《天堂之上 - Upon The Heaven》: 第一集: 準備
於2047年，在一眾科學家和天文學家的努力下，香港成功研究出屬於自己的載人太空船。在同年11月，首項發射工程將會展開。作為香港首個登上太空的太空人陳迪偉，背負著全港市民的期望，也達到了自己小時候的夢想。
「香港首個載人太空船『摘星號』將於明日發射升空，進行探月以及與國際太空站聯繫任務，摘星號將會到月球表面收集土壤以供日後分析之用，預計一年後，將會折返地球，若今次發射成功，將會係香港航天史上嘅里程碑，意味著香港航天科技將會向前邁向一大步。好喇，各位新聞報道完畢，聽日同樣時間再見。」新聞報道員說。
發射前的一天，在香港航天科技中心內，準備於明天升空的太空人陳迪偉與他的好友及同事閒聊著，明天是一眾港航員工的大日子，亦是阿偉一生中最重要的時刻。
「你準備好未呀，阿偉？聽日就要出發喇喎﹗」阿聲說。
「一早準備好晒啦！」阿偉回答。「其實我真係好期待聽日上到太空嗰陣，會係咩感覺。我細個嗰陣成日喺度諗，如果俾我上到太空我會點點點，今次終於俾我等到喇！」
「你就好啦，有得上太空，係太空喎！」阿聲羨慕地說。
走廊傳來一陣腳步聲，咯咯咯……阿盈推門。
「咦，係阿盈喎。」阿偉說。「阿盈，我聽日就飛喇，你嗰邊嘅情況點呀，有冇咩問題呀？」
「基本上都冇咩問題嘅，全部嘢都處理好曬架喇，做埋啲檢查，check下啲機件嘅運作就攪掂，放心啦你。」阿盈說。
「嗱，阿盈做嘢不嬲都出曬名細心架啦。」阿聲補充說。
「係囉，我辦事你放心。」阿盈拍拍心口說道。
「喂，阿盈，呢條友仔聽日就上太空玩喇，要一年之後先至返嚟，你有嘢就好宜家講喇，唔係嘅話……」阿聲一邊奸笑一邊說。
「關你咩事啫，你好多事……」阿盈尷尬地說。
「唔好玩佢啦，聲哥。」阿偉幫阿盈解圍。「啊，不如拎你幅靚仔相上去，貼係月球表面，等啲外星人見下你都好喎。」
「嘩，對唔住大佬，你唔好搵啲咁嘅嘢嚟搞。」阿聲說。
「好呀，貼埋佢上國際太空站出面，到時上埋封面都得呀！」阿盈笑說。「係啦，我出番去執埋啲手尾佢，你哋慢慢傾，see you！」
「拜拜！」阿偉說道。
阿聲是港航的工程人員，與阿偉是中學同學，畢業後竟然在港航這個地方再聚頭，因此彼此稱兄道弟，雖他們經常挖苦對方﹑和對方開玩笑，但實為死黨。阿盈是港航的技術主管，對各個項目的進度和情況都瞭如指掌，做事細心，眾人皆知，不容許任何出錯的情況。私底下，阿盈阿偉和阿聲是好友，經常在假日相約到處遊玩，看看風景，談談理想，上天下海，總之「有你的地方就有我」。
除了好友之外，阿偉的父母也非常疼愛他，父親是退休科學教師，因此阿偉從小就受父親影響，鍾愛天文和科學，母親以前是文員，但已退休多年。阿偉很愛他的父母，經常帶他們周圍遊玩，又時常親自下廚，讓父母一嚐自己的手藝。今天下班後，本來阿偉應該留在宿舍過夜，畢竟明天便是升空的日子，但阿偉希望跟父母在離別前多聊一會兒，於是主管便批准阿偉回家。
「阿爸阿媽，我返嚟喇。」阿偉在門口邊脫鞋邊講。
阿偉的聲音在走廊徘徊，但父母卻不見蹤影。
「咦，去咗邊呢?」阿偉疑惑。
阿偉走到飯廳看看，又走到父母房間找找。之後，父母從廚房裡走出來。
「生日快樂！迪偉。」迪偉父母捧著蛋糕。
「你哋……」阿偉驚喜了一陣。
「阿偉呀，你半年之後生日呀嘛，但係你今次一上太空就要去一年，所以我哋提前幫你慶祝生日呀，祝你年年有今日，歲歲有今朝呀！」偉媽說。
「呢招…我哋…睇電視學返嚟架咋！」偉媽吞吞吐吐地說。
「係呀阿偉，你要平平安安返嚟呀！嗱，上到太空記得幫我影返幾輯靚相呀，影下啲星星呀太陽呀之類，最好有外星人添，總之自己執生啦。」偉爸開心地說。
「唉，老豆呀，上到太空點樣影呀……」阿偉無言。
「係囉，傻佬，阿仔宜家去做嘢呀，你估去玩咩，一陣俾人鬧就唔好啦，你咁鐘意影相自己上網搵啲靚相咪得囉，要幾多有幾多添啦。」偉媽說。
「我講下笑啫。嗱，你叫架咋，我就上網搵下相先，搵下有無靚女…呀，唔係，係靚相先啱。」偉爸笑著說。
「你試下呀！」偉媽扭著偉爸的耳朵。
「得啦得啦，放手先，我錯啦，我老婆大人咁靚，我使咩搵第二個啫，係唔係呀？」偉爸捉著偉媽的手。
「梗係啦，我媽咪係世界上最靚嘅女人！我呀，有時落街買餸嗰陣呢，啲阿姐話我都唔知係咪你親生嘅，有咩理由你可以Keep得咁好，佢地話你睇落似我家姐添呀……」阿偉說。
「呢個咪係有保養同無保養嘅分別囉！係咪呀，老婆？」偉爸說。
「阿爸阿媽，唔好係度耍花槍啦，我起晒雞皮喇！」阿偉摸摸自己的手臂。
「係囉，快啲吹蠟燭，許個靚願先啦。」偉媽說。
「多謝你哋呀，阿爸，阿媽，我都唔知講咩好添……」阿偉尷尬地說。「不如咁啦，等我返嚟之後帶你哋去旅行，去啲特別嘅，無咩人去過嘅地方啦。」
「好呀，特別啲嘅地方？俾我哋諗下先，等你返嚟就出發。」偉媽說。
「好，一言為定！」阿偉說。
「好啦，切蛋糕啦!」偉爸說道。
就這樣，阿偉提前過上了他30歲的生日，一邊和父母聊聊往事，一邊講自己明天升空後的日子，阿偉不知道自己前方的路是如何，畢竟這是他的第一次的升空任務，也是最巨大的挑戰。想起自己將要離開父母和朋友一年，要獨自在太空中生活，都不禁有點感觸，但就這樣聊著，時針停到了「11」上。
「好啦，阿偉，我哋瞓先啦，你都唔好咁夜瞓喇。」偉媽說。
阿偉點點頭。突然，口袋裡的手機震了一震。
「阿偉，知你未瞓嘅，聽日你就要飛喇，但我要留喺控制中心度，應該都見你唔到架喇，要一年之後先見到呀~~表情符號~~你要加油呀！唔好俾外星人捉咗去呀!!~~ 表情符號~~出年見啦！」阿盈傳來訊息。
「知喇，係都我捉佢哋啦~~表情符號~~到時捉返個外星人俾你做男朋友又點話。我要瞓喇，唔係上到去啲外星人以為我係同類就大件事啦。」阿偉回覆。
回覆後，阿偉就回房休息。這夜與平常的夜晚不同，異常安靜，阿偉也沒有多想，抱頭便睡。另一天的晨曦還未出現，阿偉就在清晨回到基地打點一切，家中的父母仍在熟睡。
「老婆！起身喇，電視播緊阿仔嘅節目呀，快啲嚟睇啦。」偉爸說。
「好喇，無錯喇，呢個時候同大家揭曉返上集，嗰個『摘星送火箭』有獎問答遊戲嘅答案先啦。個問題就係問呀，喺香港航天歷史入面，邊一位將會係第一個登上月球嘅太空人呢？答案就係陳迪偉嘅。無錯喇，螢光幕呢三位觀眾朋友，恭喜曬你哋呀，你哋可以得到由六叔珠寶金行送出嘅，進寶足金火箭一套，價值係一萬六千蚊嘅，我哋會有專人聯絡你領獎架喇。好啦，轉頭返嚟繼續會有摘星號嘅直播情況…」電視播映著。
「好啦，我哋宜家睇睇喺石崗軍地發射基地嘅情況先。」電視直播中。「係喇，宜家我哋見到摘星號已經準備就緒，太空船都已經設置好喺中央地帶，而發射現場兩公里都已經清空，就等待摘星號嘅發射喇……」
升空當天，阿偉精神抖擻地穿起制服，進入穿梭機，內心只想著升空的事，創造歷史。今天的天空比昨天的灰沉，微微的煙霞覆蓋了原本蔚藍的天空，天上的雲朵被一層一層的煙塵所遮掩，顯得模糊不清。今天這種情況在香港非常普遍，而昨天的湛藍天空才是反常。在發射基地外圍兩公里聚集了一眾記者，擠擁在採訪區和直播區，準備作電視直播發射情形。