《印度 · 尋油 · 台灣妹》: 《三十八》

一間普通酒店可能得一個出入口，但係朗豪酒店喺一間五星級酒店，仲要連接朗豪坊，四通八達，根本就無可能等到 Priscilla。 


不過，機會幾微都好，都只有等，無可能都要等，唔等連唯一機會都無。 


攪到呢刻，原來已經五點，攞起電話，發覺已經無電熄咗，又無後備電，真失敗！ 


依家唯一可以做嘅，就係搵過有利位置等 Priscilla，以我觀察，正常出入口只有兩個，地下正門同四樓大堂，我決定揀近大堂嗰個博一博。 






成個大堂充滿著小朋友嘅歡笑聲，佢地不停咁跑嚟跑去，好鬼開心，咁又係嘅，嚟得旅行，緊係開心啦，唯獨我一個人愁眉苦臉咁企咗响度，無離開過一步，因為我怕我一行開，Priscilla 就會出現。 


呢個現實版嘅守株待兔，真係消磨鬥志嘅佳品，等、等、等，由天光等到天黑，响我面前經過嘅旅客，無一千都有幾百人，可惜無一個係 Priscilla。 


不知不覺已經十點，攰，我可以忍，肚餓，我可以死頂，但有啲嘢真係忍無可忍，我所講嘅當然係生理反應 ~ 大小二便啦，企咗响度五、六個鐘都無行開，由原來筆直，到依家腰曲，雙腳仲夾到實一實，想出想出咁款！ 






响我心裡依嘩鬼叫，出晒冷汗之際，忽然有人遞上一包檸檬茶，我望一望，檸檬茶嘅主人原來係 Samantha Lam 林小姐，我已經急到想瀨，妳竟然仲比包嘢飲我贈慶，我估唔到妳好眉好貌，心腸咁惡毒（講笑啫）！ 


我好有禮貌咁伸出嗰隻已經震騰騰嘅右手，接個佢包檸檬茶就話 


「多謝晒妳，林小姐」 






「唔好客氣，我頭先嘗試幫你聯絡位住客，不過無人喺房！」Samantha 微笑回答 


「真係唔該晒妳，林小姐」我點點頭就講 


「舉手之勞啫，你唔駛咁客氣，唔好林小姐前，林小姐後，你叫 Samantha！」Samantha 就話 


依家望真啲，其實 Samantha 都幾靚，頭髮到膊頭，面尖尖，眼大大，笑起上嚟，右邊有酒窩添！ 


「咁 …… 麻煩晒妳喇，Samantha！」我望到入晒神，口窒窒咁話 






「哈，仲嚟，我唔阻你喇，我收工先，希望你個朋友快啲出現啦，再見！」Samantha 講完就揮揮手 


「希望啦，再見！」我苦笑咗一下 


望住 Samantha 嘅離開，唔知點解，感覺話比我知，我可能會再見到佢。 


同一時間，感覺又話比我知，篤尿就要爆喇！！！


人地話 「屎（士）急馬行田」，依家我屎尿齊發，都唔知點形容好，急急腳跑入廁所，一開一關，一除一坐，一連串完美嘅動作，為免再有不必要嘅麻煩，一次過開個圍骰，一發勁，噢 ~~~ 爽晒！ 






去完，行番原位，從玻璃窗望向對面朗豪坊，隱約見到一個帶住紅色帽嘅女仔，佢可能就係 Priscilla，呢刻我就好似一隻受到刺激嘅公牛，心跳突然加快，推開玻璃門，响天橋上穿梭，入到商場， 


嘩 ~ 


夜媽媽成十點幾，有無咁多人啊，我好心急不停咁搵，Priscilla，Priscilla 妳究竟响邊？ 


我彷彿入咗迷宮咁，失去方向，企响廣場嘅中心，希望從人群中搵到紅帽，紅帽啊，喺邊吖？究竟佢仲喺呢層，定已經落咗去下面？抑或行咗上上面？上面！我向上一望，比我見到一個帶住紅帽，著住黑色長裙嘅女仔，企咗响條長長嘅自動電梯上面，我成個傻仔咁大叫咗聲 


「Priscilla ~」 






周圍啲人都將注意力放晒响我身上，我無理會佢地目光，衝上電梯不停咁跑，口裏不斷咁講 


「唔好意思，借借，唔好意思，借借 ……」 


貴為「牛頭角下邨跆拳道死仔」，生死一刻所爆發出嘅戰鬥力無疑驚人，但係响飢寒交迫下，一口氣衝上四層樓咁高嘅電梯，跑到大半雙腳已經軟軟地，不過，為咗 Priscilla，就算腳跛都要頂埋佢！ 


上氣唔接下氣，嗄嗄嗄 …… 終於 …… 終於上到八樓，但係嗰個帶紅帽嘅女仔已經消失得無影無蹤，望住另一條四層樓高嘅自動電梯，又到咗人生交叉點時間， 究竟逐間逐間鋪頭咁搵上去，定搭電梯上十二樓搵落嚟？ 


抬頭望上去，感覺望唔到帶住紅帽嘅女仔，於是我決定選擇一層一層行上去。