《天堂之上 - Upon The Heaven》: 第二集: 升空

在控制中心內，工作人員都在作最後準備，檢查所有器材的運作是否正常，而十多個監察人員正在從各個角度監察摘星號的情況。在一切都準備好的情況下，訊號燈亮起了綠燈，發射進入倒數。「三十﹑二十九﹑二十八……」

阿聲在控制中心的大屏幕上看著發射情況。

「計緊時喇、計緊時喇，仲有廿秒。」阿聲對在旁的友人興奮地說。

在阿偉家中，偉爸和偉媽也正觀看著電視台的直播。

「加油呀偉仔！」偉媽為兒子打氣。





「阿偉，今次拋頭露面啦。」偉爸太興奮，用詞不當。

「係出人頭地呀！睇你開心到個樣！」偉媽更正。

「十﹑九﹑八……」電視倒數著。

「七﹑六﹑五……」偉爸偉媽也跟著倒數起來。

「四﹑三﹑二……」阿聲在大屏幕前數著。





「一，發射。」阿盈發號施令。

只見一大團白煙從摘星號的底部噴出，向外形成了一個巨大的氣場，摘星號向著天空上升。太空船的機身被穿越煙霞的陽光照射著，光線雖然不太強，卻能反射到地面。在控制中心裡看著，太空船閃閃發光，徐徐上升，在它飛行的航道上，留下了一縷薄薄的輕煙，伴隨著火箭上升的，不只是摘星號，還有阿偉的夢想，更有香港市民對阿偉以及一眾工作人員的祝福。記者們都爭相報道摘星號成功升空的情況，現場每個人都情緒高漲，歡呼聲與掌聲響成一片。在迪偉家中，偉爸和偉媽已經樂翻天了，開心得尖叫起來。

「老婆，一陣去食餐好嘅，賀一賀佢。橫掂我哋好耐都無去過食好嘢。」偉爸說道。

「好呀、好呀，你快啲入去換件靚衫啦，我都要搵返我套『去飲衫』同埋個菇時袋出嚟先得，難得今日咁開心，一於shopping！」偉媽答道。

「我哋見到摘星號已經成功發射升空，今次發射係香港歷史上首次載人飛行，摘星號將會在太空進行研究，喺一年後，將會折返地球。好喇，現場所有人嘅情緒都好高漲，我們會繼續密切留意摘星號嘅情況，將時間交返俾……」記者報道。





而在控制中心內，所有員工都非常興奮，摘星號是由他們—所有港航的員工和各個航天專家，一手一腳創造出來的夢，實在數不出有多少汗水和心血灌注在摘星號的身上，現在他們的夢終於成真，不少員工都感動落淚，禁不住情緒。

「我哋終於得咗喇！」阿聲眼泛淚光的對著同伴說。

「各位同事，我係CTM黃敏盈，我知大家都好開心，但請繼續緊守崗位，監察住摘星號嘅情況，如有異常即時匯報」阿盈在中央系統作出宣布。

聽見宣布後，大家都穩定下情緒，保持著冷靜地監察摘星號的情況，在心內默默地為它打氣。

「咦，有啲唔對路喎。」監察人員疑惑著。

一眾監察人員和主管阿盈都湊過來看看到底發生甚麼事。

「點解雷達圖上面顯示唔到摘星號嘅位置？連衛星訊號都接收唔到﹗」監察人員問道。

「會唔會係入咗雲層之後訊號有問題呀？你再試一次睇下。」阿盈問。





「放心啦，你睇下架飛船咪沿住軌道升緊上去囉，係我地中心嘅系統問題啫。」阿聲說。

中心內的監察鏡頭捕捉著摘星號的一舉一動。在大屏幕上，只見摘星號進入了厚厚的雲層。而訊號系統依然失靈。

「嘩！嘩！咩事呀？好光呀。」在發射基地現場的記者問。

記者們、圍觀者和攝影師都手足無措，目瞪口呆，不知道發生甚麼事。只見摘星號進入雲層後，雲層內閃出了幾下、類似閃電般的強光，好像將天上的煙霞一下子都驅散了一樣，而摘星號彷彿被這堆雲層所吞噬。數秒後，這一大片雲層在強光消失後竟然也隨之失去了蹤影，摘星號也隨著雲層，消失得無影無蹤，而天空又再次被煙霞所掩蓋，回復原來的面貌。這一刻無論現場的記者或控制中心的人員也呆了。

「陳迪偉，阿偉，阿偉，你聽唔聽到？聽唔聽到呀？」阿盈焦急地向著通訊器對阿偉說。「發生咩事？聽到就答下我啦，你有無事呀？」

「即刻睇下雷達圖有無反應，仲有仲有睇下有無訊號由摘星號發出嚟，快啲，快啲啦！」阿盈氣急敗壞地向監察人員說。

「無反應。」負責雷達的人員答。





「我呢邊都無訊號。」負責訊號接收的人員答道。

「發生咩事呀，點解會咁？我哋……我哋再試下其他方法。」阿盈眼泛淚光的說。

偉爸剛從房間出來後，在電視上播映著摘星號的特別新聞報道。

「嘩，發生咩事？老婆快啲出嚟睇下啦。」偉爸一臉疑惑。

「咩事呀老公，我搵緊我對鞋呀。」偉媽漫不經心地答道。

「宜家我哋喺石崗發射基地，頭先發生咗一件神秘嘅事，係……大概係……我都唔知係咩嘅事，咁…呢…」記者報道。「我冇稿呀，稿呀稿…」記者輕聲的說

攝影師向這記者遞上了稿子。

「係喇，頭先我哋一直係呢度緊貼住摘星號嘅最新情況，但就喺佢升空大約一分鐘，摘星號進入咗雲層之後，突然多道強光喺雲層入面閃出，幾秒後摘星號就連同雲層消失咗。係，我哋暫時唔知摘星號去咗邊，同埋究竟發生緊咩事，等我哋組織下……或者搵其他目擊者問下之後，再為大家報道，先交返俾新聞部嘅同事。」現場記者報道。





「好喇，我哋宜家睇返我哋外景部嘅同事頭先喺現場所拍攝嘅片段先……(吓，未準備好？) …呀唔係，我哋睇下一啲更加精彩嘅節目先…就係…廣告喇……」新聞中心的記者說。

「有冇搞錯，呢個時候去廣告！」偉爸憤怒的說。

「喂，老婆，大件事喇，快啲嚟睇下啦，阿仔唔知發生咗咩事呀。」偉爸催促著。

偉爸和偉媽就一邊看著電視台的廣告，一邊打電話給阿聲。

「哎呀，老公呀，轉台啦，睇廣告做咩呀！」偉媽說。

「轉咩啫，得嗰一個台…唔好嘈啦，我問下阿聲佢地呀！」偉爸說。

「死啦，阿仔去咗邊呀，會唔會有事架﹗阿偉，阿偉呀﹗」偉媽傷心地說。





「唔好嘈住，冷靜啲先，等我問下阿聲。」偉爸撥打阿聲的電話。「快啲聽電話啦，聽電話呀……」

電話接通後，「嗶嗶﹑嗶嗶﹑嗶嗶……」響了半分鐘。偉爸心急如焚。

「喂，」電話接通了「世伯呀，係……阿偉佢……」阿聲吞吞吐吐地說。

「究竟發生咩事呀，阿偉佢點呀？答我呀！」偉爸焦急地問。

「宜家我哋都唔知咩事，不過我哋試緊聯絡阿偉架喇，你哋唔好擔心，阿偉佢一定會冇事嘅。」阿聲安慰偉爸。

「阿聲，我阿仔去咗邊呀，點解會咁架……」偉媽搶過電話，邊哭邊說。

「伯母呀，我哋聯絡緊阿偉架喇，你哋唔好擔心啦，我搵到佢第一時間打俾你哋啦，好嗎？你哋留喺屋企等我電話，放心。」阿聲再安慰偉媽。

「阿聲，一定要幫我搵返阿偉呀，求下你！」偉爸又搶回電話。

「包喺我身上，你哋放一千個心，中心嗰邊叫我喇，唔講住喇。」阿聲裝作冷靜，結束通話。

偉爸放下電話，摟著偉媽，靜靜地坐在沙發上，看著電視上對摘星號的報道。過了一會，偉媽回到房間，將剛才找到的高跟鞋和手袋放回盒子裡，彷似靈魂已經離開軀殼一般，目無表情，眼角的淚水已經乾了，可是還留下了淡淡的痕跡。放回手袋後，偉媽坐在偉爸身旁。

「唔好擔心啦，老婆，阿聲話一定會搵到阿仔架，要俾啲信心先得架嘛，如果我哋都無信心阿仔會返嚟嘅話，咁點得呢！」偉爸捉著偉媽的手說。

「係呀，阿仔一定會返嚟架，佢答應我哋要一齊去旅行架……」偉媽彷彿振作起來，重拾笑容。

阿偉父母有了尋回阿偉的信心，一直留在家中，看著電視直播，等待著阿聲的來電，雖然不知道這個來電是喜訊或是惡耗。在控制中心內，每個人都好像趕著去做某些事，但又不知道該做哪些事，工作人員試過不同方法，試著與摘星號聯繫，卻始終未能成功。部分員工前天為摘星號作通宵檢查，而今天又忙了一天，實在疲憊不堪才回家休息，剩下的員工繼續為尋找摘星號而努力，通宵達旦工作，但是也沒有辦法聯繫上阿偉。