《印度 · 尋油 · 台灣妹》: 《二十二》

我同花仔傾傾下計，有兩個著低胸衫嘅印度女仔行埋嚟，問我地介唔介意佢地坐落嚟，突生異變，有女自己送上門，仲要係後生靚女，正常人都唔會抗拒啦，更何況係花仔強，可能佢今日餓女症發作，只見花仔異常興奮，個淫樣表露晒出嚟，仲駛出十八般武藝，士多啤梨蘋果橙，咩都出齊，跟住攞個銀仔出嚟玩魔術，變下變下，佢就摸下摸下，係咁同我打眼色，真係服咗佢。 


印度女性一向比人印象好保守，外表斯斯文文、神神秘秘咁，但係今日一見，又唔多覺得保守喎，就以依家嚟講兩個靚女都好鬼熱情，完全唔會收收埋埋，係咁大送秋波，天使面孔，魔鬼身材，仲要咁好客，實屬難得。 


多口問佢地做邊行，佢地忽然支唔以對，神不守舍咁，我都不以為然。 


飲飲下，其中一個靚女話要去洗手間，另一個就繼續同我地吹水、飲酒，無幾耐，佢就番到嚟，仲攞住兩杯飲品，話係呢間Pub獨有嘅，叫 “ANGEL HEART“，請我地試下喎，人地發揮好客精神，加個親切笑容，仲彈下彈下咁叫你飲，花仔緊係一馬當先 ALL IN 晒，我酒量麻麻，一飲落口，㖿 ~ 啲味道古古怪怪咁，原本都諗住飲少少算，點知雙拳難敵四胸，飲下又多啲，飲下又多啲，卒之成杯飲晒，跟住開始見到 …… 四個頭，八對波，之後就 ………………






「SIR， SIR …… 」 


人地瞓緊覺，邊條仆街响度SIR嚟SIR去呀，係咪想打吖！ 


「SIR，SIR，WAKE UP PLEASE ~ 」 






嗱嗱嗱 …… 真係佛都有火吖，夠喇，仲推我添！ 


我終於頂唔順用力企咗起身，但係眼皮實在太重，所以依舊合埋眼，吸咗啖氣，就講 


「咩料呀？你知唔知阻人瞓覺，猶如殺人父母，要拉去打靶㗎，咁鍾意 SIR， 你唔去 SIR 滑梯 …… （下删一千字）」 






「SORRY！SIR，WE NEED TO CLOSE ~」 


聽到呢句，我慢慢張開雙眼，嘩 ~ 啲光好刺眼，一睇，我依家响邊啊？阿叔，你邊位啊？咪住，我記起喇，呢度係印度的士高，我望一望右邊，發現花仔成 pat 屎咁趴咗响枱，成身嘔吐物。我隱約記得瞓之前好似同緊兩個靚女飲野㗎，依家周圍除咗啲職員，所有人都走晒。 


「SORRY ~ SORRY！WE WILL LEAVE SOON！」 


我拍一拍花仔，佢無乜反應，再拍，仍然 “北省人士“，於是我唯有運勁，拉弓，一野 “車“ 落佢塊面度，跟住收勁，果然有效，花仔即時醒晒，仲問我係咪有人打佢，我緊係話唔知啦。


十一月嘅新德里，溫差好大，日頭三十幾度，夜晚可以急降至十幾度，我同花仔離開的士高，兩條麻甩佬慢步街頭，原本仲有少少醉意，但比啲冷風兜口兜面吹埋嚟，咩都醒晒，我就同花仔講 






「天寒地凍，快啲打的番酒店啦！」 


「仆街喇！！！！！！！」花仔忽然大嗌 


「你發咩癲啊？」我腳步浮浮咁問 


「我銀包同電話都無撚晒吖，仆街喇！」花仔邊摷邊講 


「你搵清楚未？好在我嗰啲仲 …… 仲 …… 仲 …… 去咗邊吖？我嗰啲呢？點會咁㗎？」不幸嘅事又再發生响我身上 






我同花仔你眼望我望，搵過晒全身都唔見銀包、手錶同電話，依家連搭的士錢都無，今次大撚鑊喇 ………… ！ 


真係乜都無晒，唔單止啲財物無晒，佢地仆街到連支神油都偷埋，女仔人家妳偷我支神油嚟托咩，真係無陰公吖，天啊！！！！ 


流落異鄉，連番酒店嘅方向喺邊都唔知，夜媽媽飢寒交迫，除咗坐响地，附近都無咩好地方，星巴克、老麥 …… ，發夢啦你！ 


「瀨野啦，色字頭上一把刀，咁好客請飲野，彈下彈下咁好死，你老貓燒鬚喇，一鋪清袋，電話資料、信用卡、錢，仲有……」我坐响度發肥四，自言自語 


啊啊啊啊啊 …….