《印度 · 尋油 · 台灣妹》: 《三十九》

我沿住其獨特嘅螺旋設計向上行，一間一間咁搵，呢間無，就下一間，下間無又另一間，八樓、九樓、十樓、十一、十二、十三，直至上到最高。 


每間鋪頭，每間餐廳我都入過，除咗戲院同女廁外，我通通都搵過晒，結果 …… 


「咇、咇」手錶顯示已經十二點， 所有餐廳同鋪頭都已經關晒門，周圍已經空無一人，只淨低垂頭喪氣嘅我，獨自坐响樓梯上面。 


因為一頂帽，我花盡所有力氣咁搵，為嘅只係一個機會，一個再見 Priscilla 嘅機會，可惜，無論付出幾多汗水，所得番嘅可能只係越多嘅失望。 






其實我一早預料到有咁嘅結果，失落嘅情感，疲倦嘅身軀，同一下一下嘅打鼓聲，明明確確咁話我知，放棄啦，至少今日都應該放棄，番屋企，沖過涼，叉下電，明天再嚟碰碰運氣。 


離開朗豪坊，走到街上，唔知係攞景定贈慶，望見一相一對嘅連體嬰，個人就越係低落，仲開始有啲怨氣，猶如喪屍咁自言自語 


「仆街，咁夜唔死去爆房，响條街度做乜！」 






「一杯嘢飲兩個人飲，睇下你地幾時散！」 


「响條街到打車輪，報警拉你吖嗱！」 


發洩完，我就上咗的士，從車內望出車外，仍然係五光十色嘅街道，仍然咁多痴男怨女扭埋一舊，仍然係得番我一個。 






車慢慢由砵蘭街轉入亞皆老街，當駛到與上海街交界，我望到一個帶住紅色帽，著住牛仔褲嘅女仔，佢行緊去朗豪酒店，抑壓嘅情感一下子爆發，我開窗大嗌 


「Priscilla ~」 


我見到個女仔正要回頭一望，好可惜架車已經駛咗入新填地路，無辦法睇清楚佢個樣，我有一刻猶疑，想叫住司機大佬，不過，我最終都無出聲，因為我相信，就算我即時响新填地街落車，番到去亦只會係失望，我相信 ... 係 ...


成身臭汗咁番到屋企，一開門，漆黑一片，所有人都已經瞓晒，我放輕腳步行入房，開著書枱燈，無理身上有幾污糟邋遢，就咁躂咗落床度，真係攰到唔想陏，望住天花板，腦海不斷浮現呢排所發生嘅片段，印度、Priscilla、台灣、朗豪坊 …… 慢慢我就瞓著咗。 


「達仔、達仔」 






我聽到媽子不斷嗌我，不過，我實在太攰，攰到連應一聲都無力。 


「達仔，快啲起身喇，你唔係要出去咩？」媽子好心急咁嗌我 


「出 …… 去 …… 邊啊？」我半夢半醒咁問 


「乜你無睇到貼响房門張紙咩？」媽子帶點驚訝咁問 


「咩 …… 紙啊？」我完全唔知佢講乜 






「尋日有個女仔嚟過， 仲 …… 」媽子跟住就講 


一聽到有個女仔嚟過，我就即時彈咗起身，好緊張咁問 


「之後點啊？」 


「個女仔好斯文，好有禮貌，家姐好似佢識咁，請咗佢入嚟坐，個女仔等咗你成晚，你個電話又打極都唔通，佢等到十一點幾都唔見你，有啲失望咁走咗，臨走時就寫低咗張紙，叫我交比你！」 


「咁張紙呢？」我發晒矛咁問 






「嗱 ~」 


我打開張紙，上面寫住 


" Da Vinci，我來了香港，現在住在朗豪酒店房間 3115 號，明天下午一點在大堂等你！" 


一點？我望一望鐘，咩話 ~ 十二點九？ 


仆街喇！！ 






我即時換件衫，攞起電話、銀包同個袋，牙都唔刷就衝咗出門。 


Priscilla，妳等我呀，我有好多好多說話要同妳講！