喪"師": 24-只係由一個困境跳去另一個困境

直升機飛咗好耐，呢段時間我回想返我地差唔多一年嘅日子，由一開始嘅17個人，到依家加埋我得返10個人（明仔、言仔、天仔、蔡家偉、小非、樂樂、小航、小美、小千），死咗7個人（小仁、聰仔、輝輝、豪仔、小可、晴晴、詩詩、小森）。我地做咗好多好多犧牲先可以行到呢一步。我望住直升機下面，一片死寂，唔知又有幾多人好似我地咁幸運，可以生存到依家。之後，我見到直升機駛入咗一個圍牆之內，圍牆之內係一個普通城市咁嘅樣，但我就咁睇睇唔到圍牆嘅盡頭，一望無際，可以係一年之內興建咁大型嘅圍牆我真係相當佩服政府嘅技術。我地入到去之後就俾一班著住防護服嘅人帶去隔離，抽血驗血，沖涼換衫。隔咗一段時間確定我地冇受感染之後，就被安排以後係指定嘅房間到住。佢地幫我地查過資料，除咗小非、樂樂、明仔同埋小美嘅父母人係呢到，其他人嘅屋企人都冇消息。
突然被救返，但我父母、呀哥都冇消息，我個人感覺好空洞，之前我係為咗班細路而活，依家好似突然冇咗生存意義咁，完全唔知自己做緊物。好似只係由一個困境跳去另一個困境咁！然後，有相關人士帶我地係圍牆內參觀，呢到猶如一個小城市，除咗衣物同埋糧食都係由政府統一發配外，好多城市應該有嘅設施都一應俱存，圖書館、學校、警局、地鐵、巴士。係入咗嚟呢到之後，我就冇再同啲細路見過面，但據我所知，佢地都已經被安排入咗小學到讀書。
個晚食完野之後，我睇新聞，大概了解咗依家嘅狀況。呢個圍牆中城係係半年前建成嘅，如同喪屍冇爆發過咁嘅一個城市，如常運作。各國專家正致力研究喪屍病毒嘅解決方法，但至今仍一無所獲。
睇完電視之後，我一個人係廳到呆坐。喪屍病毒爆發，以致人口密度大降，所以係呢度我先可以被分配一個人住300呎嘅屋。以前成日係到諗俾我買到樓，我實開心死，但依家俾我一個人住咁大地方，我就完全笑唔出，不知生存有何意義。到咗第二朝，有人瘋狂拍門，叫「警察，開門！開門！」
我一開門，佢地就圍住我，講：「依家懷疑你涉及多宗謀殺案，請你跟我地返警局接受調查。」
謀殺？我只諗到係未被救嘅呢段時間入面，我的確被逼殺過好多人。於是我好順從咁跟佢地返差管。依家嘅我仲未知道，我已經成為大眾眼中大奸大惡之人。啲新聞全部都係話我為咗一己私利，為咗自己可以生存，殺曬啲唔聽話嘅學生。直到啲警察對我嘅態度同俾我嘅待遇奇差，然後俾我睇電視上鬧我嘅新聞我先知。我見到明仔係到接受訪問，將我講成冷血又兇狠嘅人。係被拒留其間，有個人嚟探我，我好奇怪，我係呢個地方已經冇曬親人，仲有邊個會嚟。當我呀哥係門口行入嚟嘅時候，我隔住玻璃望住佢，激動到掩面痛哭。
佢流住眼淚問：「究竟發生咩事？豪仔⋯⋯係咪你殺嘅？」
「我⋯⋯我⋯⋯殺佢嘅時候佢已經變咗做喪屍，我係迫不得已。」
呀哥低頭抺眼淚，似係到消化緊我講嘅嘢，未幾就對我講：「我就知道，你唔會做啲咁嘅事！點解出面啲消息傳到咁！」
「我唔知道！但你放心，我問心無愧！」本以為勝負已與我無關，但依家我呀哥係到，為咗呀哥，我要證明我係清白嘅。開庭嘅日子已經定好，但因為我嘅惡事已經係出面傳到沸沸掦掦，冇律師肯做我嘅辯護律師，我只能自己幫自己辯護。




開庭當日
「被告李小兒被控7宗謀殺，受害人係佢嘅學生，分別係李小仁、謝明聰、陳明輝、陳建豪 、李詩詩，吳晴晴、蔡小森。佢地年幼如此，被告都狠下毒手，被告簡直就係喪盡天良。」控方開始盤問
「被告，請你回答我剛剛我所陳述嘅人係咪你殺嘅？李小仁、謝明聰、陳明輝係你見死不救而死嘅，李詩詩，吳晴晴、蔡小森、陳建豪係你親手殺死嘅！」
「係！但當時佢地⋯⋯」
「係就岩啦！你只需要答我係定唔係就得啦！」
係控方開始盤問嘅過程中，我完全冇辯解嘅機會，形勢非常不利。
到之後控方盤問啲學生，佢地都係簡啲不利我嘅問。
尤其到盤問明仔嘅時候，佢簡直就斷章取義。輪到盤問言仔嘅時候。係我地入城之後第一次見面，佢向住我輕輕點頭。
「你係咪親眼見到被告殺死你嘅同學，李詩詩、吳晴晴、蔡小森？」
「係！但Miss係身不由己！」




控方大狀聽到嚇咗一跳，好快又問：「答辯人你知唔知咩叫『身不由己』，係咪被告教你咁講？」
言仔猶豫咗陣。
控方大狀就轉向同法官講：「一個7歲嘅小朋友，小一學生，佢知道咩叫『身不由己』咩！佢根本就唔知個詞係咩意思，好可能係被告教佢講嘅！」

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/