喪"師": 23-為咗生存，已經用盡我所有嘅氣力

一齊挖咗3個大窿，為小森，詩詩同埋晴晴各自做咗個墳。
Miss咩都冇再講，只係跪坐係墳前呆望，一直坐到晚餐都唔食，我就坐係佢後面望住佢嘅背影。我知我唔會明白一次又一次咁親手殺人係有幾咁絕望，所以我真係唔知可以點安慰佢，只能咁樣陪住佢。過咗5點，天開始黑，我同Miss講：「Miss，天黑啦！返去休息啦！你一定好攰㗎啦！」
Miss沉默咗5秒，淡淡咁講：「係呀，真係好攰！為咗生存，已經用盡我所有嘅氣力！」
之後Miss就帶住我返返入營。到咗第二日，Miss集合我地交低咗啲嘢之後，就話要出去搵物資，然而我地依家嘅物資係夠用嘅！我諗可能Miss係想出去散下心，但當我見到佢留低係營地嘅隨身包，我就有不安嘅預感，佢唔會係想做傻事掛。因為平時出去佢都一定帶佢嘅隨身包，入面有刀同埋剪刀可以防身。而我發現Miss冇帶隨身包已經係佢出發咗10分鐘之後嘅事。
我即刻追咗出去，今次我見佢行正常山路，咁只要我沿住山路跑應該會追到佢。
事不宜遲，我拎咗個隨身包同埋一個木棍就跑。跑住半個鐘，終於俾我見到Miss就係前面，我冇叫佢，只係偷偷係後面跟住佢。我跟住佢一路行一路行，行到12點，行到3點，我開始有啲焦急，如果我地再唔行返轉頭，天黑前就返唔到去。
嚟到呢到我終於明白，其實Miss根本就冇諗過要返去。我繼續跟，我跟得出嚟就唔怕死，要返就要一齊返去。我跟住Miss去到一個小碼頭咁嘅地方，Miss坐咗係到，天已經開始入黑，佢望住日落，我望住佢嘅背影同埋日落，只有無奈同埋無奈。我見Miss完全冇去意，我行上前係佢背後講：「Miss，入黑啦！我地要走啦！」
佢另轉頭驚訝咁望住，講：「你點會係到㗎？」
我講：「我地一直走到依家，一啲都唔簡單。珍惜自己條命。大家要互相扶持、互相幫助咁行落去。你唔係咁同我地講嘅咩？」
Miss聽完呆咗兩秒，之後就拖起我隻手跑返去。「嚟嘅時候我見到涼亭個到有個流動廁所，我地可以去個到避一避。」我同Miss講，因為我知道我地依家要係入黑之前返去營地已經係冇可能嘅事。




「好！」
我地瘋狂咁跑，但都唔夠個天黑得快。而且因為唔熟路，就連開咗電筒，我地都係咁仆親，我地仲聽到附近有喪屍嘅低吼聲，就更加緊張啦！但距離流動廁所仲有成15分鐘路程，最後Miss放棄去流動廁所，佢托咗我上一棵樹嘅樹幹到，自己亦好快爬咗上嚟。然後用啲藤圍綁住我地條腰同埋樹幹。
「今晚我地就係樹上過夜啦！再趕路太危險啦！」Miss講。
「嗯！」
過咗好一陣，Miss同我講：「對唔住！」
我冇講咩，只係拖住佢隻手，佢亦握緊我隻手。到咗第二朝，我俾好大嘅動靜噪醒。係遠處直升機嘅聲音，我好激動，係咪救援嘅人呀！佢地係咁遠見唔到我地，但今次返營地，我地就知道要做啲求救信號。我同Miss相視而笑，眼中又重燃希望。我地快步趕返返營地，心諗啲同學一定好擔心我地啦！而我地好似越行越近直升機，直到我地行返營地先知道，原來個架直升機係嚟接我地嘅，其他同學已經上曬機。上咗直升機，Miss攬住我係我耳邊講：「多謝你！我差啲就錯過咗生存落去嘅機會。」
直升機機翼嘅聲音大到我差啲聽唔到Miss講嘅嘢，我眼泛淚光咁望住佢，然後係佢耳邊講：「多謝你！因為你，我先有機會生存落去。」


#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/