《印度 · 尋油 · 台灣妹》: 《二十三》

啊啊啊啊啊 …… 


我一嘢彈咗起身，擘大個口，成個人無咗靈魂咁望住前面，陏都唔陏，企定定响度，花仔見我有啲唔妥，於是拉一拉我衫袖，我無反應，佢抬頭見我咁嘅樣，起身問我咩事，我依然無出聲，花仔亦無再問落去，隔咗陣，我就話 


「有啲野係你就係你，整定嘅，錢無咗，算，唔多，卡，可以報失，電話資料無晒，最多麻煩啲搵過，但係 …… Priscilla 嘅聯絡方法 ………… 無啦，無喇，咩都無喇！」 


「兄弟，唔見咗，你都唔想嘅，唔好灰心，希望在明天吖嘛！你唔見咗啫，有緣嘅話，佢一定會搵你㗎， 係咪？」花仔知我堅係唔開心，安慰緊我 






「唉 …… 原本諗好旅行後主動出擊，依家攪成咁，唔係等佢搵我，仲可以點吖！」 


兩條麻甩佬依舊企咗响度食風，食到咁上下，花仔唔知係咪受唔住燒鬚嘅刺激，失驚無神係咁笑起上嚟，仲 “Dum“ 晒地，見到佢咁失常，諗住問佢做乜，點知佢無啦啦拉開條褲鏈，伸隻手入去係咁摷，面容扭曲，仲不時發出「噢、噢」聲， 花仔你唔係黐到喺度起機吖！ 


數分鐘後，手終於停咗，但仍然未攞出嚟，隨之而來嘅係 






「登、登、登、登」


音樂响起同時，花仔徐徐地伸番隻手出嚟，手上面竟然多咗個黑色袋仔（同啲 __ 毛）！ 


我驚訝得捏住個鼻，問花仔 






「你攪邊科吖？」 


「兄弟，IT IS MAGIC ~ 我講過喇，希望在明天吖嘛！你睇 ….…」 


花仔慢慢打開個袋仔，然後响裏面攞咗幾張紙幣出嚟！ 


「嘩，你邊嚟得咁醒，收埋啲錢喺個春袋度吖！」 


「哈哈哈，去旅行將啲錢分開袋，常識吧！哈哈」 






果然世事無絕對，咩都比嗰兩個女賊偷晒，諗住今晚實要瞓街啦，點知一個百寶春袋，依家竟然絕處逢生，呢件事令我更加相信，只要唔放棄，總會有希望！



千辛萬苦終於番到酒店，但要解決嘅問題仲有一籮籮，基於保安理由，無鎖匙真係入唔到房㗎，無論你講到幾慘，死人塌樓都好，啲職員都不為所動，交涉咗好耐好耐，最終要比密碼叫佢地開保險箱，對晒證件先比我地入番房咋！ 


一坐低，就打去信用卡中心，將損失減到最少，兩個人四張卡，真係連屎都唔得閒痾，攪掂晒就打比家姐求救，簡短交代發生咩樹，就叫佢匯住幾千蚊嚟傍身。 


主要嘅要攪都攪晒，唔急嘅番香港先攪，唔見咗嘅想攪都無得攪，唉 ~ 望下個鐘，八點幾，連續兩夜都無乜點瞓，頻頻撲撲，成身臭汗，沖個涼醒下神。 


水不停打落埋面度，短短四日印度之旅，所發生嘅事遠超預期，人地話大難不死，必有後福，雖然我唔相信，但我都希望有咁嘅一日。 






換好衫，諗住同花仔落去食早餐，個死仔話攰唔食，咁我又唔想瞓住，唯有自己一個落去坐下。