《天堂之上 - Upon The Heaven》: 第十五集: 喪鐘
到了宴會的壓軸節目，幸運大抽獎的時間，今次的抽獎，獎品非常豐富。可惜，天冰一家只是抽中了一次參加宮殿花園嘉年華的機會，而甚麼大宅、房車、旅行等等，均與他們失諸交臂。派對結束後，大家都回到了家中。
「今晚玩得好開心呀，好耐都冇試過咁放鬆喇。」天冰坐到沙發上說。
「係呀，估唔到你都仲跳得下咁喎！」澄媽說著笑。
「唉，差好遠喇，以前可以抱起你添。宜家老喇，冇氣喇…」天冰嘆氣說。
「計我話，今晚收獲最大係阿澄…個肚仔喇！哈！」澄媽說。
「媽咪呀…唔同你哋講，我去沖涼…」阿澄回房找著衣服。
各人輪流洗漱、安頓好後，都回房休息了。半夜裡，阿偉入睡後，發了一個奇怪的夢，他看見一團白煙，迷迷糊糊的，迷霧後面有些東西看不清楚，可能是太累了，阿偉沒有力氣從夢境中逃離出來，故此，整夜也輾轉反側。
不知不覺，已經過了兩個多星期，阿偉父母都已經作好準備，替阿偉舉行一個得體的喪禮。所有該通知的親戚朋友和阿偉的同事全都已經通知了。當天早晨，偉爸偉媽穿著純白色的裝束，心情沉重的離開了家門。在巴士站與阿盈阿聲會合後，便一起乘車到殯儀館去。到達後，阿偉父母均在衣服上系上草帶，戴上草帽，準備接待到來的親戚朋友。禮堂門外放置著數十個花圈，都是阿偉親戚朋友送來替阿偉送行的。大門外亦放置了公眾吊唁冊，讓市民可以送別這位為香港航天作出偉大貢獻的英雄。這次政府代為舉辦的葬禮將不設瞻仰遺容時間，只有家屬可以房間隔著棺木送別阿偉。於是阿偉父母便到房間陪伴阿偉到最後一刻。
「阿偉，你去到另一個世界，都要做個好人呀，知唔知…」偉媽含著淚水說。
數分鐘後，偉爸偉媽從房間回到禮堂，十數位來賓已經在門外等候著，偉爸便請他們入內。只見禮堂中央放置著阿偉的照片，相中阿偉穿著太空衣，拿著頭盔，精神抖擻的望著鏡頭，這是阿偉接受太空任務前，在港航照的相片。兩邊放置著輓聯「範典永垂，遺徽永在」。
「一鞠躬，再鞠躬，三鞠躬，家屬謝禮…」主持人說著。
來賓都逐一向阿偉鞠躬，也慰問了偉爸和偉媽。一個小時後，來賓們都差不多來齊了，偉爸便打算向來賓們說一番話。
「偉爸偉媽…」在門口那裡站著一個人。
「局長？」阿盈驚訝地說。
這次葬禮的邀請名單是由委員會制訂的，可以推算九成是主席不希望在此看到這個被人辭退的「前局長」。
「偉爸偉媽，對唔住，我不請自來。不過我只係想同阿偉鞠個躬，之後我就走架喇…」吳局長說。
「唔緊要，嚟呢度嘅都係有心人，多謝你。」偉媽說。
「一鞠躬，再鞠躬，三鞠躬，家屬謝禮…」主持人說著。
「係喇，呢度係俾阿偉嘅帛金，小小心意，你哋收咗佢啦。」局長拿出一個信封，塞到了偉爸和偉媽的手上。
「局長…」偉爸眼泛淚光的說。「多謝你呀，對阿偉咁關心，你去嗰邊坐低喇，招呼唔到…」
「哦，好啦，節哀節哀…小心身體呀…」局長說。
阿盈和阿聲坐到了局長旁邊。
「局長，對唔住呀，之前我咁樣對你…」阿聲向局長道歉。
「冇事，嗰件事係我唔啱，其實你講得啱架，我真係太自私。喺呢段時間我一直都想為阿偉做返啲嘢，我已經盡咗力去補救，但係我嘅能力有限，最多只能夠做到咁多……」局長搭著阿聲肩膀說。
「局長，你話補救啲咩話……」阿盈有點疑惑。
「…總之…我盡咗最大嘅努力，阿偉明白就得啦……」局長欲言又止的說。
「係喎，港航宜家點呀？真係要結束呀？」阿聲問。
「你都聽到特首點講架啦，今次應該冇得傾架喇，算啦，整定嘅…」局長慨嘆。
過了一會兒，偉爸打算與各位來賓說一席話。
「各位來賓，多謝你哋來臨同阿偉道別，你哋嘅祝福，阿偉佢一定會收到。阿偉從好細個嘅時候，已經好鐘意航天、太空呢方面嘅嘢，佢小學嗰陣仲成日拎咗我用嚟上堂嘅書嚟睇，搞到我成日上堂都冇帶書。佢細個嗰陣好乖，中學嗰陣，因為幫助同學出貓，而被人記咗一個小過，我哋之後問佢，佢話佢唔識出貓，但係嗰個係佢最好嘅朋友，佢點都要頂硬上，結果貓都未出就俾老師發現咗…阿偉係唔係好傻呀？」偉爸說著回憶。
「仲有，佢大學嗰陣，參加咗港航嘅太空人訓練計劃，為咗攞好表現，佢日日夜夜都不停咁樣操體能，終於都俾佢得到機會係港航工作。過咗幾年之後，仲有機會上太空接受任務添，雖然結果唔成功，但係阿偉係我心目中，已經係一個成功嘅太空人，亦永遠都係我嘅乖仔…」偉爸哭著說。
說完，偉爸和偉媽便向親友一一道謝，感謝他們的到來。大家寒暄一番後，主持人將阿偉的棺木移到了禮堂前，讓大家送別阿偉。眾人都站起來，心裡面都祝福著阿偉，希望他可以安息。最後，工作人員替阿偉的棺木蓋上國旗和區旗，送回房間內，準備送往火化。
賓客漸漸散去，阿盈和阿聲就留在禮堂內，收拾地方。而偉爸和偉媽就伴隨著阿偉來到了火化室，準備送阿偉最後一段路。
「你哋喺心入面同阿偉講，叫佢安息，唔使掛住你哋，等佢可以無牽無掛咁走，之後就可以撳掣。」主持說著。
「阿偉，你要乖乖地呀，去到另一個世界唔使掛住阿爸阿媽架喇，你專心去做你鐘意做嘅嘢就得架喇，阿爸阿媽會永遠支持你架！」偉爸偉媽心想。
阿偉父母在心裡與阿偉道別後，靜下了一會兒，考慮清楚之後，一同走到了按鈕前，慢慢地按下去。阿偉便緩緩地跟著輸送帶，伴隨著來賓的祝福，與父母的冀願，進了火化室。主持人示意程序已經完成，偉爸和偉媽可以到外面休息一下。
偉爸和偉媽從房間出來，與阿盈和阿聲靜靜地坐在椅子上。
「噹噹噹…噹噹噹…」禮堂外的古剎鐘聲響起，示意儀式已經完成。
「阿偉…阿偉！」天冰叫著。「起身喇，你今日唔使返工咩？」
「天冰？你幾時入嚟架？」阿偉醒來說。
「啱啱入嚟，快啲起身喇，你返幾點架？」天冰催促著阿偉。
「唔係呀，我哋琴晚做過啲咩呀？我點解好似唔記得咁嘅…」阿偉摸著頭說。
「我哋琴晚咪一齊去咗國王嘅派對囉，你咁快唔記得嘅…」天冰回答。
「係咩…？係喎，頭先邊度響鐘呀，我聽到幾下噹噹噹，咁樣嘅鐘聲呀！」阿偉問。
「你個鬧鐘響呀，老友，仲唔起身…」天冰說。
「唔係呀，嗰啲鐘聲唔係鬧鐘聲嚟架，就好似係我耳仔邊響咁樣架，好清脆，好樸素架！」阿偉說。
「你唔好嚇我啦，你應該係琴晚攰得制，所以個腦咩都諗唔起啫。」天冰說。
「可能係啦。死喇，宜家咁晏架喇！我要快啲返去研究所先得。」阿偉衝往洗手間。
「澄媽，我今晚唔返嚟食飯喇！」阿偉衝出門口。