喪"師": 16-教佢地冇咗我都可以生存落去

點知我實在太攰，眼皮勁重，隻眼撐都撐唔大，好快就昏睡咗。直到我俾透入嚟嘅陽光曬到有啲熱，醒咗！營嘅拉鏈位半開，但營帳入面早已空無一人。我坐起身，望望手錶，原來已經11：00，我真係好耐冇瞓得咁沉。我行出營，著緊鞋嘅時候就有學生同我打招呼。
「Miss早晨！」
「早呀！」
我見到另一個營個拉鏈位係全開嘅，於是我關埋兩個營。然後再見到有啲學生係營嘅旁邊坐，有啲係田地附近行嚟行去。我叫一個學生叫曬所有人係到集合，之後我就去咗洗面，返嚟嘅時候，大家都已經係營旁邊企定定。
我數人數，齊人。
「以後你地都要好似咁，每朝起身梳洗好之後就集合，我就同大家講當日嘅安排。如果我冇特別安排，你地可以係呢個範圍內自由活動，但千奇唔好離隊。你地唔熟呢到，好易迷路，如果你地走失咗，我真係唔知去邊到搵你地。另外 ，我啱啱見到個營係開住嘅，你地每次出入個營都要記得關埋個營，如果唔係啲蚊呀，蟲呀就會飛曬入去，夜晚有排煩。陣間我會執下啲嘢，計劃下我地之後點，你地就留返係到休息啦！我俾你地自由活動，但唔好玩得咁激烈，我唔想大家浪費體力。啱啱你地冇關營，應該入咗啲蚊入去㗎啦！你3個同我入去捉返啲昆蟲，整返乾淨個營，你3個整呢個營。
之後我地會每1個鐘集合一次點人數（我望望班學生，都有好多個有帶錶），跟我隻錶，我隻錶依家11：30，所以下一次集合係12：30，我唔會提你地，自己集合好之後叫我。另外小千同埋言仔分別係自己營嘅組長，每20分鐘就數一次自己營嘅同學係咪係到。明唔明？
好！解散！」之後我就去咗整理一下啲物資，有3個電筒，我試咗試都用到。於是我一個營放咗一個，剩一個電筒，我就袋住係我嘅小腰包。另外，剪刀同埋刀我都袋住防身。報紙就放埋一邊先，可能遲啲生火用到，即使我根本唔識鑽木取火，我試咗試個gas 爐，好在用到。另外旁邊仲放咗3個gas，打邊爐一個gas可以用到3個鐘左右，我地要長期作戰，所以要省啲使，咁我地每次都要以最短時間煮好啲嘢！
好啦！我決定咗每日只煮一餐，反正我地都唔係好多糧食。煲水之前就要將啲水放係陽光之下曬熱咗先，咁啲水就可以快啲滾。
正當我仲執緊嘅時候，晴晴同埋詩詩走嚟搵我問：「Miss，我地有冇咩可以幫手呀？」




我聽到之後微笑講：「有呀！（我見啲布，煲，煎pan同埋盤都有啲污糟）你地可唔可以幫我洗下呢啲呀？」
佢地就拎咗去洗，其他同學見到佢地係到洗都有幫手。之後我就去睇下個田種咗啲咩！小小嘅田地分咗3等份，一份種咗生菜，一份種咗蕃薯，一份種咗粟米。我摸摸啲泥，有啲乾，我之前去參觀有機田地，農埸主人話要每日都要淋水，淋到成塊地濕曬至夠。雖然我唔知道佢當時係講種啲咩，但我諗都差唔多啦！我諗生菜係最唔放得，我地先食咗生菜先，食曬之後就用個部份嘅田種其他嘢。我見到旁邊放咗幾包種子，但上面咩都冇寫，唔知係咩嘅種子。咁是但啦，到時每樣種啲。
點知種咗䓤或者蒜頭出嚟就仆街了。
呢塊田啲作物，省啲食應該都可以食到1個月嘅。
「Miss，我地集合好啦！」小千走嚟同我講。原來咁快已經過咗一個鐘。
我過去點齊人數之後開始分配新嘅工作，有幾樣嘢我地要準備定嘅！
嘅然我地要種嘢，就要有肥料，我地冇，咁只能用糞便啦！所以我地就要草定先！如果唔係到時就「屎到用時方恨冇」。
「你地3個同我係田旁邊嘅兩棵樹後面，挖一個洞，有幾深得幾深！你地2個同我擇啲咁咁大嘅樹葉。」我拎咗兩個剷俾佢地，打算就用呢個洞嚟作為廁所，樹葉就當廁紙巾用。
「另外你地2個係到淋水，用個條喉（呢個田地嘅主人竟然連喉都駁埋，咁我地淋作物就方便好多啦），淋到成塊田都濕曬為止！」
「其他人就係周圍搜集下物資，睇下有冇人丟咗係到嘅物資，例如水樽、袋、遮，然後搵的可以用嚟做武器嘅嘢，例如粗樹枝、鐵通呢啲！明白就解散！」事關我地真係冇咩可以防衛嘅武器。我都打算之後要教下班學生走無可走時點對抗喪屍，我一個人保護唔到佢地咁多個。今日可以做嘅得做得七七八八，聽日仲有好多嘢要攪。




教佢地爬樹，保護自己。
再搵個方法俾大家可以沖涼。
仲有要教佢地好多嘢！
教佢地冇咗我都可以互相扶持咁生存落去，因為難保有一日我俾喪屍殺咗。咁今日就教咗佢地點用gas爐先啦！

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/