起身繼續奔跑。

我地即刻轉身繼續奔上3樓。 -------- 我同阿龍衝入303室，房中已經落晒百葉簾，閂晒所有窗，睇嚟華姐都十分謹慎。一開門，見到女神BB，華姐同阿鋒，Tony仔，不禁放下咗心頭大石。





我地即刻鬆咗口氣，緩緩坐低。 「噓，唔好俾出面聽到..」Tony仔細細聲話。

華姐見到阿龍，就好似十年無見咁摟住佢：「擔心死我啦...仲以為你會死...」 「唔會，我點都會番嚟搵你嘅傻婆...」 好一段感情，係喎，女神呢，佢點呀?

女神身體不斷發抖，我上前問：「女神BB，你點呀？唔好嚇我喎...」 「無...無..事...」佢睇落仲喺好驚，心有餘悸。 「唉，呼，逃過一劫...」阿鋒癱軟在地。

喺百葉簾隱約見到幾隻喪屍已經喺走廊出面徘徊... 雨，仲落緊...空氣瀰漫住強烈既血腥味。

依場雨帶嚟嘅，唔只係濕冷天氣，仲帶嚟咗呢場人間煉獄... ------ 天慢慢入黑，雨，都好似有慢慢停低嘅跡象... 我地一行人繼續留喺303室度，靜候出面嘅喪屍離開。





女神BB終於定番神，摟住我隻手問：「阿駿，出面果d係乜嚟架？」 「喪屍...」我無自信咁回答。 「喪屍？」女神好希望只係我玩緊佢。 「係，係你睇恐怖片入面個種食人喪屍呀...」Tony仔咕噥。 「點...會...嗚嗚...咁架...嗚嗚」女神忍唔住哽咽。

女神BB喊咗出嚟，但係佢都抑制住自己嘅喊聲，以免引起喪屍注意。

我好心痛，佢每喊一聲，我就痛一次，痛恨自己啱啱無同佢一齊出去，佢仲要差少少死... 「唔好喊啦，抖下先...」我安慰住女神BB，而佢亦慢慢平復心情。

華姐終於開聲：「Tony仔，究竟出面發生咗乜事？」 華姐又變番平時嘅女強人mode。 「我唔知呀，我同阿駿阿鋒啱啱喺禮堂聽部收音機，聽到話係暴動喎，但係估唔到係生化危機...」Tony仔無可奈何地道出真相。 「咁我地點呀？留喺度等死？」華姐質問。 「唔係，我地只要去校務處，用佢個電話求救咪得...」Tony仔建議。 「你係咪傻咗呀Tony仔？校務處喺一樓，三樓都有喪屍，一樓點會無？」阿龍亦加入討論。 「錯，仲有一個地方有電話！」 阿鋒講咗一句，我地靜晒。 「邊度？」我問， 「音樂室...」