喪"師": 25-佢身不由己，我地都身不由己！

言仔猶豫咗陣。
控方大狀就轉向同法官講：「一個7歲嘅小朋友，小一學生，佢知道咩叫『身不由己』咩！佢根本就唔知個詞係咩意思，好可能係被告教佢講嘅！」
正當法官想開口嘅時候，言仔一口氣講咗好多嘢：「我知，我知咩叫身不由己，就好似明明係人命，但為咗阻止喪屍病毒擴散，我地政府封咗以南嘅城牆，由剩底嘅市民等死；就好似大狀你，如果接咗一個case，就要以client嘅利益為先，即使你知道佢有犯到法；就好似我，我根本唔中意亦都唔叻讀書，但為咗我父母嘅期望，我仲要死讀爛讀。Miss佢為咗大家都可以生存，先至殺咗受感染嘅同學。⋯⋯⋯⋯Miss佢身不由己，我地都身不由己！」言仔講到呢到另轉頭望向我，對住我苦笑，而我早已滿臉熱淚。後來，到我自辯嘅時候，我問返好多事實出嚟，證明我唔係蓄意殺人。最後罪名不成立，但控方又改控我其他嘢，控我誤殺同埋虐兒，話我唔俾啲學生接受教育。我自辯嘅時候都係「身不由己」呢個point嚟打，外在環境因素令我唔可以俾到教育佢地。係命都未必保得住嘅情況下講教育，唔係好可笑咩？
我係庭上講：「我係為咗保住所有學生條命，我地大部份時間都係到求生，缺少教育都係情有可原！」
「你俾返個咁蠢嘅仔俾我，我寧願佢死咗呀！」但旁聽席個到傳嚟反駁，我認得出聲個個係樂樂嘅媽咪，我呆咗，因為我真係估唔到一個母親竟然可以講啲咁狠心嘅說話。控方亦呈上另一證供，指出
「其中一個學生-陳小美患上創傷後壓力症候群同斯德哥爾摩症候群，佢對心理學家講佢人生中最開心嘅日子就係係野外逃生嘅日子，可以瞓夠8個鐘唔使擔心功課。斯德哥爾摩症候群係人類嘅自我防衛機制，同自己講自己好安全，好開心，從而忘卻生命受威䝱嘅恐懼。歸根究底都係被告唔俾佢地接受教育所致嘅！」
我好無奈，佢地有冇諗過小美講嘅都係真嘅！
唔一定要生於亂世，先會有壓力。最後
「本席宣判被告誤殺同埋虐兒罪名成立，誤殺罪名判監一年，虐兒罪名判監二十年。」
聽到判決，我絕望咁望向旁聽席嘅呀哥。




而言仔就衝到我面前，講：「Miss，對唔住呀！對唔住呀！我幫你唔到。」入獄之後，呀哥同埋言仔嘅信就係我活下去嘅動力，只有佢地信我，支持我！十五年後嘅一日，我收到明仔嘅信，信入面寫：
「多謝你！多謝你教識我咩叫弱肉強食，適者生存！
因為你，我先會咁成功！」  
#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/