《印度 · 尋油 · 台灣妹》: 《四十》

世事往往就係咁，你唔需要果陣，成街都係的士，你急住要，就永遠都搵唔到一架！ 


千辛萬苦上到的士，望望錶，原來已經一點，我同司機大佬講十萬屎急，唔該快馬，但係有時啲嘢係無得預計，架車去到亞皆老街近中電附近塞死咗，陏都唔陏，再望望錶，一點四，神啊，求求你幫幫我啦！ 


好可惜神無理會我，我唔係摩西，只係文西，分唔開紅海， 所以情急之下，我唯有比錢落車，跑過去。 


一條大直路，但由街尾跑到街頭，無十零分鐘係去唔到，但我無得揀，咩都唔諗，起勢咁跑。 






整整一日無食嘢，跑到惠豐中心，個人已經虚虚地，但係一諗到過多三條馬路， 就可以見到 Priscilla，咩都要撑落去。 


由地下搭上大堂，個心噗噗、噗噗咁跳，門一打開，响大堂嘅旅客唔太多，我不斷向周圍咁搵，都搵唔到 Priscilla 嘅踪影，會唔會等得太耐，上番房呢？ 


從大堂上去三十一樓，唔知咩原因，有種唔好嘅預感，我唔知點樣形容，合埋眼，不斷同自己講，無嘢嘅，好快就會見到 Priscilla，咪自己嚇自己。 






一開門，我就衝去房號 3115 嘅方向， 


3109 


3111 






3113 


3115 


深呼吸一下，「叮噹」，快啲應門啦，Priscilla！


點解咁耐㗎，「叮噹」，Priscilla，我知我遲到唔啱，但係妳都開門先講啦！！ 


點會無人㗎，「叮噹、叮噹、㕷㕷㕷」 






「Priscilla，我啊，妳响唔响度啊？」我忍唔住大嗌 


可能太嘈，有個清潔女工响隔離房走咗出嚟，同我講 


「先生，你搵呢間房個住客呀？」 


「係啊，姐姐，個住客係女仔嚟㗎，你有冇見過佢？」我好心急咁問 


「有，佢十二點零鐘已經走咗喇喎！」清潔姐姐就答 






「吓！！走咗？出咗去咋！」我唔能夠相信姐姐所講嘅 


「唔係喎，佢執晒啲嘢㗎喎，見佢好似好唔開心咁，仲喊住咁走！」 


聽完佢咁講，我發晒狂咁跑到 "車立" 口，不停咁㩒個制， 


「快快快，快啲啊！」 


門一開，我即刻關門，跟住好似失控咁，不停㩒個大堂制， 






「快快快，快啲啊！！！！」