喪"師": 15-我終於可以冇咁大壓力，佢地都係！

「快啲！快啲！上面成班同學等緊我地！」
小航同樂樂係我嘅催促下不停追貼我，佢地已經攰到有時要扶住地下咁行。但我都冇辦法，一面催佢地一面保持速度前進，終於返到其餘學生停低嘅地方。
會合大家之後，我俾小航同樂樂抖多5分鐘之後就繼續上路。「全部注意，我地啱啱已經曬咗好多時開。我地要盡快去到目的地，所以由依家開始，我地要全速前進，你地跟住我嘅速度，明唔明？全部緊貼，唔好脫隊。」
講完之後，我就開始向上衝。講就講全速前進，我成日都要停低等佢地，數齊人頭。幸好，最後我地都有驚無險咁去到目的地。呢個地方，有泉水，又有耕作物，係一個安頓嘅好地方。
班小朋友已經好攰，我叫佢地坐底抖抖，之後我就周圍行下，睇下有啲咩物資可以用，同埋計劃一下今晚點樣安排。個一小塊田地範圍好細，我諗只有10米乘5米咁大，而旁邊嘅兩棵樹之間橫咗一塊布，下面放咗兩張凳。多數係呢塊田嘅主人放係到，累了就係到坐低休息。再旁邊就放咗好多雜物，我係個到翻下，果然俾我搵到唔少有用嘅嘢。Gas爐，gas，布，煲，煎pan，盤，刀，剪刀，電筒，報紙等等。最令我意外嘅係搵到兩個營，我即刻係班學生面前打開，開始組裝。好在入面啲配件全部都齊嘅，我大學個時成日都同朋友出去露營，所以組裝對我而言唔成問題，我好快就成功組裝好一個。個營都幾大，如果另一個都係咁大的話就應該夠我地全部人瞓，一個營7個人。一定係好逼架啦！但都好過餐風露宿，本身我仲諗住今晚我地一定要打地舖，依家睇嚟個天都待我不薄。
班學生見到我係到整都好好奇係到望，我問：「有冇人想試下裝？」
小非、小可同埋小千都行咗出嚟整，我由佢地自己試下。
離開咗學校之後，我同班學生長期繃緊嘅精神都稍為緩和同埋放鬆，始終不同於我地係課室嘅時候，出面滿佈喪屍。我要強硬咁控制成班學生嘅一舉一動，因為佢做錯咗小小都可能令大家冇咗條命。
依家我終於可以冇咁大壓力，佢地都係！小千佢地砌到有困難嘅時候，我同佢地解釋要點做。見到佢地成功砌好個營之後露出滿足嘅笑容，我都好欣慰，我地已經成個月冇咁放鬆過。之後將我帶出嚟僅餘嘅一啲糧食分俾大家，等佢地一面食我再一面向佢地講解今晚嘅安排。
「大家今日做得好好，我地依家終於可以係一個比較安全嘅地方安頓。但大家都唔以掉以輕心，依然要聽我嘅指示。（我望望錶，已經3：30，5點就應該開始入黑）因為我地係戶外安頓，入黑後會行動不便，所以我地每晚5點就要入營休息，直到等二日，天光先可以出營。我地7個人瞓一個營，晴晴、詩詩、小美、小千、小可、小非同埋我一個營，剩低嘅人瞓一個營（小森、言仔、天仔、蔡家偉、樂樂、小航、明仔）。陣間大家渴嘅話可以飲泉水，我知大家好耐冇沖涼，你地可以用泉水抺下臉、手手腳腳咁！但千奇唔好落水，唔好整濕自己件衫，如果唔係好易感冒。同埋大家就係我視線範圍內活動，唔好離隊。我陣間就會集合大家，安排大家入營瞓。一旦入咗營之後，即使你地瞓唔著都唔好出聲，想去洗手間都唔可以出營，全部人要等天光先可以出營，明唔明？




好！明就解散啦！夠鐘我就會集合返大家！」之後我都去洗下臉，坐底休息下，今日跑嚟跑去真係消耗咗我好多能量，今晚我就好好休息下啦！其他嘢等聽日再慢慢諗慢慢安排。我5點前安排班學生入曬營，再三提佢地未天光唔好出營，同埋唔好係入面大聲講野。之後我都入返自己個營到休息，本來我諗住自己可以堅持一陣，等到10點先瞓，因為我怕班細路唔守規矩，瞓瞓下就係到噪，所以想睇定啲先。
點知我實在太攰，眼皮勁重，隻眼撐都撐唔大，好快就昏睡咗。直到我俾透入嚟嘅陽光曬到有啲熱，醒咗！營嘅拉鏈位半開，但營帳入面早已空無一人。

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/