《天堂之上 - Upon The Heaven》: 第十三集: 競賽
經過了一個多星期，阿偉已經漸漸熟悉了日常的工作，亦與同事相處融洽，阿偉心中的憂慮也彷彿慢慢隱藏起來，將他的心思放在工作上面。某一天，阿偉的主管向阿偉介紹了一個比賽，希望他與同事們組隊參與。單張上印著「科技大競賽」「參加者必須設計自己的科技產品，作品必須新穎，及對社會有禆益。參加者有機會參與國王與女王舉辦的化妝舞會，比賽勝出者更有豐富獎品」。阿偉希望一展自己所長，便與同事組隊，打算參加這次比賽。今天下班後，阿偉回到家中，開始思考應該以甚麼作品參賽。
「咦，阿偉，你又瞓喺度…」阿澄看著躺在莊園草地上的阿偉。
「我有啲嘢諗緊啫。」阿偉說。
「去嗰邊瞓啦，我要同波比沖涼！」阿澄拖著波比到了阿偉面前。
「等我嚟啦，我好耐都冇同佢沖涼喇…」阿偉站起來。
「咁好啦，波比，你過去阿偉度啦，我出去睇下電視先！」阿澄將波比交到了阿偉手上。
「波比呀，乖，企定定呀吓…」阿偉正在打水。
「波比，你就好啦，咩都唔使諗，得閒就瞓下覺，沖涼都唔使自己郁手…」阿偉羨慕著波比的自由。
波比甩了甩身體，將水滴甩到了阿偉的衣服上。
「呀！你個波比呀，成日咁曳。」阿偉摸著波比的頭。
阿偉快手快腳的替波比沖完涼，波比便乖乖地回到草地另一邊玩著皮球。阿偉回到房間換了剛才被波比弄濕的衣服，之後再次走到莊園，坐在長椅上。電視節目播映完畢後，阿澄便到莊園找波比玩耍。
「咦，係幾快手喎，咁快沖完涼，叻仔呀！」阿澄對著波比說。
「梗係啦，我呢啲醒目架嘛！」阿偉自豪地說。
「邊個講你啫，我同波比講咋嘛！」阿澄摸著波比說。
「點呀，諗緊咩呀？」阿澄問。
「我俾張嘢你睇。」阿偉將比賽單張給了阿澄看看。
「嘩！好正喎……啲獎品！」阿澄眼睛發光地說。「你知唔知國王舉辦嘅派對幾難先至參加得到呀，如果我可以去就好喇，最好可以帶埋我爸爸媽媽去，真係諗起都開心！」
「有咩咁特別呀？」阿偉好奇的問。
「聽講到時可以食到晴空之城最好嘅菜式，仲可以跳舞，仲可以參加大抽獎，我喺學校聽人哋講，佢爸爸上年喺派對上面抽到間大屋，之後國王就送咗俾佢，其他獎品好似仲有車、旅行…具體我都唔係好清楚，總之就係好嘢啦。」阿澄流著口水說。
「阿偉！你嬴唔嬴到獎唔緊要架，最緊要可以拎到參加派對嘅資格，我想去見識下…！」阿澄望著阿偉說。
「但係呢，我宜家連用咩參加比賽都未諗到，你咁快諗到咁遙遠…」阿偉說。
「怕咩啫，你咁醒目一定好快諗到嘅…我同你打氣！加油加油！」阿澄高興的說。
阿偉板著面，望著阿澄。
「嗱，用你最熟悉嘅參加就實無死啦，係咪？」阿澄給了一個建議。
「我對機械比較熟悉囉，唔通整車咩，你哋呢度大把車！」阿偉說。
「呀，你咁鐘意望住個天，不如整飛機啦，咁你咪可以飛上去望到夠囉！」阿澄開玩笑的說。
「你哋呢度都有飛機啦，要創新喎，小姐。」阿偉敷衍的說。
「係喎，你哋有冇太陽能架？」阿偉好像想到了題目。
「咩係太陽能呀？關唔關太陽事架？」阿澄問道。
「太陽能即係用太陽光發電，推動機械，唔使用燃料架。我哋香港宜家都開始推行緊，慢慢我哋去旅行嘅飛機都轉為太陽能喇。」阿偉解釋著。
「咁厲害架，就整呢個啦，到時國王一定邀請你去佢個派對…！YEAH！」阿澄歡呼著。
「係喇，你自己慢慢FF下啦，我返房瞓先，費事理你。」阿偉起來說。
「等陣，你話咩F話？我唔係幾明喎…」阿澄天真的問。
「唉，傻豬！」阿偉在樓梯下輕聲說。
「都唔知你講咩…波比你明唔明呀？」阿澄繼續與波比玩耍。
另一天早晨，阿偉回到研究所，帶著他的創作意念與同事分享。在午飯時間，到研究所餐廳討論。
「各位同事，我今次想做一架唔使燃料都可以飛嘅飛機，我就叫佢做太陽能飛機，佢喺有太陽光嘅情況下就可以飛，同太陽能電筒唔同，冇光嘅話，佢都可以用之前儲落嘅能量，繼續推動佢飛行，呢個設計喺晴空之城應該就未有人做過……」阿偉一口氣地講了數分鐘。
「喂，大家傾得咁熱烈嘅，一定唔係傾緊公事嘅。」阿賜走過來。
「你好呀，阿肚，我哋打算參加國王舉辦嗰個科技比賽。」阿偉說。
「我唔係叫阿肚喎，你係咪發燒……」阿賜摸一摸阿偉的額。「哦，你笑我個大肚腩…」
「嗱，鮑參翅…就係差個肚啫…」阿偉笑著說。
「唉，都唔知你講咩…」阿賜說。
「點呀，諗住用咩參賽呀？」阿賜問。
「太陽能飛機！」阿偉自豪地回答。
「聽個名好似幾勁，不過我唔知係咩嚟。」阿賜說了實話。
「嗱，我解釋俾你聽，我哋用一啲半導體……。」阿偉一口氣說了幾分鐘。「點呀，我講咗咁耐，你明唔明架？」阿偉問。
「點解我每個字都明，連埋一齊就唔明嘅？咁複雜架，點解你會識嘅？唔通你係外星人？」阿賜笑著說。
「啱呀，我係外星嚟架！哈哈。」阿偉說。
「我煮餸就叻，科技我真係唔識咁多。雖然我唔知你講咩，不過應該有得諗嘅。咁啦，今日教咗我咁多嘢，請你哋食啲嘢啦！」阿賜到廚房拿出一盤食物。
「咩嚟架，綠綠地色既？」阿偉望著盤子問。
「呢啲係金銀花甘草布丁，係我嘅新發明，宜家仲喺研究當中，你哋食完俾啲意見。」阿賜派著布丁說。
「好香喎，清清地咁樣，最啱就係食完飯食喇。」阿偉讚賞著。
「你哋啱食就得喇，好啦，研究成功！嚟緊我仲有好多新菜式會出爐架，到時幫幫手同我試下味呀！」阿賜笑著說。
「呢排咁多新發明，係唔係有啲咩開心事呀，講嚟聽下？」阿偉問。
「遲啲你咪知，記得要多啲落嚟試菜呀。」阿賜說。
阿偉回到了研究室，開始著手找尋原料，研究如何製造他的大作。同事們便協助阿偉先搜集材料，製造飛機的骨架，以及外殼。他們每天完成少許，漸漸地，飛機的雛形已經做好了，這是一架小型飛機，只能載兩個人，兩邊機翼的骨架上，還預留了兩處地方安裝螺旋槳，協助飛機起飛。阿偉每天回家，阿澄都會第一時間走過來詢問飛機的研究進度，這當然不是因為她關心阿偉，而是因為她對於國王的派對非常緊張。原來暗地裡，阿澄已經搜集了有關派對的事情，但阿偉並不關心這些事情，只是一心一意地想盡快完成他的作品。他心裡渴望，有一天，他能夠乘著飛船，回到香港，與父母和朋友相見，但是，這一天是否真的會來臨呢？