《印度 · 尋油 · 台灣妹》: 《二十一》

「嗱，即食嘅今日就無喇，聽晚殺唔殺？要就幫你安排，為免再有麻煩，响你地酒店度食，保證安全！」Ankit 拍一拍心口講 


「聽日呀 …… 唔 …… 殺你！咁今晚仲有無啲咩好嘢？」花仔諗咗一秒就答 


「的士高你去唔去吖？個場超大，音響又勁，最重要有好多後生女，去唔去見識吓？」Ankit 就提意 


「仆街，你唔早響，緊係去啦！」花仔聽到之後，即時生猛晒，就話 






「的 …… 士 …… 高 …… 呀？」我唔太願意咁講 


「横掂無地方去，咪當陪下我囉，唔好玩即走。」花仔雙眼發晒光咁同我講 


「我可以 SAY NO 咩！」我咪住眼話 






Ankit 揸咗二十分鐘左右，就到咗一個好大型嘅商場，外觀好時尚，玻璃外牆，幾層樓高嘅超大型廣告，同之前 Paharganj 市集附近，簡直係兩個世界，個對比實在太大，反差太強烈，一係好華麗先進，一係窮到住爛屋，有啲再慘嘅就一家大細响路邊住帳幕，好似遊牧民族咁，真係天堂同地獄嘅分別。


入到去，感覺有啲似香港嘅沙田新城市廣場，眼見啲人衣著光鮮，賣嘅嘢都有啲熟口熟面嘅鋪頭，好似 “三叔“ 手提電話、皇家體育用品、啲連鎖餐廳 ……，各式各樣，我抬頭一睇，個商場都有八、九層高，我地跟住 Ankit 搭上咗六樓，一出已經聲到啲節拍強勁咁音樂，Ankit 就同我地講 


「我唔入去喇！你地玩得開心啲，玩完就搭的士番去，聽日下晏三、四點再電話聯絡！」 






入場費兩位2500盧比，咪當陪花仔見識下囉，其實我咁大個仔都無去過的士高，點解？一來我個人比較靜，唔鍾意咁嘈， 二來香港啲的士高雜到暈，打交多過跳舞，一唔小心，殺錯良民無仇報，所以我一次都無去。 


撥開塊布，入面煙霧瀰漫，又黑又大煙，唔知以為拍緊 <救火英雄>，再行入啲，開始多番啲燈光，睇清楚，個場真係好大， 我呢啲未見過大場面嘅緊係好好奇咁周圍望，嘩，好大啊！一睇發現原來唔止得一層，足足有四層咁高，上面果三層睇落似飲酒傾計嘅地方， Ankit 真係無吹水，呢度真係超大，加埋應該有成十萬呎，可能今日係星期六嘅關係，眼見舞池無一千，都有幾百人，仲要一半以上都係女添，嚟咗印度咁多日，發覺出面街唔係咁多印度女性，依家我終於知道點解喇，其中一個原因可能係佢地日頭休息，夜晚先出嚟蒲 …… 


我同花仔搵咗個嚟舞池遠小小嘅位企，置身响呢啲震耳欲聾嘅音樂當中，我好似周身唔聚財咁，格格不入， 仲要播埋啲印度特色嘅音樂，我真係一啲都提唔起勁，相反花仔就完全溶入咗呢個環境，唔知係咪頭先响大隻佬按摩度谷得太行，佢依家對眼好似黑夜中嘅貓，不停左搖右擺，四周圍尋找獵物，我可以好肯定咁講，佢嘅生命力真係可以同曱甴相比，就算全世界嘅人死晒，只要淨番一本咸書，佢都可以好好咁生存落去。 


呢個勁歌熱舞嘅的士高裏面，池中嘅男男女女，响節拍強勁嘅音樂下，不停起勢咁 “UM“，除咗 “UM“，亦只有 “UM“，但係唔知點解响我眼中，佢地就如同中咗降頭一樣抽晒筋，差在未嘔白泡啫，你要知道跳舞係一門好高深嘅學問，跳到好似郭富城咁，當然好睇啦，相反，唔識跳而起勢咁跳，真係好鬼肉酸㗎，我明白大家只係想出身汗，發洩下，不過比著我，我都係覺得獻醜不如藏拙，純粹個人意見。


但係我知道花仔強一定唔係咁諗，唔知幾時佢已經走咗去舞池入面，响啲印度女仔面前表演舞技，由於池中大部分都係印度人，花仔既出現好容易引到啲女注意，同樣，可能啲女見佢幾靚仔，都唔介意同佢一齊跳，但係話晒都係人地主場，太過搶鏡係會出現一啲不必要嘅麻煩，我見勢色唔對，就行去拉番花仔過嚟，慢慢行上一樓搵個位坐。 






花仔跳到慶起，比我一野拉咗上一樓坐，當然唔係咁高興啦，我就同佢講話你再唔走，比人圍毆都似，之後我去買咗兩支啤酒，兩兄弟就响呢個唔適合傾計嘅地方傾心事，大家識咗咁多年，根本無乜秘密可言，可以暢所欲言，我就問佢 


「你成日溝女、食女，有無諗過停落嚟？」 


「有，不過未遇到啫，你又點呀？諗住下一步點？」 


「咩下一步點？」 


「咪同我嚟呢套，我緊係講你同 Priscilla 啦，我識你咁耐，從未見過你咁激動，响窗口發晒癲咁嗌。」 






「人都走咗，仲要响台灣，可以點吖！」 


「真係鍾意人咪去追囉，結局係點無人知，襯後生，衰咗仲可以再嚟過，份工無咗，亦都可以再搵過，但係愛情錯過咗，到最後只有後悔同遺憾！」 


識個衰仔咁耐，佢好少可咁認真講野，仲要好似幾有道理咁，我好開心能夠有一個咁好嘅兄弟。 


「花仔，多謝你！」 


「兩兄弟，講呢啲，飲啦！」 






咕咕咕，一口氣飲晒成支啤酒，啊 ~ 爽呀！同花仔傾完計，我好似明白咗啲嘢，人生在世有好多嘢係自己無辦法掌握，亦無辦法預計個結果，但係响呢一刻，我開始知道嚟緊條路應該點行。