喪"師": 20-放任佢地只會令佢地得寸進尺

我實在錯得太離譜，竟然相信佢地。呢晚，我好想瞓，但徹夜不能眠，心心念念都係詩詩同埋晴晴，諗緊佢地究竟去咗邊，係咪迷路？就算冇喪屍，佢地兩個係野外都好危險，更何況佢地冇糧食，又冇地方瞓。
到咗第二朝，天稍光，我就出咗營，叫曬所有人起身，同佢地講離隊嘅嚴重性。
「我地已經有兩個人因為離隊而失蹤，我地咁多個，一直走到依家，一啲都唔容易，我希望大家可以互相扶持、互相幫助咁行落去。你地每一個人條命都好珍貴，所以你地每個都要珍惜自己條命，唔好因為一時意氣做一啲危及自己或者大家嘅生命，明唔明？尋日詩詩同埋晴晴失咗蹤，我今日會去搵佢地，小非、小可、樂樂你地跟我嚟，同我講佢地係邊到開始離隊。但由今日開始，所有往返田地嘅小隊都要由我帶領往返，確保我地『每一個人』都係安全嘅！」
今日我就帶咗小非、小可、樂樂加多兩個學生去田地，沿途佢地同我講詩詩同埋晴晴係邊個位置離隊，我就陣間返轉頭係個到開始搵，等我差唔多時間我就返嚟接返佢地走。係搵人嘅路上，我都做咗好多記號，如果唔係陣間返轉頭唔認得路。兩個細路應該走得唔遠，我只怕佢地盲目咁行，轉咗唔知去邊！但我搵咗一日、兩日、三日、一個星期、兩個星期都搵唔到佢地，即使我知道佢地生存嘅機會已經好渺芒，我都堅持每日去搵。每條行過嘅路我都留低唔同嘅記號，只希望佢地見到之後識跟住返嚟。
大家都知道詩詩同埋晴晴失咗蹤，但冇人敢提起，大概大家都知道佢地都係兇多吉少，而日子我地都繼續過。之後個幾日我帶小隊前往田地，我都見到有幾隻馬騮係路上望住我地。以前係屋村嘅時候就已經見過啲馬騮成群結隊咁搶市民手中嘅物品。唔通啲馬騮已經留意到我地有糧食，想嚟搶。我地係田地拎食物返嚟嘅時候都係一小袋，一小袋咁拎嘅。
終於，有一次好幾隻馬騮衝埋嚟搶我地袋薯仔。
「放手！由佢地。」
因為怕啲學生受傷，我叫佢地唔好反抗，由佢地搶走袋薯仔。
但畜牲就係畜牲，放任佢地只會令佢地得寸進尺。
個時嘅我從來冇諗過我地會因為咁而犧牲比糧食更重要嘅嘢。經過被搶後，我就叫學生以後拎糧食要放衫入面，等佢地見唔到。而且要帶武器防身，必要時就攻擊返啲馬騮。幾日後，啲馬騮又係路上出現，比起上次又多咗幾隻，睇嚟我地有食物嘅信息已經係佢地之間傳開去。啲馬騮慢慢行近我地，我揮動手上嘅木棍，佢地又行遠小小，但依然跟住我地。突然，其中一個馬騮跳咗上小森身上，小森衫入面收埋咗薯仔，其他馬騮又陸續攻擊其他學生同埋我。我用木棍打向爬上小朋友身上嘅馬騮，之後啲馬騮將小森衫入面嘅食物搶到手後就走咗。我即刻望望啲學生，身上都有啲抓痕，不過都唔係啲咩大傷。我一面行返營，一面諗啲馬騮真係又聰明又兇狠。我地完全處於被動，但不停俾佢地搶落去都唔係辦法，我地啲糧食一啲都唔鬆動，只係緊緊夠用。點知我返到營地有更壞嘅消息等住我，係營地嘅學生同我講呢到啱啱都俾啲馬騮搶咗一轉，我望咗望，田地有被挖過嘅痕跡，啲馬騮足足搶咗我地一星期嘅糧食，睇嚟我地之後每餐嘅量又要減小啲。而且，我好肯定啲馬騮好快就會再嚟搶，因為佢地又點會識積谷防饑，佢地又點會知道我地嘅糧食都會俾佢地搶曬。如果唔俾啲顏色佢地睇，佢地就會一冇野食就嚟搵我地，我地冇嘅時候又會攻擊我地。




第二日，我摘咗啲size生得夠嘅農作物放入營，先保全咗可以摘嘅糧食先。之後就冇其他辦法，如果啲馬騮再嚟，我只能用僅餘嘅武器趕佢地走。除此之外，我諗唔到其他嘅方法。但不同以往嘅係，今次我知道「不成功，便成仁」，因為我地嘅糧食變得好短缺，而且再俾啲馬騮搶到，佢地只會食過返尋味，後患無窮。
我坐係田地旁邊等，一面望住啲學生係田地到做嘢，一面守住塊田。雖然我有心理準備，啲馬騮好快會再嚟，但我見到佢地嚟嘅時候我都嚇咗一跳，因為目測竟然有20隻。「全部匿埋一邊！」我對學生講。
啲學生退到我後面。我拎咗學生手上嘅剷，對佢地講：「行遠啲，保護好自己！」
我企係田地嘅中間，對住圍住田地嘅馬騮揮動個剷，但佢地無動於衷，其中一隻馬騮跳入田地到挖後，其他馬騮都開始跳入嚟。我一嘢用剷打落一隻馬騮到，有啲馬騮見到繼續挖，有啲飛撲上我身到，抓我，咬我。我掙扎，再打。我捉住我身上一隻馬騮嘅腳，用力將佢達落地下，不停達，不停達，達到佢唔識郁為止，再一面講粗口，即使我知道啲馬騮根本聽唔明！
我面目猙獰咁對住啲馬騮咆哮：「呀～呀～你班仆街～我唔會放過你地！今日唔係你死就係我亡！（我一野剷落埋頭挖食物嘅馬騮到，剷入佢地嘅血肉之中）食你條命呀！咁中意食！」
但以一敵20，我始終有啲吃力，我攰到用剷胡亂揮舞，而田地已經俾啲馬騮挖得混亂不堪！就係呢個時候，我餘光見到啲學生拎住啲武器加入戰團，我喘住氣同佢地講：「匿埋呀！」

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/