喪"師": 21-因為咁，我地犧牲咗比糧食更重要嘅嘢！

但以一敵20，我始終有啲吃力，我攰到用剷胡亂揮舞，而田地已經俾啲馬騮挖得混亂不堪！
就係呢個時候，我餘光見到啲學生拎住啲「武器」加入戰團，我喘住氣同佢地講：「匿埋呀！」但啲學生冇理我，同我一齊對抗啲馬騮，而我就由保護塊田轉移至保護啲學生，掹走撲上啲學生身上嘅馬騮。而啲學生就學我一樣咁對住啲馬騮好似野獸咁咆哮！
「呀～呀～」
除咗咆哮聲之外，我亦聽到淒慘嘅叫聲。我望過去，係小可發出嘅！只見佢隻右眼被抓出深深嘅血痕，瞓咗係地下慘叫。我見到有學生受重傷，我就更緊張，瘋狂剷落啲馬騮到，然後衝過小可身邊擋住所有衝埋嚟嘅馬騮。直到啲馬騮俾我地打到得返兩三隻，佢地就知難而退咁跑走咗。望住凌亂嘅田地同滿地馬騮屍，我筋皮力竭亦衝到小可面前睇下佢嘅傷勢，我見佢右眼上面有好深嘅血痕，好似半個眼球都被挖咗出嚟咁！我將佢抱入營到，向其他學生發出指示：「你同我煲啲熱水，你同我洗條乾淨毛巾！」
除咗眼上嘅抓痕，小可身上都有啲抓痕，我心痛咁摸摸佢個頭。
「我係咪會盲？」小可問。
「冇事㗎！放心好好休息！」我見到佢右眼傷得好嚴重，十成九會盲，更可況我地呢到冇任何急救物資，但我只能用善意嘅謊言安慰住佢。而依家我只能用熱水幫佢抺下傷口，用毛巾覆蓋好減低出血同埋感染嘅機會，最重要係保住條命先。傷口冇再出血之後，小可就昏昏沉沉咁瞓咗。我叫言仔睇住佢，有咩事即刻同我講。
因為我地塊田俾啲馬騮攪成咁，點都要處理下，而我出到去，見到啲學生已經自動自覺盡力還原塊田。我拎咗一個大垃圾袋，將地上嘅馬騮屍執入袋，然後打結放入泉水到。咁樣用泉水嘅低溫冰住，啲肉冇咁易壞。雖然我地田地被大大破壞，但呢啲馬騮肉都夠我地頂一陣。
呢啲馬騮令到小可冇咗隻眼，就算我煎佢地皮、拆佢地骨、食佢地肉都不為過。
我亦相信，經此死戰，佢地都唔敢再嚟！到咗夜晚煮好晚餐嘅時候，我拎咗個薯仔入營諗住喂小可，但我叫極佢佢都昏睡不起，成個身好熱，仲突然抽搐起嚟！我見小可咁嘅情況，好可能係感染引致嘅發燒，但我地冇任何醫療物資，依家只能聽天由命，睇下小可捱唔捱得過。但我突然諗到車上面有止痛藥，就算對病情冇幫助，但咁至少都可以令小可好過啲掛！而個時已經5：00，天開始入黑，但我唔理得咁多，因為小可好可能捱唔過今晚。於是我叫曬啲學生入營後，我就一人衝落去車個到，我跑呀跑，30分鐘路程跑返落去只用咗15分鐘，天已經黑咗好多，我跑返上去嘅時候個天慢慢黑到伸手不見五指，一開始我唔敢開電筒，一面係黑暗之中向上衝，一面不停咁仆親。直到我仆多過行，我開咗電筒向上跑，不停跑，不停跑，我知道我唔可以停，因為小可係到等緊我。終於我跑返返去，入營之後我仲聽到小可嘅呼吸聲，我用水喂小可食咗粒止痛藥，幫佢蓋好當成被嘅橫額。然後我拖住佢隻手瞓低，但我冇入睡，我拖實佢隻手。




但我只感覺到小可隻手，越嚟越凍，越嚟越凍，直到一啲溫度都冇。營入面越嚟越靜，越嚟越靜，直至得返我嘅呼吸聲。
#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/