《天堂之上 - Upon The Heaven》: 第十四集: 舞會
阿偉為著他的作品，忙得不可開交，到處搜尋有用的材料和資料。忙活了整個星期後，阿偉終於備齊所需物品，開始著手製造作品中最重要的一個部分，太陽能發電裝置。主管向阿偉一組人派發了一封信，應該是由國王辦公室寄出的。原來是國王邀請參賽者參加化妝舞會的邀請信，阿偉和組員都獲邀參加，阿偉知道了消息後開心得整天都在傻笑。主管說這個機會十分難得，每個部門只有一組人可以參加，他對阿偉的構思比較有信心，所以推薦了他。
「阿偉，收工返嚟快啲換衫，就嚟食得飯喇。」澄媽在廚房說。
「聽講你參加咗國王舉辦嗰個比賽喎，點呀，準備成點呀？」天冰坐在沙發上問。
「我已經準備好所有資料同埋需要嘅材料，宜家差試驗嗰部分，嚟緊會完成埋佢架喇。仲有……俾啲嘢你睇…」阿偉拿出請柬。
「嘩，國王邀請你去佢嘅派對！呢個機會好難得架喎，你真係好彩喇！」天冰瞪著眼說。
「佢上面寫可以帶埋屋企人一齊參加，我想邀請你哋一家人同埋我一齊去。」阿偉說。
「冇問題呀，呢個機會咁難得，請假都要去啦！」天冰開心的說。
「咁就好喇，同你哋一齊去唔使我咁尷尬，呢啲咁隆重嘅場面，老實講我都唔係太習慣。」阿偉摸著頭說。
「一陣同老婆仲有阿澄講先，佢哋一定會好開心喇…」天冰說。
「可唔可以唔好同阿澄講住先，我想俾個驚喜佢…」阿偉說著。
「好啦，咁我保持神祕。」天冰將手指放到嘴唇邊，一拉，以示封口不說。
一會兒後，四人便如常地吃晚飯，過程中阿偉一句也沒有提起比賽的事，只是聊著家常事。
「阿澄，波比好似搵你喎，你快啲去莊園睇下佢啦！」阿偉用藉口令阿澄到莊園那裡。
「波比？佢係咪肚餓呀？」阿澄馬上去到莊園看看波比。
阿澄到了莊園，看看波比。見到波比嘴巴上叼著一張卡，便取下來看看。
「化妝舞會邀請信…？國王邀請各位參賽者參與派對，希望大家踴躍參加…？」阿澄提高音調地說。「阿偉，係咪真架？國王真係邀請你去佢嘅派對？」
「係呀，我今朝先收到呢個消息，點呀，唔信呀？」阿偉笑著說。
「咁係咪可以帶埋我去呀？」阿澄滿懷希冀地說。
「係呀，我諗住請埋你哋一家人去呀，冇咁尷尬呀嘛…」阿偉說。
「好嘢！我終於可以去國王嘅派對喇！多謝你呀，阿偉！」阿澄燦爛的笑著。「我要返入房諗下著咩衫去先得。」
「好啦，你慢慢諗啦。」阿偉笑著說。
今夜，阿澄在房間裡找尋著參加舞會的衣服，她將所有衣服都拿出來，堆在床上，逐件逐件的放到身上看看，完全沒有任何睡意。阿偉回到自己房間，躺在床上，回想起剛才阿澄天真的笑容，不禁打從心裡面笑了一笑：「傻瓜」。
過了幾天，終於到了化妝舞會的日子，傍晚時間，天冰一家人都已經換好衣服，準備出席派對，天冰穿上了前年參加巡邏學員畢業禮的那套西裝，結好領帶，樣子十分瀟灑。澄媽準備了一套淺藍色的晚裝連身裙，配以瑪瑙項鍊，頭上戴著羽毛頭飾作點綴，樣子十分大氣，溫文儒雅。因為今晚阿偉需要在研究所繼續飛機的工作，所以阿偉將在宴會場外與阿澄一家會合。準備好一切後，阿澄一家便向宴會場地出發，阿偉也在完成工作後出發。
「阿偉，我哋喺呢度呀！」澄媽向著阿偉招手。
阿偉看到了澄媽，並慢慢走過來。
「澄媽，你今晚著得咁靚，差啲唔認得你添。」阿偉讚美著。「天冰哥，你呢個造型，一個字，英！」
「阿澄呢？去咗邊呀？」阿偉東張西望的問。
「佢去咗洗手間…返嚟喇！」天冰指著阿偉身後。
阿偉轉過身去，看到了阿澄，立刻眼前一亮。只見阿澄身穿一襲紫色的長裙，頭上戴著一根鑲著寶石、閃閃生輝、銀色的髮夾，擱在左前額的髮端上，胸前佩帶著一根心形的水晶胸針，紫色長裙下，是一雙雪白的高跟鞋。青澀的兩腮塗上薄薄的淡粉紅，配搭輕柔的粉底，微微的眼影，這份青春氣質，已經可以緩緩的散發出來。阿澄的天真和稚氣，實在令人沉醉。
「阿澄，今晚隆重打扮喎，同平時嗰個傻妹形象真係唔同曬。」阿偉開著玩笑。
「哈，梗係啦，本小姐天生麗質，不嬲都靚開架啦！」阿澄自豪地說。
「仲講，入去啦。」天冰敲著阿澄的頭頂。
阿偉一行四人緩緩進入宴會廳，只見禮堂的牆上都貼滿了好像守護神的裝飾，牆壁之上，是一幅幅馬賽克的七彩玻璃窗。天花上還有一盞巨大的旋轉水晶燈，將色彩斑爛的光線，照射在場上的每一個角落。場中央是一個特大的舞池，宴會尚未開始，已經聚集著一雙雙的男女，伴隨著輕鬆的樂曲，緩緩的跳著舞。
「阿偉，你睇下，嗰個咪係國王同埋女王？佢哋都喺度跳緊舞呀！」阿澄指著那邊一對舞者。
「佢哋真係好相襯呀。」阿偉說。
「女王真係好有氣質，好高貴，著衫又好睇喎！」阿澄羨慕著。
「係呀，跳舞又叻喎。你睇下，佢哋一進一退咁樣，真係好合拍。」阿偉沉醉地看著兩人的舞蹈。
「你睇下，嗰邊仲有嘢食添呀！正呀！」阿澄立刻醒神過來。
「一見到嘢食你就開心架喇，好啦，過去睇下啦。」阿偉被阿澄拉著。
「你睇下，幾多嘢食！王室嘅菜餚真係唔同啲，外貌都已經好吸引！」阿澄望著滿滿的菜餚說。
「失禮曬…唔好意思…你哋繼續…」阿偉替阿澄向旁人說。
不久，國王與女王到台上向來賓問好，以及感激大家的到來，之後音樂便再次響起，來賓們都雙雙對對的走到舞池中，輕輕地跳起舞來。
「老婆，我哋都出去跳舞啦！」天冰拖著妻子的手，一起走到了舞池。
「阿澄，你唔好淨係望住嗰邊啲嘢食啦，我哋出去跳舞…」阿偉伸出手邀請阿澄。
「咁…跳完舞先食啦。」阿澄站起來，視線終於離開了那邊的食物。
阿偉拖著阿澄來到了舞池的一邊，兩人跟著輕快的音樂，緩緩地跳起舞來。不過，可能是疏於練習的關係，兩人經常互相踩到大家的鞋子，跌跌撞撞的跳著舞。
「阿偉呀，你成日踩到我，衰人！」阿澄鼓起腮子說。
「你仲好講，明明係你踩我！」阿偉替自己辯護著。
兩人踩著踩著，開始熟悉了應該怎樣跳，互踩的情況開始好轉起來，過程也慢慢變得順暢起來，兩人越跳越順利，感覺也越來越親密。
「你…做咩塊面咁紅架，係咪同靚仔跳舞，怕醜呀？哈哈！」阿偉望著阿澄的眼睛。
「靚仔？喺邊度呀，點解我睇唔到嘅？」阿澄羞澀地邊笑邊說。「你塊面夠好紅啦，仲話我…」
「可能跳舞跳得熱姐…」阿偉尷尬的說。
兩人互相凝望著，在舞池中盪來盪去。阿偉不時說說笑話，緩和一下氣氛。不久，音樂停下來，眾人便各自跟親友集合，一邊聊天，一邊吃著小食。阿澄便心急地帶著阿偉到食物桌旁，因為阿澄力氣不夠，便把阿偉拉過來替自己捧著食物。兩人各自捧著一大盤食物，便回到了座位上，與天冰和澄媽分享。
「嘩，你哋拎咁多嘢食，我哋點食得曬呀。」天冰說。
「唔怕，阿澄佢食得曬架！」阿偉拿阿澄開玩笑。
阿澄弄了個鬼臉，放下餐盤，眾人開始慢慢拿取食物到自己的碟子，邊聊邊吃。
「咦，呢個咪係…甘草布丁！」阿偉看著阿澄碟子內那一小塊食物。「我喺研究所餐廳食過架，係阿肚發明架，但係未正式上市架喎，點解會喺呢度食到嘅？」阿偉好奇。
「阿肚？係邊個呀？」阿澄問。
「鮑參翅哥哥呀，佢有個好大嘅肚腩嘛！」阿偉答。
「哦，肥叔叔呀嘛。佢係晴空之城最識食嘅人，佢開咗好多間餐廳架。」阿澄馬上明白了一切。
「點解你會知嘅？」阿偉問。
「嗰張邀請信有寫架…嗱，你睇下，宴會食品負責人：包琛賜。我同屋企人有時都會去佢嗰度食飯，同埋偷師架。」阿澄說。
「嘩，原來佢係負責國王飲食嘅負責人嚟架，唔怪之得佢間餐廳啲嘢咁好味啦。」阿偉恍然大悟。「偷咩師呀，偷食咋係咪呀…」
「食嘢啦你，咁多嘢講…你唔食嘅話……俾埋我食！」阿澄瞪著桌上的盤子。
「仲好講，你個嘴污糟咗呀。」阿偉拿著紙巾，替阿澄拭去嘴角的忌廉。「傻豬…」