喪"師": 19-我實在錯得太離譜，竟然相信佢地

以下為言仔角度：等多5分鐘都唔見Miss 的話，我地都要入營！
5分鐘後，正當我地準備入營休息嘅時候，我聽到樹林入口處傳嚟急速穿過草叢嘅「沙沙」聲，而且越嚟越近，直到一個黑影係樹林入面跑咗出嚟！好似聖誕老人咁背住一個大袋，我就知道呢個一定係Miss。佢好快咁衝到我地身邊，我地都好開心咁講：「Miss，你終於返嚟啦！」
「我地好擔心你呀！」
「係呀！係呀！」
但佢好快咁數數人頭，然後講：「我搵到糧食啦！有咩聽日先講，快啲入營休息！」然後就趕曬我地入營。Miss順利返到嚟我好開心，佢話搵到糧食我就更激動！因為至少咁樣，Miss就唔使再出去冒險，我地唔使再擔驚受怕。到咗第二日我一起身，就見到Miss已經坐在係營地旁邊等我地。我見到佢手上拎咗一盤野，入面放咗一粒粒黑色嘅嘢，唔知係咩嚟！等到大家都起曬身，集合好。
Miss對我地講：「我係距離呢到1個半鐘路程嘅地方搵到另一塊田地，同呢到嘅田地一樣大，我相信只要我地keep住係兩塊田到耕作，係未來嘅日子，我地都可以自給自足，唔使再為糧食而擔心。但由聽日開始，我地會帶你地輪流去另一塊田地到幫手，大家分工合作。尋日本身我可以好早就返返嚟！但我係路上見到一棵桑子樹！見你地咁耐冇食生果，我就爬咗上去摘啲返嚟俾你地食，點知摘到唔知時間，所以先咁遲！」Miss將盤桑子遞上前，一開始我地疑感咁將呢舊黑色物體放入口，之後就一啖接一啖咁食，都幾甜幾好食，我餘光見到Miss望住我地係到笑。
我問：「Miss，你唔食？」
「我擇個時已經食咗，你食啦！」由個日開始，我地嘅工作量多咗，Miss亦俾咗更明確嘅分工俾大家，執柴，淋水，洗衫。Miss每次都帶5個人去另一塊田，因為距離遠，工作量亦因此增多，去嘅時候要一人拎一桶水去，淋完之後覺得唔夠仲要行多轉。即使之後，Miss已經係沿路加咗好明顯嘅認路記號，但佢堅持每日都帶住大家一齊去，驚我地自己行會有意外，見到佢日日咁行法，我都覺得佢會好攰！直到一日Miss瞓晏咗，我地都冇叫醒佢，想佢好好休息，我地返到嚟嘅時候，係半路見到佢焦急咁趕路，見返我地先鬆一口氣。我地一齊返到去之後，佢鬧我地唔應該擅自行動，咁樣好危險。「Miss！我地都覺得你日日去太攰啦！應該休息下，而且我地都認得路。」
「係呀！Miss，你放心啦！」---以下為Miss角度：見到佢地咁貼心，我都好欣慰，之後都逐漸放手俾學生幾個結隊自己行。但我提醒佢地要嚴格遵守我定嘅規則，唔可以離隊同埋偏離路線。其他學生去執柴嘅時候，我都劃咗一個範圍俾佢地，叫佢地絕對唔可以行出去更遠嘅地方，佢地信誓旦旦咁應承我。我地就咁安然度過咗半個月。但我係我可以完全控制大局嘅時候我冇咁做到，因為咁，之後所發生嘅事令我後悔莫及，亦令我明白細路就係細路，佢地講嘅說話根本唔可信。一日，前去田地嘅5個學生去到4點半都未返到嚟，我焦急咁等，但最後只有3個細路返咗嚟！冇返嚟個兩個係詩詩同埋晴晴，我問其餘3個（小非、小可、樂樂），佢地閃閃縮縮咁話詩詩同晴晴自己離隊，我再追問，佢地就話啱啱佢地鬧交，所以詩詩同晴晴就自己走咗。
其實細路之間發生呢啲事好平常，但因為呢個危險嘅環境令件事複雜好多。而礙於即將入黑，就算要搵人都要等第二日，我俾佢地先入營休息。




我瞓係營入面，真係好後悔，我點會相信一班細路可以成熟地控制自己嘅行為情緒，如果佢地知道係適當嘅時候做適當嘅事，就唔使大人睇住啦！
我錯啦！我實在錯得太離譜，竟然相信佢地。

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/