《印度 · 尋油 · 台灣妹》: 《三十七》

飛機終於降落香港國際機場，亦表示《杜如風》行動即將開始。 


一上的士，我同司機大佬講話去旺角之後，即時攞起手提，逐間酒店嘗試查詢，當然揀最大最新嘅朗豪酒店先，接電話位小姐好有禮貌，我問佢可唔可以用電話查詢我位朋友有冇入住，佢話可以，咁我就講出 Priscilla 英文全名，佢叫我等等，過咗一陣，佢就話 


「先生，有一位住客同你所提供嘅人名相同！」 


「真㗎，咁我可唔可以知道佢住邊間房？」我好開心咁問 






「唔好意思，我地係唔可以透露住客啲資料！」小姐就話 


「但係我有好重要嘅嘢要搵佢，可唔可以破例一次？」我好誠懇咁問 


「先生，真係唔好意思！」小姐再次講 






「咁 …… 好啦，麻煩晒！」我亦無再追問 


「唔好客氣！」 


好好彩，多得幸運之神眷顧，一次已經估中 Priscilla 住邊間，但 Du Kai Qing 呢個名唔算特別，為免攪錯，我都打埋去其餘八間酒店，以防萬一。 






一問之下，除朗豪之外，其餘都無，鎖定目標，我再同司機大佬講清楚去朗豪酒店，架車就全速前進。 


跟住我就發個訊息比花仔報平安，同話比佢知依家情況，好快佢就回覆，佢話暫時無 Priscilla 消息，電話亦都唔通，忽然「咇」一聲，原來電話得番15%電量，於是就同花仔講話保持聯絡。 


眨下眼就到咗朗豪酒店，其實我都係第一次嚟，朗豪坊就有去過幾次，抬頭望上去，原來呢座嘢咁鬼死高，上網一睇，呢間酒店有成四十二層，六百幾間房，雖然依家叫做縮窄咗範圍，不過，只係由大海撈針改為長江撈羮，一樣咁難！ 


上到四樓大堂，我行到櫃檯前表明來意，咁啱呢位小姐就係之前接電話嗰個，佢見我一面慘樣，就同我講 


「先生，住客資料我就真係唔可以透露，如果你想留言，我可以幫你轉達，呢度有紙同筆！」 






我攞起張紙，諗咗陣，就寫 


" Priscilla，我很想念你，Da Vinci " 


我張張紙對摺，响背面寫低電話，就交比嗰位小姐，我望一望佢個名牌 「Samantha Lam」，我就話 


「唔該晒你，林小姐」 


「唔好客氣！」