《天堂之上 - Upon The Heaven》: 第十集: 結局
到了另一天早晨，阿聲和阿盈仍在門外的椅子上睡著，卻隱約聽到醫護人員匆匆忙忙此起彼落的腳步聲，還有醫生奔跑時急促的呼吸聲，好像還有儀器緊密的「嗶、嗶、嗶」響聲。兩人被聲音吵醒，抬頭一看，眾多醫護人員在阿偉房間內替阿偉急救，阿盈一看不妙，馬上詢問醫生。
「醫生，點解…阿偉佢點呀……」阿盈緊張的說。
「你哋唔好阻住先，病人宜家需要急救…」醫生只顧望著阿偉的情況。「唔得喇，推上去，叫高橋醫生嚟。」
只見護士將阿偉推出病房，分秒必爭的將阿偉推到升降機內，到五樓的手術室準備做手術。此時，港航事件獨立調查小組的主席和助手也來到病房前。阿盈和阿聲只是看著阿偉離開，根本來不及說任何說話。他們二人便馬上趕往手術室，剛到的主席和助手也跟上。定下神來，阿聲帶著阿盈來到了手術室門前的長椅上坐著，阿盈眼睛注視著門框上面的紅燈，心裡面只想著一句說話「阿偉你一定要冇事呀！！」
醫生在手術室內，分秒必爭地替阿偉進行治療。
「唔得喇，一支強心針。」
醫生替阿偉打了一支強心針，接著再進行心外壓，觀察著儀器上的讀數。
「病人心跳好混亂，唔得喇，做電擊啦。」醫生要求使用心臟電擊器。醫生準備進行電擊。
「嘭！嘭！」兩下的電擊。
「仲係冇嘢睇，嚟多次。」醫生要求再次電壓。
接著進行了第三次、第四次的電擊。阿偉的脈搏越來越微弱，醫生繼續進行著心外壓，但情況並沒有改善。
「嗶……」心電圖上顯示出一條直線。
「再嚟多次！」醫生打算進行第五次電擊。
經過多個小時的急救，手術室外的紅燈終於熄滅，阿聲和阿盈立刻走到門前，期待著醫生們出來，對他們說阿偉情況如何，兩人深信阿偉定會吉人天相，阿盈也沒有流淚，淚水只是全部被困在眼眶內。
「醫生，阿偉佢點呀？」阿聲問。
「病人受到細菌感染，出現併發症，身體器官衰竭。對唔住，我哋盡咗力，病人…救唔返……節哀…」醫生說完便吩咐護士替阿偉做好餘下的工作。
醫生的話像一把鋒利的匕首，一下刺進阿盈和阿聲的心臟。此時阿盈已經情緒失控，眼睛也被淚水充斥著，看不見未來的路，之後突然跌倒在地上，倚著牆壁，低頭閉目，淚涕並流。阿聲上前捉著阿盈的手，打算安慰她，雖然自己此時也悲痛萬分，但阿聲忍著淚水，試著將它們倒回肚子裡。牆上的鐘顯示著日期「11/11」。
「阿盈…」阿聲沙著嗓子說。
「點解…點解個天要咁對阿偉，我仲有好多嘢…想同你講架，點解要咁快離開我…阿偉…」阿盈傷心不已的說著。
哭泣，似乎是此刻唯一可以做的事情，「阿偉」的離開已經變成事實，沒有辦法更改，時間也沒有辦法倒退，阿盈閉著眼睛，便回憶起許多與阿偉一起的片段。
「一月二十日 晴」
「你搞咩呀，琴晚喺公司瞓呀？」阿偉問。
「阿偉？」阿盈起來望望窗外「唉呀，死喇，天光架喇？上次做份報告唔見咗……琴晚諗住做埋先走，點知眼瞓得制瞓著咗呀，點算呀，一陣要交俾局長架！」阿盈心急地說。
「咁慘呀，陰公豬囉，今晚又有人唔洗走囉，哈哈哈…」阿偉取笑著阿盈。
「你個衰人呀，快啲行開唔好阻住我，我要快啲做埋佢，仲有一個鐘咋…」阿盈帶著少許怒氣的說。
「送樣嘢俾你啦，你上次留低咗係我屋企呀。」阿偉說完便將報告放到阿盈桌上。「仲唔快啲準備！」
「三月四日 雨」
「咦！阿盈？你返嚟做咩呀，落咁大雨…」阿偉問。
「我返嚟做埋份建議書呀，局長話臨時有啲嘢要改…」阿盈回答。「死啦，冇帶遮添，睇嚟有排落呀…」
「哎呀，我都冇帶…」阿偉失望的說。「冇計啦，唯有等下啦。」
「等咗咁耐仲係咁大雨，點算呀？」阿盈抱怨。
「好似細咗小小啦，我哋不如衝出去馬路截的士啦，嚟啦！再等就等到聽朝喇。」阿偉在門口說著。
「我搵件外套遮住你咪得囉，行啦。」阿偉催促著。
「三月六日 陰」
「你呀，前日逼我同你衝出去截車，宜家搞到我病到七彩…」阿盈埋怨著。
「哎呀，都叫你平時早啲瞓呀、著多件衫架啦，病咗仲要賴我呀。仲有病咗就唔好返工啦，一陣傳染我呀！」阿偉與阿盈開玩笑。
「人哋病咗仲講啲咁嘅嘢，我唔使你可憐呀，你走啦！哼！」阿盈枕在工作桌上說。
「四月十日 雨」
「黃敏盈，你咁係咩意思。」阿偉問著。
「有咩問題，呢個係我哋部門嘅事，唔到你理。」阿盈決絕的說。
「你宜家要暫停我哋嘅測試計劃，即係玩我啫，你當我哋啲同事係咩呀，叫我哋做就做，走就走呀？」阿偉大聲說著。
「宜家個計劃嚴重超支呀，局長要我哋暫停研究，又唔係取消，到搞掂咗資金問題咪再可以繼續囉，我見唔到有咩問題喎。」阿盈冷靜的說。
「啱呀，係你眼中根本無重視過我哋做緊嘅野，對唔住，我好忙架，走先喇！」阿偉扭頭便走。
「六月二十一日 晴」
「你個為食豬呀，啲嘢食係一陣同公司同事慶祝成功研發太空船，先至食架，你咁快偷食咗咁多，一陣佢地咪冇得食！」阿偉輕輕敲著阿盈的頭。
「怕咩啫，再整過囉，我冇食到早餐呀嘛…俾我食埋呢粒啦…」阿盈用叉拮了一粒魚蛋。
「真係呀，第日邊個娶著你真係辛苦喇，食曬佢成副身家都似。」阿偉說笑。
「咁…你娶我呀不如！」阿盈笑著說。
「咪搞，我唔想咁快破產…」阿偉笑著回應。
「十月二十五日 陰」
「阿盈，我下個星期就要上太空做研究喇，有排先返嚟…」阿偉與阿盈坐在海濱旁的長椅上。
「我知，上去研究外星人嘛！」阿盈開玩笑的說。
「呢個係我一直以來嘅夢想，我由細細個開始已經想上太空，睇下呢個宇宙，呢個世界，究竟係點嘅，你都知架…」阿偉平心靜氣的說。
「咁咪好囉，宜家終於夢想成真啦！我嘅夢想都唔知要等幾耐先可以實現。」阿盈慨嘆。
「你夢想係咩呀，咁難實現嘅咩？」阿偉好奇的問。
「我嘅夢想……等你上完太空返嚟先話俾你知！」阿盈賣個關子。
「我知，又係嗰啲咩嫁個有錢人之類咁樣啦！」阿偉笑著說。
「哼，你個阿偉呀！」阿盈鼓著腮子，用手拍打阿偉的肩膀。
「得啦，怕咗你喇。嗱，呢條頸鏈送俾你，第日撞到鑽石王老伍都可以扮下嘢，唔好失禮人呀嘛。」阿偉替阿盈戴上頸鏈。
「仲有呀，我唔係度嗰陣，幫我照顧阿爸阿媽。」阿偉接著說。
「哦，原來有嘢求我嘅！唔怪得咁好送嘢俾我啦！」阿盈說。「放心啦你。」
「十一月十一日 ……」
「……」
想著想著，阿盈的眼淚已經流乾，扶著欄杆慢慢站起來，阿聲幫忙扶著阿盈。此時護士將阿偉推出手術室，打算送他到中轉室，讓家屬見阿偉最後一面。阿盈和阿聲捉著阿偉的床邊，一步一步慢慢的陪伴著阿偉走過最後一段路程。此時，兩人都似乎冷靜下來，彷彿看到阿偉的身軀，有了實在感，亦可能是傷心過度，超過了身體的承受程度，連身體也不知道如何反應，需要消化一下。那個主席和助手一言不發的跟在後面。到了中轉室，阿聲和阿盈說了很多之前沒有對阿偉說的話，一會兒後，護士叫兩人到登記處辦手續，並詢問他們想如何處理阿偉的遺體。主席跟了過來。
「我哋…要將阿偉帶番香港！」阿盈說。
「係呀，我哋。呢件事交俾我哋委員會就得喇，你哋可以走先。」主席終於說話。
「你想將阿偉點呀？」阿聲疑惑地說。
「我冇必要同你哋解釋。呢張係特首俾我哋委員會嘅授權書，你哋局長都簽咗名。阿偉我哋會將佢送返香港，總之你哋到呢個時候任務已經完成喇，可以離開啦。」主席冷冷的說。「唔使諗喇，你哋做唔到啲咩，乖乖地同我返香港。我哋香港見！」主席笑著說。
「你……我知我哋做唔到啲咩。但係我要你保證阿偉要平安返到香港。」阿聲無奈的說。
「我保證！」主席說。
阿聲和阿盈使帶著無奈離開了醫院。
「阿盈，等陣先，我哋要同偉爸偉媽講先啦。」阿聲說。
阿聲鼓起勇氣，走到醫院餐廳門外，打電話給偉爸。阿聲先婉轉地說了一些不著邊際的話，待偉爸有了心理準備後，再將事情告訴偉爸。可惜，偉爸知道了阿偉離世的消息後，依然悲痛流淚，連說話都說不清楚，哭著喊著呼叫阿偉的名字。而阿聲安慰著偉爸，但沒有提及委員會主席的事。經過十多分鐘後，偉爸也停止了哭泣，要求將阿偉帶回香港，阿聲建議不要將事情告訴偉媽，待偉媽出院後才慢慢將事情告知她。
這晚半夜，阿聲和阿盈回到酒店，將自己的行程安排好。到了凌晨五點，兩人都不太可能入睡，便在各自的房間裡，坐到窗台上，倚著窗邊，看著閃爍的星空，靜靜地想著往事。阿盈發現星空上有一顆星星特別耀眼，不知道是不是阿偉故意令阿盈看見，似乎有甚麼要說一樣。阿聲望著天空，也留意到了那顆特別明亮的星星，心裡似乎還有些疑慮：這個人究竟是不是阿偉呢？那阿偉是如何從香港來到日本的呢？可惜這些問題，已經沒有人可以回答了。思想了一會兒，阿聲突然明白了一件事：阿偉都已經失蹤了整個星期，就算找得到他，恐怕也只是與現在同一結果，與其讓偉爸和偉媽一直擔心下去，不如盡早讓他們面對。這個人是不是阿偉根本不重要，重要的是，阿偉父母得到了安慰。這個想法是對或是錯，但現在是與非還重要嗎？