《天堂之上 - Upon The Heaven》: 第九集: 疑惑
阿聲和阿盈到了日本後，立刻向當地人查詢阿偉的事，幾經辛苦，終於找到了「阿偉」所在的醫院。阿盈馬上到服務櫃台詢問護士，分分秒秒的等待令心急如焚的阿盈急燥起來，阿聲捉著她的手臂，阿盈慢慢冷靜下來。
「唔該我想問你哋前幾日係咪有個傷者，係飛機失事送入嚟架，請問你佢係邊間房呀？」阿盈拿著當地的報紙問。「308號，OK，唔該曬你！」
「我哋快啲上去喇。」阿盈拉著阿聲急步走向樓梯。
兩人到了308號房的門外，看到門上寫著「深切治療，閒人勿進」，隔著房間的玻璃，看見醫生正在檢查著「阿偉」的身體，「阿偉」身上插著許多喉管，連每次呼吸都非常困難，身體都包著紗布。心電圖上的脈搏很微弱，每跳動一次，阿盈就放鬆少許，好像見到「阿偉」後，就有了安全感，她能感受到「阿偉」的生命力，就像脈搏一樣跳脫，雖然不太強。不久，醫生步出房間。
「醫生，我哋可唔可以入去睇下阿偉，我哋係佢朋友…」阿聲說。
「原來佢叫阿偉呀！我真係宜家先知！」醫生以日文驚訝的說。
「吓，醫生你哋唔係有病人資料嘅咩？點解你連佢叫咩名都唔知嘅？」阿聲問。
「哦，漁民哋救起病人嘅時候佢身上咩都冇，冇任何身份證明，衫褲都差唔多燒到冇曬，連架飛機都沉咗落海底，所以我哋唔知佢嘅資料。宜家好啦，你哋可以提供佢嘅資料俾我做記錄喇。」醫生答道。「你哋可以入去，不過唔可以掂任何嘢，同埋要著保護衣物。」
阿盈聽後馬上率先穿起保護衣，進入房間看看「阿偉」。
「呀！」阿盈大叫。
「咩事呀！」阿聲也到房間看看阿盈。
「阿偉佢……點解會咁嘅？」阿盈問護士。
「病人身體嚴重燒傷，臉部、手、腳等地方都無一倖免，應該係飛機墜毀後大爆炸所引致，你哋要有心理準備……醫生話佢有可能過唔到今晚，不過我哋會盡力架喇。」護士沉著氣說。
「唔會架，阿偉、阿偉……」阿盈對著「阿偉」呼喊。
「阿盈呀，唔好喊住。你諗下，阿偉係喺香港失蹤嘅，點解會係日本墜機呢？仲有，呢個人身上咩都冇，身體又俾火燒傷咗，我哋點證明佢係阿偉先，我哋係咪應該理性少少諗下先呀？」阿聲冷靜的分析著。
「咁點樣證明呀？」阿盈將淚水倒回眼眶內。
「我哋打俾偉爸。」阿聲說。
兩人離開醫院，到附近的餐廳打電話給偉爸。
「喂，偉爸…我哋搵到『阿偉』啦，佢……」阿盈對著電話說。
「太好囉，搵到我阿偉喇，佢情況點呀？」偉爸問。
「嗰個人好似阿偉，不過佢身體嚴重燒傷，又冇身份證明嗰啲，我哋唔敢肯定佢係唔係阿偉。」阿聲搶過電話來。
「偉爸，你知唔知阿偉身體上面有咩特徵，或者有啲咩記號之類嘅嘢，或者有啲咩同其他人唔同嘅地方咁樣呀？我哋想睇下嗰個人係咪真係阿偉嚟。」阿聲問道。
「一時之間我都醒唔起喎，你等我諗諗先……」偉爸慢慢從記憶中找尋阿偉的片段。「有喇，佢條腰後面有三粒癦，好似個三角形咁樣，仲有呀，同普通嘅癦唔同架，有一粒特別大粒架。」
「淨係得呢樣？仲有冇呀？你諗下。」阿聲問。
「應該冇喇，你哋去睇睇先啦，之後再打電話俾我啦，姑娘叫我唔好傾電話喇，係咁先啦。」偉爸掛了電話。
「偉爸話阿偉腰後面有三粒癦喎，我哋去睇下先。」阿聲對阿盈說。
「咁我哋返上去睇睇啦。」阿盈說。
兩人放慢腳步，慢慢地從餐廳步往醫院停車場，再向樓梯走去。阿盈也放鬆了心情，沒有再想太多事，只是跟著阿聲緩緩地踏著樓梯，直到房門前。
「嗱！阿盈，一陣無論點都好，都要冷靜，知唔知？」阿聲對著阿盈說。
「咁…如果…真係阿偉…點算？」阿盈心情又開始複雜起來了。「如果…唔係阿偉又點算呀…？」「算啦，見步行步啦。」
阿盈鼓起勇氣進了房間，阿聲在後面跟著她，看見那個人依舊躺在床上，好像丁點也沒有動過似的。於是阿聲蹲下來，趁護士不為意輕輕拉起那個人衣服的一角，斜斜地看看在腰後有沒有偉爸所說的癦。阿盈也探過頭來，希望親眼證實。
「皮膚都燒到變白色…嗰度有啲黑色一粒粒都分唔到係偉爸講嘅癦定係燒傷…」阿盈疑惑的說。「佢嘅皮膚燒成咁樣，好難睇到喎。」阿盈又想哭了。
「咁樣好難分辨喎，直情睇都睇唔到。」阿聲分析著。
阿聲輕輕的將衣服再次蓋上，生怕自己不小心弄傷了他，把衣服拉回原位的同時，他的左邊手袖被拉起了一點。
「呀！呢條手鏈咪係我送俾佢嘅！」阿盈驚訝的說。「上次我去日本旅行買俾佢架！雖然宜家燒到變咗黑黑地，但係我都認得架。」
「呢種手鏈好普遍喎，仲要喺日本買，咁樣都證明唔到啲咩……」阿聲理性的說。
「唔係架，佢一家係阿偉嚟架！點會有咁多巧合呀，戴埋同一款手鏈，又墜機，年紀又差唔多，又係亞洲人……佢一定係阿偉！」阿盈分析著一切。
「咁樣嘅話……」阿聲腦子都亂了。
「我哋再打多次俾偉爸。」阿盈終於有建議。
兩人回到剛才的餐廳。
「喂，偉爸！」阿聲說。
「點呀，阿聲，睇唔睇到嗰三粒癦呀？」偉爸說。
「佢嘅皮膚都燒得幾嚴重，我哋咩都睇唔到…」阿聲說。「係有啲黑色一點點，但嗰啲應該係燒傷…」
「偉爸，仲有冇其他特徵呀…」阿聲疑慮著。
「阿聲，唔理得咁多架喇，佢一定係阿偉嚟架，邊有咁多巧合呀，唔好再講喇，快啲帶佢返嚟先算啦。」偉爸心急的說，話語中顯得有點不知所措。
「係囉，邊有咁多巧合呀，佢一定係阿偉嚟。」阿盈聽到了偉爸在電話中的說話。
「一係咁啦，我哋帶咗佢返嚟先，返到嚟再驗下DNA，睇下係唔係真係阿偉啦！」阿聲提議著。
等了許久，偉爸才作出回應，但語氣忽然沉重下來。
「咁樣…嗱…阿聲，我見你咁幫阿偉，先至同你講啦。其實阿偉……唔係我哋嘅親生仔……」偉爸吞吐的說。
「吓，點解會咁嘅…」阿聲驚訝的說。
「你聽埋我講先，阿偉未夠半歲，我同偉媽就係孤兒院度收養咗阿偉，嗰時阿偉一見到我哋就爬過嚟，對住我哋笑笑口，好似特別鍾意我哋咁樣，於是我哋就即刻收養咗阿偉。由細到大，雖然佢唔係我同偉媽嘅親生仔，但係我哋對佢真係好似自己親生咁樣看待，呢件事連阿偉自己都唔知。佢今次發生咁嘅事，我哋真係好難過，我哋而家最想嘅，就係快啲搵返阿偉咋。」偉爸訴說著往事。
「所以，阿聲，無論點都好，你都帶咗阿偉返嚟先啦！」偉爸哀求著。
「係咁架，偉爸，醫生話佢……要接受一啲特別治療，所以要留院一段時間，冇咁快可以返到嚟香港架，你放心啦，我同阿盈會照顧好佢架喇。」阿聲故意隱瞞阿偉的病情。
「咁好啦，你哋等阿偉出院之後，盡快返嚟喇，我同偉媽買定好餸等你哋。」偉爸說完便掛了電話。
「阿聲，你點解唔同偉爸講，阿偉…..可能……」阿盈問。
「阿偉會冇事架，放心啦。到時等阿偉出院，我哋齊齊整整咁樣返香港，好唔好？」阿聲說。
「好，我仲有好多嘢想同阿偉講架……」阿盈害羞地說。
「知你多嘢講喇。」阿聲說。
兩人坐在阿偉房外的椅上，似乎放鬆了心情，阿盈也展露出久違的笑容。人生的意義，就是在於希望，這刻便能夠深深體會得到。兩人一邊坐著一邊聊著以往與阿偉三人一起的往事，阿聲也講起中學時與阿偉的一點一滴，原來這麼多年來，阿聲也沒有將這些記憶遺忘。阿盈也回憶起與阿偉度過的每個節日，那感覺是多麼的親切，多麼的熟悉，就好像是昨天才經歷一樣。
「阿偉呢，中學嗰時我叫佢考試嗰陣坐過嚟，借份答案我抄，點知佢真係明目張膽咁樣拎份嘢放係枱面，咁搞法呀，係人都知我哋出貓啦。於是我哋就俾訓導記咗一個小過，我仲俾班入面個肥仔威笑足我成年添…」阿聲回憶起中學的趣事。「阿偉真係一個好善良嘅人，連出貓都唔識，好明顯就係佢從來都未試過出貓啦…」
「呢個似乎係你嘅問題喎，識咗阿偉咁耐都唔知佢唔識出貓，叫咗你要帶眼識人架啦。」阿盈笑著說。「好彩阿偉冇俾你呢個邪惡嘅朋友教壞。」
「我記得呢，我有一次有啲緊急事要返港航度處理，因為太急唔記得帶遮，走嗰陣出面落大雨喎，天文台仲話有排落添，嗰陣真係唔知點算。點知我見到阿偉喎，佢又好似冇帶遮咁樣，於是我哋一齊被困係港航中心度。之後仲要無啦啦停電添，成間房好黑，好彩阿偉喺我身邊，叫我唔好驚。最後我哋等細雨小小一齊衝出去截的士，點知一衝出去又開始落返大雨，阿偉就唔理喇，照衝。我都跟埋佢一齊衝左出馬路邊截車。上車嗰時司機仲問我哋係咪傻嘅，咁大雨都唔識避雨…佢個語氣我宜家仲記得，好鬼好笑…」阿盈又大笑起來。
聊著聊著，來其他病房探病的人都離開了，只剩下阿聲和阿盈兩人陪伴著「阿偉」。不經不覺，兩人撐不住睡意，大家互相靠著大家，就在椅子上睡著了。而「阿偉」就在病房內繼續搏鬥著，情況仍未樂觀。