喪"師": 17-如果唔關喪屍事，呢個其實都係一個幾好嘅野外體驗！

我望一望佢地搜集覺得有用嘅物資。
有幾個水樽，我叫佢地洗乾淨放好。可能我地要出去搵糧食或者物資都可以帶啲水。
有啲粗樹枝，枴杖，遮，我都係叫佢地洗乾淨，放一兩個係營入面以防萬一。
另外佢地仲搵到一件衫，同一啲放炭嘅空袋。我將啲空袋剪成一塊，綁係個DIY廁所嘅兩棵樹之間，可以擋一擋。
之後我就同佢地講：「以後呢到就係我地嘅廁所，草起啲糞便有可能用嚟做肥料，遲啲用嚟種嘢！」
「咁我地咪啫係食屎！」樂樂聽完笑住咁講。
我都笑住咁講：「你可以食嘅！我同其他同學就食種出嚟嘅農作物！」
其他同學聽到都哄堂大笑。我靜靜咁望住成班學生輕鬆咁笑，心諗呢種安穩仲可以維持幾耐！好不容易帶大家去到一個比較安全嘅地方，我希望我地全部都可以平安地等到救援嚟嘅個一日。就咁，我係4點半煮好白灼生菜俾佢地，等佢食飽，夜晚先瞓到好。到咗等二日，可能我休息夠啦！今日比佢地每一個都早起身。我一個人起身梳洗，覺得個身真係好臭，我將外面件衫除咗出嚟，我入面仲有著一件背心。我洗乾淨件衫，係兩棵樹之間拉起一條線，將件衫掛係上面。
咦！我諗到班小朋友可能同我一樣入面都著咗件背心仔，等到佢地起身嘅時候，我逐個係佢地背後嘅領位翻，見到大部分人都有著打底。我就叫個啲人除咗外面個件衫，然後教佢地洗乾淨件衫。雖然冇洗衣粉，但以前啲人都冇啦！擦多幾次就會乾淨㗎啦！大家都洗好之後，我就幫佢地掛好，咁等第二朝件衫乾咗之後，佢地就可以輪流係到沖涼，除咗身上件背心，著返外面乾淨個件。而入面冇著背心個啲，我就借自己個件同埋洗乾淨執返嚟個件俾佢地。但下身就唯有照著返污糟個件啦！到咗第日，雖然有啲涼，但班細路係沖涼個依然玩到不亦樂乎，我都由佢地。不過叫佢地沖完即刻入營坐陣先，唔係的話俾風吹住陣間冷親。之後我就教佢地爬樹，希望佢地遇到喪屍嘅時候都知道要點樣保命。
「首先，你地要搵啲枝節多嘅樹，好似呢個，咁佢伸出嚟個個位你先有得用手捉，同埋借力踩上去。小仁，你出嚟試下。」




小仁出咗嚟試咗好多次都唔得，但有小航就同我講：「Miss，我得我得，俾我試！」
佢出嚟爬又真係爬到上去，之後啲學生好似覺得好好玩咁，個個都搶住出嚟試。呢個時候我心諗如果唔關喪屍事，呢個其實都係一個幾好嘅野外體驗，係一個唔會賠上性命嘅體驗。佢地有啲得有啲唔得，咁都冇辦法，唔得個啲我叫佢地得閒就要練下。如是者，過咗一個星期，因為我想令呢到成為更安全嘅地方，想睇下有冇嘢可以圍一圍外面，等出面冇咁易望到入嚟，喪屍行過都唔會發現我地。我醒起我地落車嘅地方，個啲圍欄有好多政府宣傳嘅大橫額，我地可以拆咗去拎上嚟用。
於是我同班學生講：「我要落去搵物資，你地乖乖地係到等我。」
「Miss，我同埋你一齊去！」小千講。
言仔：「我又去！」
其他學生又陸續起哄。
我語重心長咁講：「我唔係去玩，帶住你地唔方便！」
「我唔係去玩㗎！Miss，我想幫你，你搜集物資，多個人幫你拎嘢咪仲好。」小千講。
言仔：「係呀！我都可以拎野！你放心啦！我行得好快，唔會拖累你㗎！」嘅然係咁，其實多個人睇水係方便啲嘅！於是，我就帶埋小千同言仔出去。出去前一人拎咗一碌棍，我亦同佢地講：「如果我地係出面遇到喪屍走散咗，咩都唔好理，返返呢到！」
之後我地就出發，我地好順利咁落返去，我拆曬啲橫額落嚟，一共有6塊，將佢地摺埋，點知拎上手又幾重喎。但我地未走住，難得落嚟，我想睇下仲有冇其他可以用嘅物資。我見到呢到有好多個翻倒咗嘅垃圾桶，我估係啲馬騮整到嘅，呢個地方其實好多馬騮，我地係上面都見到過幾次，但我不犯佢佢不犯我。咁我叫小千睇水，我同言仔都翻下垃圾筒睇下有冇有用嘅嘢。




我地搵到啲膠袋、打火機、水樽、毛巾、垃圾筒入面又有幾個大垃圾袋，全部都俾我收走。之後我地拎住沉重嘅物資急急腳咁返返去。啲嘢真係好重，返到去之後隻手就嚟斷咁制，酸痛咗幾日。但如果夠力的話，我真係好想連個垃圾筒都拎埋上嚟。雖然我仲未諗到可以點用。

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/