喪"師": 14-如果天黑前仲未安頓好的話，我地全部都會好危險！

脫離險境之後，我地要盡快繼續趕路，雖然我地一早就逃咗出嚟，依家先啱啱到中午，未咁快天黑。但係我地到埗之後，仲要搜尋下物資，睇下今晚點樣瞓。如果我地再慢吞吞，咁我地就唔夠時間係天黑前安排好，到時就會好麻煩。天黑後，山上就會伸手不見五指，不便活動，但我地又唔可以開電筒，因為會引周圍嘅喪屍行埋嚟，好危險。但大家都走散曬，我要集合返大家先。我叫小千留係原地等，我去追返佢地返嚟。但小千照跟住我，唔肯留底等，似乎係太怕啦！我沿路衝返落去搵佢地，我唔敢大叫班學生出返嚟，因為怕引到周圍嘅喪屍過嚟。我見有啲學生爬咗上斜坡，有啲行到遠處彎位到望下望下咁。「全部同我過返嚟！我已經解決咗隻喪屍啦！」
佢地半信半疑咁行埋嚟，見我冇受傷先鬆一口氣。好在佢地都冇走太遠。我點點人數，差兩個，係小航同樂樂。
「你地知唔知小航同樂樂去咗邊？」
「我見到佢地一齊一枝箭咁跑落山。」「係呀！我都見到！」唉！使唔使走咁遠呀！又要我去追返佢地返嚟，我已經好攰㗎啦！
但我要速戰速決，如果唔係佢地就越跑越遠，我有排搵。
「你地成班係原地等我，我去搵佢地返嚟！」
「Miss，我跟埋你去！」小森講。
「我又去！」
「係呀！我唔想留係到。」
一個學生話要跟埋我去，其他人都係到附和。但依家唔係講玩，帶住佢地成班返落去只會更混亂，佢地嘅體力亦會消耗得更快，到時我照顧得邊個。「唔准！你地全部都留係到等我，你地行得冇我咁快，只會拖住我。放心！我好快返嚟！如果陣間有啲咩突發事，你地就走上斜坡避一避。」




說罷，我就衝落去準備捉返個兩隻野返上嚟！
我一面跑，一面感受到膝頭所承受我嘅速度同力量，跑咗好一陣，我有啲猶疑，個兩隻野有冇跑到咁遠呀！會唔會係佢地匿埋咗，我已經錯過咗佢地。但我都繼續跑落去，跑咗我地啱啱所行嘅一半路程。
我真係有啲擔心，心諗佢地使唔使走咁遠呀！怕死我明，逃命我明！但都要跟大隊㗎，脫隊會令自己處境更危險嘅道理都唔明。再咁跑落去，我就返到我地落車嘅地方啦！佢地唔會真係想匿咗返上車掛，佢地都冇車匙，希望佢地唔好出事啦。我跑到喘哂氣，仲流咗好多汗。就係距離原點仲有10分鐘嘅位置，我見到樂樂企咗係到，望住斜坡下面。我跑去佢面前問：「得你嘅，小航呢？」
「MISS，你嚟就好啦！小航唔小心跌親，碌咗落去呀！」
我望落去，見到小航企係到望上嚟，講：「MISS，救我呀！」
見到佢啲衫沾滿泥，身上有啲擦傷，但企得係到，又唔似有大傷。以呢個斜坡嘅斜度，佢應該自己都可以爬返上嚟，但佢就企咗係原地唔郁。
於是，我問：「小航，你係咪整親邊到？」
「MISS，我隻左手好痛呀，郁唔到，爬唔返上嚟！」
原來如此！咁我就爬落去，睇下咩情況先。
我拎起小航隻左手，佢同我講：「我隻手屈唔到，用唔到力。」




我見到佢隻手冇表面傷痕，關節位有啲紅腫，佢呢種情況好明顯係甩骹。我唔係專業人士，但我之前都試過手甩骹，跌打師父將我手向內一屈就會移返正個骹位。咁我打算就地幫佢駁返，雖然我知道駁個下會好痛，但唔駁的話行動會好唔方便。「小航，你望下個邊。」等佢轉開頭嘅時候，我就即刻將佢隻手向內屈。
「啪」一聲，我就知道個骹返返去原位。
「呀！⋯⋯」但小航就痛到叫咗出嚟，縮埋隻手。「你睇下依家郁唔郁到？」
小航小心咁試一試郁下隻：「郁到啦！但隻手仲係有啲痛。」
「過多陣就冇事㗎啦！爬唔爬得返上去？」
小航嘗試爬返上去，但隻左手就就住就住咁扶，係怕整痛自己。咁我就適時拉一拉佢，俾佢借下力。我地都爬返上去之後，我就叫佢地跟住我快步跑返返去。我都行開咗一段時間，我都擔心上面班細路會有咩意外。但後面個兩個跟住我跑，喘到唔掂，幾次停咗係到話跑唔郁。我心諗，啱啱你地跑落嚟嘅時候又咁好氣。「快啲！快啲！上面成班同學等緊我地！」呢個時候已經2點，仲有3個鐘就日落入黑，我開始有啲焦急。我地本來只要30分鐘嘅路程，因為意外頻生，依家行咗兩個鐘都未到。
如果天黑前仲未安頓好的話，我地全部都會好危險。







#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/