《天堂之上 - Upon The Heaven》: 第十二集: 交代
幾日後，阿盈和阿聲終於接到委員會帶回「阿偉」遺體返回香港的消息，心情也安定下來。兩人決定馬上往港航詢問局長。當到達港航大門口時遇到了局長。
「局長！我哋嚟搵你架。」阿盈說。
「你哋兩個呀？但係我今日好忙，唔得閒同你哋傾，特首要同我哋開會，應該都要去到幾夜架，不如聽日先傾……」局長推辭著，馬上急步走入會議室。
「佢搞咩呢？」阿聲問。
「都係唔好煩佢喇。我哋嚟都嚟咗，不如探下啲舊同事啦。」阿盈尷尬的說。
「好呀，佢哋都好唔捨得你。我仲放緊大假，你哋可以慢慢傾。可能到時局長開完會可以搵埋佢。」阿聲說。
兩人便進入港航，找到舊同事敍舊。阿盈回到這熟悉的地方，回想起由阿偉事件至今才過了半個月，卻在這段時間中經歷了太多事情。兩人跟同事在辦公室聊著，而局長跟官員在會議室開會。
「特首，我哋已經帶咗阿偉返嚟，呢件事可以對公眾有個交代喇。」委員會主席說。
「非常好，從事件發生到現時只係半個月，咁快就水落石出，公眾一定會稱讚我哋政府嘅辦事效率呀。」特首滿足的說。
「特首，我認為我哋應該先確定死者身份，做DNA測試，如果真係阿偉，到時先向外公布……」局長眼神顫抖的說。
「阿局長，如果你仲想做局長嘅話，就唔好咁多嘢講，我要嘅係盡快擺平呢件事，我唔容許一啲咁荒謬嘅事發生喺我管治範圍。咩太空人消失，講出嚟你自己唔覺得好笑咩？」特首凝重的說。
「係囉，宜家搵返阿偉，所有問題都解決啦，大團圓結局，咁樣唔好咩？」主席說。
「我只係想做埋個DNA測試確定下……到時……」局長吞吐的說。
「DNA測試嘛？我哋會做。」特首指著局長旁的政府實驗室主管。「阿邊個，聽日同我出份報告，100% 吻合。局長，宜家你滿意未呀？」特首笑著說。
「咁……」局長說。
「咁我哋傾埋啲手尾佢……」主席對在座各位說。
到了七點，阿盈和阿聲記起要阿偉到父母家中吃飯，便打算離開港航。在離開之際看見局長面無表情的從會議室走出來。跟著是高官們、特首，還有委員會主席。今天是偉媽出院的日子，兩人打算向偉爸和偉媽交代，特別是偉媽還未知道「阿偉」已離世的消息。故此阿盈、阿聲與偉爸商量好，慢慢的將阿偉離世的消息告訴偉媽，希望她可以不受太大刺激，以免再次入院。
「偉媽偉爸，我哋遲咗少少！」阿盈說。
「阿盈，快啲過嚟坐低，我整咗好餸…」偉媽高興的說。「咦，得你哋兩個嘅，阿偉呢？」
「老婆，你過嚟先，記唔記得醫生叫你點樣呀？」偉爸問。
「要放鬆心情，唔可以成日擔心呢樣、擔心嗰樣…」偉媽逐一數著。
「你慢慢數，我去開飯先…」偉爸成功拉開話題。
偉爸盛完飯、端好菜，電視正播著特別新聞報道，偉媽留意著電視上的報道。
「據港航透露，日前失蹤的港航太空人陳迪偉，現已尋回。據報因飛船機件故障，而墜落日本海。陳迪偉因身體多處燒傷，引發細菌感染及器官衰竭，延至日前傷重不治，遺體兩天前抵達香港，港航對事件表示深切哀悼…...」新聞報道著。
「咩意思呀？阿偉呢？你哋又話帶佢返嚟？咁算點呀…」偉媽心痛的說。
「老婆，你唔好太激動喇，小心身體呀，醫生叫你…」偉爸勸著。
「點解會咁架，之前仲好地地…點解突然之間會咁…」偉媽含著淚水說。
「我哋搵到阿偉嗰時，佢已經昏迷緊…醫生話佢傷得好重，隨時…隨時都有生命危險…點知過咗嗰晚之後，阿偉就…」阿盈也忍不住淚水。
「點解…點解你哋咁遲先話俾我知，點解唔俾我見佢最後一面…？」偉媽含著淚低聲說。
「我哋…我哋擔心你身體呀…」阿聲望著偉媽的眼睛說。
「如果你哋嗰時同我講，我就可以飛過去，見阿偉最後一面…宜家佢走咗，我哋以後點算呀…」偉媽聲音沙啞的說。
「唔好咁啦，你照顧好自己身體，阿偉就安樂架喇，佢都希望見到你哋兩個平平安安咁生活架！」阿盈說。
「阿偉宜家喺邊？我要去睇佢…」偉媽一邊拭去眼淚一邊問。
「一係咁啦，我哋問下局長，聽日同你一齊去見阿偉啦，唔好太傷心喇，阿偉佢…唔想見到你哋喊架，佢想你哋開開心心呀。」阿聲說。
「…我入廚房炒埋啲菜先，你哋自便…」偉媽跌跌撞撞的站了起來。
「老婆，啲餸頭先咪拎晒出嚟囉，你做咩呀，唔好嚇我呀…」偉爸捉著偉媽的手說。
「哦，我冇事…食飯啦…」偉媽冷漠的回應。
席間，四人都沒有多說話，只望著自己的飯碗，迅速地將白飯扒到自己的口腔內，連水都沒喝上一口，彷彿生怕又再刺激到偉媽一樣。這餐飯大家也沒有吃甚麼，因為阿偉的事令眾人都沒有胃口，也沒有心情。飯後，偉爸將吃剩的飯菜都放進雪櫃，阿盈和阿聲也沒有特別說些甚麼，應該說，這時候安慰偉媽的該是她丈夫吧，於是兩人便離開了，各自回家。
「老公，阿偉嘅事…你係咪一早已經知道？」偉媽冷靜的問。
偉爸點點頭，摟著偉媽，兩人坐在沙發上，看著電視上無聊的節目，就這樣度過了真正沒有阿偉的第一個晚上。
第二朝早上，阿盈和阿聲到來與阿偉父母一同到達局長所說的殯儀館，打算讓偉媽見見兒子的最後一面，他們到達走廊時看到了兩個身穿黑衣的大漢守在門外。
「唔好意思，我哋係死者家屬，想入去見下阿偉」偉爸說。
「你哋唔可以入去，入面嘅遺體屬於政府所有，你哋要見佢等公眾吊唁嘅時候先啦。」守衛無情的說。
「我哋係佢屋企人呀，點解唔可以入去呀？」偉媽憤怒的罵著。
「請你哋離開，如果唔係我哋叫保安。」守衛說。
於是一行人怒氣沖沖的到了大堂坐下，過了一會兒，殯儀館工作人員到來找到了阿偉父母，向他們解釋整件事的來龍去脈。等兩人冷靜下來後，工作人員詢問有關阿偉喪禮的事情，偉爸與偉媽商量後，決定盡快替阿偉舉行喪禮，好讓他安息，早點找到樂土。經家屬與工作人員協商後，喪禮時間定在兩個星期後。回家後，偉爸和偉媽都聯絡了自己的親朋戚友，通知他們阿偉的事，希望他們屆時可以到來，替阿偉送上祝福。兩人也收拾好阿偉房間的雜物，將他的遺物一件一件的放到客廳。在忙碌當中，偉爸跟偉媽似乎可以暫時忘卻憂傷，就像打了一支麻醉針一樣，不過他們知道，這只是暫時性，有些事情總要自己勇敢面對。
「老公呀，你記唔記得呢張相呀？」偉媽拿著阿偉房間找到的相簿。
「嗰時阿偉得三歲，我哋同佢去太空館影嘅呢！嗰陣佢已經好鍾意玩太空船，我仲買咗好多玩具同埋模型飛船俾佢玩添……」偉媽哽咽。
「係呀，我仲記得佢小學嗰陣成日拎我上堂嗰啲書嚟睇，搞到我上堂成日都冇帶書…」偉爸說著，伴隨著淡淡的苦笑。「咁快就廿幾年喇喎，過得真係快！」
「阿偉細個肥嘟嘟咁，我幾驚佢大個咗都係咁，變咗個肥仔呀…」偉媽說。
「咦，呢件咪係我織俾佢嗰件冷衫。好似係佢十歲生日嗰陣我送俾佢架，我織咗成個月先織到咋，臨尾仲要求求其其好似趕工咁。細路仔真係大得好快，佢著咗幾次就已經唔啱著啦喎，我以為佢一早已經扔咗添，原來一直保存喺度…」偉媽說。
「個傻仔呀，收埋收埋啲嘢一直都唔扔，唔怪之得佢間房咁鬼亂啦。」偉爸說。
偉爸和偉媽一邊收拾房間，一邊回憶起往事，似乎對於一對父母來說，與子女相處的每一分每一秒，都會永遠收藏在心底裡面，掛念他們的時候，就拿出來看一眼，這樣即使過了多少年，記憶也不會淡忘，反而會歷久常新，歷歷在目。因此，當上父母後，記憶力就會不知不覺的提升起來，因為你會渴望記住子女生命裡的每個時刻，直到百載、千載。
兩日後，因為找到了阿偉的下落，港航被特首催促著就事件向公眾交代。吳局長將事件解釋為技術失誤，導致阿偉發生意外。外界及輿論都希望事件盡快水落石出，因此，局長和港航員工都承受著很大壓力。特首與官員，跟吳局長開了多次會議，商討如何解決事件。
「對於摘星號嘅意外事件，政府同港航都對事件感到婉惜及痛心，亦已經慰問太空人陳迪偉的家人。」特首對著一眾傳媒說。「對於香港航天科技中心，我哋亦都留意到過去，曾多次出現技術問題以及項目超支等問題，顯示本港喺太空科技發展方面，技術依然未成熟，因此，政府當局決定暫時停止港航一切事務，等待國內嘅技術成熟嘅時候，再同國內人材合作，繼續該方面科技嘅發展工程，多謝大家。」
「我想問點解會突然有呢個決定呢？」記者問。
「呢個係為咗社會利益同埋和諧發展，我哋同社會人士凝聚共識所得出嘅決定。」特首強調著。
「特首，請問呢個係咪中央政府嘅決定呢？」記者問。
「未來我哋會繼續秉承和諧社會呢個目標出發，務實嘅，理性嘅，咁樣去處理唔同嘅問題，多謝。」特首敷衍回答。
偉爸和偉媽在電視上得知港航倒閉，心情也不好受，因為阿偉在港航做了差不多十年時間，由最初的實習生訓練，經過努力，慢慢成功做到了太空人，現在卻因為阿偉的意外而要結束研究多年的工作，真是令人感到有些可惜。不知道阿偉如果得知這個消息後，會有甚麼反應呢？想必是大力反對，甚至會聯合港航員工和民眾上街抗爭，但是，現在想這一切又有何意義？